Read Kalderash Romani Cornilescu Bible 2020 (Romania) Psalmea 147 Bible Online

Psalmea 147 - Kalderash Romani Cornilescu Bible 2020 (Romania) bible

Psalmea 147

¹Lăudin le Raies! Kă sî mundro te lăudisaras amară Devlles, kă sî drago, thai fal pe te lăudisaras Les.

²O Rai vazdel pale o Ierusalimo, tidel le telearden le Israelohkărăn;

³sastearăl kolen le illesa linčeardo, thai phandel lengă dukha.

⁴O dinel, sode sî le čeraia, thai dele anav ka sa.

⁵Baro sî amaro Rai thai zuralo ande zor Lesti, o prinjeandimos Lehko sî bi rigăngo.

⁶O Rai nikrăl kolen le bibaxtalen, thai peravel kolen le jungalen kai phuw.

⁷Dilaban le Raiehkă naismatănça, lăudin amară Devlles la xarfasa!

⁸O pherăl o čerii norença, laxšarăl o brîšind andai phuw, thai kărăl te lulludil e čear pel baŕlebară.

⁹O del xamos le jivinen, thai le puiengă le korbohkă kana çîpin.

¹⁰Na la zoratar le grastesti bukuril pe O, či arakhăl pehko čeailimos andel pînŕă le manušehkă.

¹¹O Rai kamel kolen kai daran Lestar, kolen kai ajukrăn ando lašimos Lehko.

¹²Lăudisar le Raies, Ierusalimona, lăudisar te Devlles, Sioane!

¹³Kă O zurearăl le druguri le udarăngă, O deldumadămišto te šaven ande teo maškar;

¹⁴O del pačea tea phuweakă, thai čeailearăl tu le mai laše divesa.

¹⁵O tradel pehkă mothodimata pe phuw, Lehko Divano našel iuçîmasa baro.

¹⁶O del o iw sar e pošom, O thol e parni buŕ sar o ušar;

¹⁷O šudel pehko pao andel kotora; kon dašti bešel angla Lehko šill?

¹⁸O tradel Pehko Divano, thai bilavele; thol te phurdel Lesti bravall, thai le paia thawden.

¹⁹O sîkavel le Iakovohkă Pehko Divano, thai le Israelohkă le krisa thai le mothodimata Lehkă.

²⁰O či kărdea buti kadea sa le neamurença, thai on či prinjeanen Lehkă mothodimata. Lăudin le Raies!