Read Kalderash Romani Cornilescu Bible 2020 (Romania) Psalmea 119 Bible Online

Psalmea 119 - Kalderash Romani Cornilescu Bible 2020 (Romania) bible

Psalmea 119

¹Baxtalo kolendar bibezexalimahko ande lengo drom, kai phirăn orkana pala e Kris le Raiesti!

²Baxtalo kolendar kai arakhăn le mothodimata Lehkă, kai roden Les anda sa lengo illo,

³kai či kărăn či khă bezexalimos, thai phirăn ande Lehkă droma!

⁴Tu dean le mothodimata Tiră kaste aven arakhle sfinçomasa.

⁵O, te phirăna mîŕă droma koa arakhaimos Tiră lašarimata!

⁶Atunčea či lolliua lajavestar, koa dikhlimos sa Te phendimatăngo!

⁷Lăudiua Tu le illesa bibezexalo, kana sîtiua le krisa Tiră čeačimahkă.

⁸Kamau te arakhau sa Te phendimata: na mekh ma dă sa!

⁹Sar nikrăla o tărno ujo pehko drom? Ortosao la pala o Divano Tiro.

¹⁰Rodau Tu anda sa muŕo illo; na mekh ma te perau kata le mothodimata Tiră.

¹¹Tidau o Divano Tiro ande muŕo illo, kaste na bezăxarau angla Tute!

¹²Dinodumadămišto te aves Tu, Raia! Sîkau ma le phendimata Tiră!

¹³Mîŕă uštença vestiu sa le phendimata Te mohkă.

¹⁴Kana jeau palal phiraimata Tiră, bukurisavau ta fal kă sîma sal mandinata.

¹⁵Dau ma godi andră andel mothodimata Tiră, thai le droma Tiră sî ma talal iakha.

¹⁶Čeailiuau andel phendimata Tiră, thai či bîstrau Teo Divano.

¹⁷Kăr mišto Te robohkă, kaste traiu thai te arakhau o Divano Tiro!

¹⁸Pîtăr mîŕă iakha, kaste dikhau le šukarimata butea Tea Krisakă!

¹⁹Sîm khă strino pe phuw: na garau mangă Te mothodimata!

²⁰Orkana bilal muŕo duxo dorostar palal krisa Tiră.

²¹Tu xolleaos pe kola le barimatahkă, pe le dinearman kadala, kai xasaon katal mothodimata Tiră.

²²Vazde pa mande o lajau thai o bidikhlimos! Kă arakhau le sîkaimata Tiră.

²³Sa te bešen le voevodurea thai te den duma pa mande: teo robo del pe godi andră ka Te phendimata.

²⁴Le sîkaimata Tiră sî muŕo čeailimos thai le sîkaitorea mîŕă.

²⁵Muro duxo sî astardo phuweatar: ušteau ma, pala Tiro šinaimos!

²⁶Me phenau mangă le droma, thai Tu ašunes ma: sîkau ma le phendimata Tiră!

²⁷Kăr ma te atearau o drom Te mothodimatăngo, thai daua ma godi ka le butea Tiră kola le šukarimahkă.

²⁸Rovel muŕo duxo dukhatar: vazde ma, pala o Divano Tiro!

²⁹Durear ma le dromestar lebipateimahko karing Tute, thai de ma Ti mila, kaste phirau pala Ti Kris!

³⁰Alosarau o drom le čeačimahko, thoau le krisa Tiră tala mîŕă iakha.

³¹Nikar ma Te sîkaimatăndar, Raia, na mekh ma lajavehko!

³²Prastau po drom te mothodimatăngo, kă ankalaves muŕo illo koa thanbuflo.

³³Sîkau ma, Raia, o drom le phendimatăngo Tiro, kaste nikrau les ji koa gor!

³⁴de ma godi kaste arakhau e Kris Tiri thai te nikrau la anda sa muŕo illo!

³⁵Phirau ma po drom Te mothodimatăngo Kă čeaileol ma lestar.

³⁶Bandear muŕo illo karing le sîkaimata Tiră, thai na karing o valoso!

³⁷De mîŕă iakha rigate kata o dikhlimos le butengo xasardimahkă, ušteau ma pe Teo drom!

³⁸Pher-Teo šinaimos angla Teo robo, o šinaimos kărdo anda kola kai daran Tutar!

³⁹Durear mandar o prasaimos savestar darau! Kă le krisa Tiră sî pherde lašimos.

⁴⁰Dikta, kamau te kărau le mothodimata Tiră: kăr ma te trai ando bibezexalimos manglino Tutar!

⁴¹Te avel, Raia, o lašimos Tiro pa mande, o skăpimos Tiro, pala o šinaimos Tiro!

⁴²Thai atunčea daštiua dau anglal kolehkă kai prasal ma, kă patea ma ando Divano Tiro.

⁴³Na le sa anda muŕo mui o divano le čeačimahko! Kă ajukrau andel krisa Tiră.

⁴⁴Arakhaua e Kris Tiri biatărdimahko, orkana thai ando veako.

⁴⁵Phiraua ando thanbuflo, kă rodau Tiră phendimata.

⁴⁶Daua duma pal sîkaimata Tiră anglal thagar, thai či lolleola muŕo mui.

⁴⁷Čeailiuau andel phendimata Tiră, kă kamau le.

⁴⁸Tinzo mîŕă vast pal phendimata Tiră, kai kamau le, thai kamau te da ma godi andră kal phendimata Tiră.

⁴⁹An Tukă godi le šinaimastar dino Te robos, ande sao kărdean ma te thoau muŕo ajukărimos!

⁵⁰Kadoa sî muŕo thodimos ande muŕo năkazo: kă o šinaimos Tiro del ma pale čivava.

⁵¹Varesar barimahkă šuden mangă prasaimata, Ta me či dau ma rigate katai Kris Tiri.

⁵²Dau ma godi kal krisa Tiră dă maianglal, Raia, thai mišto sîm.

⁵³Astarăl ma khă xolli phabardi koa dikhlimos le jungalengo, kai mekăn e Kris Tiri.

⁵⁴Le phendimata Tiră sî o dilabaimos mîŕă dilengo, ando khăr mîŕă phirimahko.

⁵⁵Reate anau mangă godi le Anavestar Tirăstar, Raia, thai arakhau e Kris Tiri.

⁵⁶Kadea fal pe mangă, kă arakhau le mothodimata Tiră.

⁵⁷E rig mîŕî, Raia, phenau la, sî te arakhau le divanuri Tiră.

⁵⁸Rudi Tu anda sa muŕo illo: fal tu nasul mandar, pala o šinaimos Tiro!

⁵⁹Dau ma godi ka mîŕă droma, thai orto mîŕă pînŕă karing le Sîkaimata Tiră.

⁶⁰Iuçîsauau, thai či dau rigate te arakhau Te mothodimata.

⁶¹Le astardimata kole nasulengo denmaroata, ta či bîstrau e Kris Tiri.

⁶²Ušteau po maškar la reateako te lăudiu Tu anda le krisa Tiră kola le orta.

⁶³Sîm amal saoŕănça kolença kai daran Tutar, thai kolença kai arakhăn te mothodimata.

⁶⁴E phuw, Raia, sî pherdi Teo lašimos; sîkau ma le phendimata Tiră!

⁶⁵Tu kărăs mišto Te robohkă, Raia, pala o šinaimos Tiro.

⁶⁶Sîkau ma te avel ma atearimos thai prinjeandimos, kă pateau andel mothodimata Tiră.

⁶⁷Ji kana sîmas meklino, xasardiuas, Ta akana arakhau o Divano Tiro.

⁶⁸Tu san lašo thai mištokărdimahko: sîkau ma Te phendimata!

⁶⁹Varesar barimahkă astarăn bičeačimata pa mande, ta me arakhau anda sa muŕo illo le mothodimata Tiră!

⁷⁰Lengo illo sî biatearimahko sar o thulimos: ta me čeailiuau ande Ti Kris.

⁷¹Sî karing o mišto muŕo kă Mekleanmatelal, kaste sîtiuau Te phendimata.

⁷²Mai but kučearăl anda mande e kris Te mosti, dă sar ăkh mia butea sumnakahkă thai rupehkă.

⁷³Te vast kărdine ma, thai lašarde ma; de ma godi, kaste sîtiuau le mothodimata Tiră!

⁷⁴Kola kai daran Tutar dikhăn ma thai bukurin pe, kă ajukrăn andel šinaimata Tiră.

⁷⁵Jeanau, Raia, kă le krisa Tiră sî orta: andoa pateaimos mekleanmatelal.

⁷⁶Kăr ka Teo skăpimos te avel muŕo miluimos, sar šinadean le robohkă Tirăhkă!

⁷⁷Te aven pa mande le lašimata Tiră, kaste trai, kă e Kris Tiri sî muŕo čeailimos.

⁷⁸Te aven perade le barimahkă kai peraven pa mande bičeačimahko! Kă me dau godi andră kal mothoimata Tiră.

⁷⁹Te ambolden pe mande, kola kai daran Tutar. Thai kola kai prinjeanen le sîkaimata Tiră!

⁸⁰O illo te avel mangă bixulado andel lašdimata Tiră, kaste na avau dino lajavehko!

⁸¹Muŕo duxo rovel pala o skăpimos Tiro: ajukrau ando šinaimos Tiro.

⁸²Bilan mîŕă iakha pala o šinaimos Tiro, thai phenau: „Kana miluisa ma?”

⁸³Kă arăslem sar khă burdufo thodino koa thuw; ta sa či bîstrau Te phendimata.

⁸⁴Sao sî o dindimos le desăngo Te robohko? Kana došavesa kolen kai našaven ma?

⁸⁵Varesar barimahkă xunaven gropi angla mande; či butearăn pala Ti Kris.

⁸⁶Sa Te mothodimata nai dă sar pateaimos; on našaven ma bi čeačimahko: kande ma!

⁸⁷Iekhatar, iekatar te peraven ma thai te xasarăn ma, ta me či mekau Te mothodimata.

⁸⁸Ušteau ma pala Teo lašimos, kaste arakhau le sîkadimata Te Mohkă!

⁸⁹O Divano Tiro, Raia, nikrăla andel veakuri ando čerii.

⁹⁰O pateaimos Tiro nikrăl neamo anda neamoste; Tu kărdean e phuw, thai oi ašel zurali.

⁹¹Pala le krisa Tiră sa bešel ande pînŕănde ades, kă sal butea sî tukă mekline.

⁹²Te na avino Ti Kris muŕo čeailimos, sahkă xasardilemas ande muŕo bibaxtalimos.

⁹³Čiăkhdata či bîstrau Te mothodimata, kă anda lende Tu ušteaves ma.

⁹⁴Tiro sîm: skăpisar ma! kă rodau le mothodimata Tiră.

⁹⁵Varesar jungale ajukrăn ma kaste xasarăn ma; ta me lau godi kal sîkaimata Tiră.

⁹⁶Dikhau kă sa so sî mištimasa sî le riga: le mothodimata Tiră sî mangă birigăngo.

⁹⁷Sode dă but kamau Tiri Kris! Soŕo des dau ma godi late.

⁹⁸Le mothodimata Tiră kărăn ma mai xarano sar mîŕă dušmaia, kă orkana laule mança.

⁹⁹Sîm mai sîkado dă sar sa mîŕă sîkaditorea, kă dau ma godi kal sîkaimata Tiră.

¹⁰⁰Sî ma mai but prinjeandimos dă sar le phură, kă arakhau le mothodimata Tiră.

¹⁰¹Nikrau muŕo punŕo dur dă orsao drom nasulimahko, kaste arakhau o Divano Tiro.

¹⁰²Či duriuau Te krisăndar, kă Tu sîkaves ma.

¹⁰³So gugle sî le divanuri Tiră anda o čerii mîŕă mohko! Mai gugle sar o avdin ande muŕo mui!

¹⁰⁴Anda le mothodimata Tiră kărăs ma mai godeaver, anda kodea či dabadikhau orso drom le xoxaimahko.

¹⁰⁵O Divano Tiro sî khă lampa anda mîŕă pînŕă, thai khă lumina pe muŕo drom.

¹⁰⁶Solaxau, — thai nikraua ma le solaxaimastar, — kă arakhaua sa le krisa Tiră le orta.

¹⁰⁷Sîm but xolleardo: ušteau ma, Raia, pala o Divano Tiro!

¹⁰⁸Le, Raia, le atearimata kai phenele muŕo mui, thai sîkau ma le krisa Tiră!

¹⁰⁹Mîŕî čivava sî biatărdimahko ando xasarimos, thai sa či bîstrau Ti Kris.

¹¹⁰Varesar jungale tinzon mangă astardimata, ta me či xasardiuau katal mothodimata Tiră.

¹¹¹Le sîkaimata Tiră sî o mandimos muŕo andel veakuri, kă on sî o bukurimos mîŕă illehko.

¹¹²Bandearau muŕo illo te pherau le phendimata Tiră, orkana ji ando gor.

¹¹³Či dabadikhau le manušen bijeanglimahko, Ta kamau e Kris Tiri.

¹¹⁴Tu san o garadimos thai o skuto muŕo, me ajukrau ando šinaimos Tiro.

¹¹⁵Dureon mandar, ăl nasul, kaste arakhau le mothodimata mîŕă Devllehkă!

¹¹⁶Nikăr ma, pala o šinaimos Tiro, kaste trai, thai na mekh ma lajavehko ando ajukărimos muŕo!

¹¹⁷Av o nikărimos muŕo, kaste avau skăpime, thai te vesălima biatărdimahko andel phendimata Tiră!

¹¹⁸Tu či dabadikhăs sa kolen kai dureaon le phendimatăndar Tirăndar, kă o athadimos lengo sî iveantaină.

¹¹⁹Sar e zoala les sal nasulen pai phuw: anda kodea me kamau le sîkaimata Tiră.

¹²⁰Isdral muŕo mas Tea daratar, thai darau le krisăndar Tirăndar.

¹²¹Arakhau e kris thai o čeačimos: na mekh ma ando kamimos mîŕă zuralimatăngo!

¹²²Le tala o stăpînimos Tiro o mištimos Te robohko, thai na mekh ma meklino varesandar barimatăngo!

¹²³Bilan mîŕă iakha pala o skăpimos Tiro, thai pala o šinaimos Tiro o orta.

¹²⁴Phir le robosa Tirăsa pala Tiro lašimos, thai sîkau ma le phendimata Tiră!

¹²⁵Me sîm o robo tiro; de ma godi, kaste prinjeanau le sîkaimata Tiră.

¹²⁶Sî o čiro ta o Rai te butearăl: kă on ušteaven Ti Kris.

¹²⁷Anda kodea, me kamau le mothodimata Tiră, mai but dă sar o sumnakai, e, mai but dă sar o sumnakai o ujo.

¹²⁸Anda kodea arakhau čeače sa te mothodimata Tiră, thai či dabadikhau orsavo drom le xoxaimahko.

¹²⁹Le sîkaimata Tiră sî mîndrimata: anda kodea arakhăle o duxo muŕo.

¹³⁰O sîkaimos Te divanurengă del lumina, prinjeandimasti kolengo bi jungalimahko.

¹³¹Pîtrau o mui thai daudii, kă sîm xarvalo pala Te mothodimata.

¹³²Ambolde Teo mui karing mande, thai avel Tu mila mandar, pala o kamimos Tiro anda kukola kai kamen Tiro Anau!

¹³³Zurear mîŕă pašea ando Divano Tiro, thai na mekh či khă bikris te stăpînil pa mande!

¹³⁴Skăpisar ma kata o pharimos le manušengo, kaste arakhau Te mothodimata!

¹³⁵Kăr te străfeal Teo Mui pa Teo robo, thai sîkau ma le phendimata Tiră!

¹³⁶Le iakha šorăn thavdimata paiengă, anda kă e Kris Tiri nai arakhadi.

¹³⁷Tu san orta, Raia, thai le krisa Tiră sî bibezexalimahkă.

¹³⁸Tu thos te sîkaimata po čeačimos, thai po mai baro pateaimos.

¹³⁹E buti mîŕî xal ma, anda kă le dušmaia bîstrăn le divanuri Tiră.

¹⁴⁰Teo Divano sî ku sa zumado, thai o robo Tiro kameles.

¹⁴¹Sîm çînoro thai bidikhlino, ta či bîstrau le mothodimata Tiră.

¹⁴²O čeačimos Tiro sî khă čeačimos vešniko, thai e Kris Tiri sî o čeačimos.

¹⁴³O năkazo thai o strandimos arăsăn ma, ta le mothodimata Tiră sî muŕo čeailimos.

¹⁴⁴Te sîkaimata sî čeače ando veako: de ma godi, kaste trai.

¹⁴⁵Akharau Tu anda sa muŕo illo: ašun ma, Raia, kaste arakhau le phendimata Tiră.

¹⁴⁶Akharau Tu: skăpisar ma, kaste arakhau le sîkaimata Tiră!

¹⁴⁷Lau la angloa lulludearimos le desăhko thai çîpi; ajukrau andel šinaimata Tiră.

¹⁴⁸Lau la angla le străji la reateakă, thai pîtrau le iakha, kaste dau ma godi andră koa Divano Tiro.

¹⁴⁹Ašun muŕo mui, pala o lašimos Tiro: ušteau ma, Raia, pala Ti kris!

¹⁵⁰Pašon kola kai phirăn pala o marimos, thai dureon Tea Krisatar.

¹⁵¹Ta Tu san paše, Raia, thai sa le mothodimata Tiră sî o čeačimos.

¹⁵²Dă but čiro jeanau andal sîkaimata Tiră, kă lašardean le anda orkana.

¹⁵³Dikh muŕo čioŕămos, thai skăpisar ma, kă či bîstrau Ti Kris.

¹⁵⁴Nikăr mança, thai potin ma, ušteau ma pala o šinaimos Tiro.

¹⁵⁵O skăpimos sî dur kole jungalendar, kă on či roden le phendimata Tiră.

¹⁵⁶Bară sî le lašimata Tiră, Raia! Ušteau ma palal krisa Tiră!

¹⁵⁷But sî mîŕă marditorea thai le dušmaia mîŕă, ta či duriuau Te sîkaimatăndar.

¹⁵⁸Dikhau greçomasa kolen bipateamahko Tukă, kai či arakhăn o Divano Tiro.

¹⁵⁹Dikhăs sode dă but kamau me le mothodimata Tiră: ušteau ma, Raia, pala teo lašimos!

¹⁶⁰E temelia Te Divanosti sî o čeačimos, thai sa le krisa Tiră kola le orta sî andel veakuri.

¹⁶¹Varesar voievoza našaven ma bičeačimahko, ta muŕo illo či izdral numai kal divanuri Tiră.

¹⁶²Bukurima Te Divanostar, sar kukoa kai arakhăl bari buti.

¹⁶³Či kamau thai našti dabadikhau o xoxaimos, ta kamau e Kris Tiri.

¹⁶⁴Eftavar po des lăudiu Tu, Anda le krisa Tiră kola le čeačea.

¹⁶⁵But pačea sî kolen kai kamen E Kris Tiri, thai nai le či khă bibaxtalimos.

¹⁶⁶Me ajukrau ando skăpimos Tiro, Raia, thai nikrau le mothodimata Tiră.

¹⁶⁷O duxo muŕo nikrăl le sîkaimata Tiră, thai kamau le but dă sa!

¹⁶⁸Arakhau le mothodimata thai le sîkaimata Tiră, kă sa le droma mîŕă sî angla Tute.

¹⁶⁹Te arăsăl muŕo çîpimos ji Tute, Raia! De ma godi, pala o šinaimos Tiro.

¹⁷⁰Te arăsăl o manglimos muŕo ji Tute! Skăpisar ma, pala o šinaimos Tiro!

¹⁷¹Mîŕă ušt te phenen o lăudimos Tiro, kă Tu sîkaves ma le phendimata Tiră!

¹⁷²Te dilabal mîŕî šib Teo Divano, kă sa le mothodimata Tiră sî čeače!

¹⁷³Teo vast te avel mangă ando kandimos, kă alosardem le mothodimata Tiră.

¹⁷⁴Rovau pala o skăpimos Tiro, Raia, thai Kris Tiri sî muŕo čeailimos.

¹⁷⁵Te trail muŕo duxo thai Te lăudil Tu, thai le krisa Tiră te nikrăn ma!

¹⁷⁶Xasardo sîm sar khă bakri xasardi: rode Te robos, kă či bîstrau Te mothodimata.