Read Kalderash Romani Cornilescu Bible 2020 (Romania) Psalmea 109 Bible Online

Psalmea 109 - Kalderash Romani Cornilescu Bible 2020 (Romania) bible

Psalmea 109

¹Karing o maibaro le dilabaitorengo. Khă psalmo le Davidohko. Devlla mîŕă lăudimahko, na ašimuto!

²Kă le dušmaia pîtărde pa mande khă mui nasul thai athadimahko, den mangă duma xoxamnea šibasa,

³pa sal riga aven divanurença pherde nabadikhlimatăngo, thai marăn pe mança bi čeačimahko.

⁴Ta kana me kamau le, on sî mangă dušmaia; ta me prastau koa rudimos.

⁵On ambolden mangă nasul andoa mištimos, thai bidabadikhlimos anda muŕo kamblimos.

⁶Le dušmanos mîŕăs tholes tala o stăpînimos khă manušehko jungalehko, thai khă pîŕîtori te bešel ka lesti čeači!

⁷Kana avela krisînime, te avel arakhlino došalo, thai o rudimos lehko te nakhăl orta khă bezex!

⁸Xançî te aven lehkă des koa dindimos, thai lehko kandimos te lel les aver!

⁹Te ašen lehkă šeave bidaddehko thai lesti romni phiwli!

¹⁰Lehkă šeave te phirăn bi khă batăkuiehko thai te mangăn, te roden pehko manŕo dur le thanestar lengo le peradestar!

¹¹Kukoa kai dea les unjile, te thol o vast pe sa so sî les, thai le străinea te jefuin o rodo lehka buteako!

¹²Khonikh te na mai nikrăl leste, thai khanikas te na aveles mila lehkă bidaddengo!

¹³Lehkă avimata te aven xasardine, thai te mudardeol lengo anau ando neamo kai avel!

¹⁴E bikris lengă daddengă te ašel sar andimos godeako angloa Rai, thai te na khosăl pe e bezex lehka dako!

¹⁵O Rai te avele orkana anglal iakha, kaste khosăl lengo pomenimos pai phuw,

¹⁶anda kă či andea pehkă godi bi milako, anda kă našadea kukole le bibaxtales thai koles naimahko, ji oče ta te mudarăl le manušes le illesa linčeardo!

¹⁷Čeailolas les e arman: te perăl pa leste! Či čeaileolas les o dinodumadămišto: te dureol lestar!

¹⁸Te xureadeol la armaiasa sar xureadeol pehka raxameasa, šolpe sar o pai ande leste, sar o zetino andel kokala!

¹⁹Anda kodea, te aveles xureaimos thai te garave les, la bričiatar saveasa te avel orkana phanglino!

²⁰Kadea te avel, anda e rig l e Raiesti, o potindimos mîŕă dušmaiengo, thai kolengo kai den duma dă nasul pa mande!

²¹Ta Tu, Raia, Devlla, kăr buti anda mande anda o Anau Tiro, kă baro sî o lašimos Tiro: skăpisar ma!

²²Sîm bibaxtalo thai binaimahko, thai sî dukhado muŕo illo ande mande.

²³Xasardiua gata sar e ušal kai nakhăl, sîm našado sar khă grastčeareako.

²⁴Šutile mîŕă čeanga postimastar, thai sailo muŕo stato šutimahko.

²⁵Arăslem lengă prasaimahko; kana dikhăn ma on, den andoa šero.

²⁶Kande ma, Raia, Devlla, muŕo! Skăpisar ma ande Teo lašimos!

²⁷Thai te jeangleol pe kă Teo vast, Kă Tu, Raia, kărdean e buti kadea!

²⁸Barem kă on den armaia, Tu dedumadămišto; barem kă vazden pe pa mande, avena lajavehkă, ta Teo robo bukurila pe.

²⁹Le dušmaia mîŕă te xureaven pe lajavesa, te garaven pe pehkă lajavesa sar kha raxameasa!

³⁰Lăudiua but dă sa mîŕă mosa le Raies, barearaua Les ando maškar le butimatăngo;

³¹Kă O bešel kai čeači le čioŕăsti, kaste skăpiles kolendar kai došaven les.