Read Kalderash Romani Cornilescu Bible 2020 (Romania) Psalmea 116 Bible Online

Psalmea 116 - Kalderash Romani Cornilescu Bible 2020 (Romania) bible

Psalmea 116

¹Kamau le Raies, kă O ašunel o mui muŕo, mîŕă manglimata.

²E, O bandeardea Pehko kan karing mande, Anda kodea akharaua Les sa mîŕî čivava.

³Phateardesas ma le phanglimata le mullimahkă, thai astardesas ma le paia la groapatilemullimasti; sîmas dino le năkazohko thai la dukhakă.

⁴Ta akhardem o Anau le Raiehko, thai phendem: „Raia, skăpisar muŕo duxo.”

⁵O Rai sî miloso thai čeačio, thai amaro Dell sî pherdo milatar.

⁶O Rai arakhăl kolen binasulimahko: sîmas bibaxtalo dă sa, ta O skăpisardea ma.

⁷Ambolde tu, duxona, ka teo xodinimos, kă o Rai kărdea tukă mišto.

⁸E, Tu skăpisardean muŕo duxo merimastar, le iakha andal iasfa, thai le pînŕă kata o peradimos.

⁹Phiraua angloa Rai, pe phuw kolendi le juvindendi.

¹⁰Sas ma čeačimos kana phenauas: „Sîm but bibaxtalo!”

¹¹Ande muŕo biujimos, phenauas: „Orsao manuši sî athaimahko.”

¹²Sar dašti potinua le Raiehkă sal lašimata Lehkă angla mande?

¹³Vazdaua o tahtali le skăpimatăngo, thai akharaua o Anau le Raiehko;

¹⁴pheraua mîŕă solaxaimata kărdine le Raiehkă, angla sa Lehko poporo.

¹⁵Kučii sî angloa Rai o mullimos kolengo kambline Lestar.

¹⁶Ašun ma, Raia, kă sîm Teo robo: o robo Tiro, o šeau la roabakă Tireako, thai Tu pîtărdean mîŕă phanglimata.

¹⁷Anaua Tukă ăkh jertfa naismasti, thai akharaua o Anau le Raiehko;

¹⁸pheraua mîŕă solaxaimata kărdine le Raiehkă angla sa Lehko poporo,

¹⁹andel barea le Khărăhkă le Raiehkă, ando maškar tiro, Ierusalimona! Lăudin le Raies!