Read Kalderash Romani Cornilescu Bible 2020 (Romania) Iov 9 Bible Online

Iov 9 - Kalderash Romani Cornilescu Bible 2020 (Romania) bible

Iov 9

¹O Iov lea o divano thai phendea:

²„Jeanau mišto kă sî kadea. Thai sar daštila o manuši te ankalavel pehkă čeačimos angla o Dell?

³Te kamena te xan pe Lesa, andakh mia butea naština te denanglal ka iekh korkoŕo.

⁴Lehko sî o xaraimos, thai o asazurallimos; kon daštila te kontril pe Lesa bi te avel došaldo?

⁵O mutil andakhdata le baŕbară, thai delemuial ande Pesti xolli.

⁶Izdravel e phuw anda e temelia lati, ta mištin lakă tille.

⁷Mothol le khamehkă, thai o kham či mai lulludearăl; thai nikrăl le čeraia tala Lesti bokolli.

⁸Dăsar O tinzol le čerurii, thai phirăl pel učimata la mareakă.

⁹O kărdea o Riši o baro, o lučeafăro la reateako thai le Raliçelea, thai le čeraia anda le phuwea kataravelodes.

¹⁰O kărăl butea bară thai biatearimahkă, šukarimata bi dindimahkă.

¹¹Dikta, O nakhăl paša mande, thai či dikhau Les, jealtar, thai či dikau Les.

¹²Kana azbal O, kon dašti atărdeară Les? Kon phenela Lehkă: „So kărăs?”

¹³O Dell či ambolde Pesti xolli; tala Leste bandeon sal nikărditorea le barimahkă.

¹⁴Thai me sar te dau Les anglal? Save divanuri te alosarau?

¹⁵Orta te avela ma čeačimos, či daua Les anglal. Našti dă sar te rudi ma le krisînitorehkă.

¹⁶Thai orta te ašunela ma kana akharau Les, sa našti te pateau kă ašundea muŕo mui;

¹⁷O, kai šudel ma sar ande khă bravallbrîšindesti, kai butearăl bi došako mîŕă anglunimata,

¹⁸kai či mekăl ma te phurdau, čeailearăl ma kărtimastar.

¹⁹Te prastau kai zor? O sî aseazurallo. Koa čeačimos? Kon nikărăla ma?

²⁰Orsode čeačimos avela ma, o mui muŕo došavela ma; thai orsode dă bidošalo avaua, O sîkavela ma sar došalo.

²¹Bidošalo! Sîm; ta či nikrau kai čivava, či dabadikhau mîŕî čivava.

²²So fal ma kai urma la urmati? Kă, zumavau te phenau: O mudarăl koles le bidošales sar i koles le došales.

²³Thai kana o šukni anelas iekhatar o mullimos! … Ta O asal le zumaimatăndar kolehkă le bidošalehkă.

²⁴E phuw sî dini andel vast kolehkă bikrisako; O garavel le iakha le krisînitorengă; te na O, apo kon aver?

²⁵Le des mîŕă prasten mai iekhatar sar khă prastaitorii; našen bi te dikhlino o baxtalimos;

²⁶nakhăn sar i le beruri kola le iuçîmahkă, sar o vulturo kai šudel pe poa xamos.

²⁷Kana phenau: „Kamau te bîstrau mîŕă dukhaimata, te mekau o tristomos, thai te avau voioso,”

²⁸sîm darano dă sal dukha mîŕă. Jeanau kă či ankalavesa ma bidošallo.

²⁹Thai kana avaua krisînime došallo, anda soste te mai kărau buti dă ivea?

³⁰Orta te xalavauas ma iwesa, orta te ujerau mîŕă vast lăšiasa,

³¹Tu sa spidesa ma ande čikh, ta skîrbona pe i le çoale mandar!

³²Kă O nai khă manuši sar mande, kaste dau Les anglal, thai te jeas andekh than kai kris.

³³Čina či nai vokh maškaitorii ande amende, kai te tho pehko vast pa amende lidui.

³⁴Te çîrdel Pesti ŕai opral pa mande, thai te na mai biujarăl ma Lesti dar.

³⁵Atunčeara daua duma thai či mai daraua Lestar. Kadeadar, či sîm stăpîno pe mande.