Read Kalderash Romani Cornilescu Bible 2020 (Romania) Psalmea 22 Bible Online

Psalmea 22 - Kalderash Romani Cornilescu Bible 2020 (Romania) bible

Psalmea 22

¹Karing o mai baro le dilabaitorengo. Dilabal pe sar „e čerboaika le zorendi” Khă psalmo le Davidohko. Devlla! Devlla! Sostar muklean ma, thai anda soste dureos bi te kandes ma thai bi te ašunes le roimata mîŕă?

²Çîpi desă Devlla, thai či des ma anglal: çîpi i reate, thai sa nai ma xodinimos.

³Sa Tu san Kukoa o Sfînto, thai Tu bešes ando maškar le lăudimatăngo le Israelohkă.

⁴Ande Tute pateanas amară dadda: Pateanas pe thai skăpisas le.

⁵Çîpinas karing Tute, thai sas skăpime; pateanas pe ande Tute, thai či ašenas lajavehkă.

⁶Ta me sîm termo, na manuši, arăslem prasaimos le manušengă, thai bidikhlino le poporostar.

⁷Sa kola kai dikhăn ma marăn pehkă prasaimos mandar, pîtrăn pehko mui, den andoa šero, thai phenen:

⁸„Pateaia pe ando Rai! Te skăpil les o Rai, te sastearăl les, anda kă kamel les!

⁹E, Tu ankaladean ma anda o păŕ la deiako, thodean ma koa garaimos anda orsavo grijomos kal čiučea mîŕa deiakă;

¹⁰dă kana sîmas kai čiuči la dati, sîmas tala Teo arakhaimos, andoa păŕ mîŕa dako sanas muŕo Dell.

¹¹Na dureao mandar, kă Paši'lo o čiorîmos, thai khonikh či avel mangă ando kandimos.

¹²Ăkh butimos guruwngo sî karing mande, varesar guruwa andoa Basano den ma angali.

¹³Pîtrăn pehko mui pa mande, Sar khă leo, kai pharavel thai çîpil.

¹⁴Arăslem sar o pai, kai thavdel, thai sa le kokala pîtordeon mangă; Kărdi'lo muŕo illo sar o mom, thai bilal ande mande.

¹⁵Šuteol mîŕî zor sar e čikh, thai asatardeol mîŕî šib le taloiestar: andean ma ande phuw le merimastii.

¹⁶Kă varesar jukăl okolin ma, khă kîrdo bikrisako den phirăn pala mande, pusadine mîŕă vast thai mîŕă pînŕă:

¹⁷sa le kokala daštiua te dinau mangă le. Ta, on, pîndin ma thai dikhăn ma;

¹⁸xulaven pehkă mîŕă çoale maškar lende, thai çîrden kai bax anda muŕo gad.

¹⁹Ta, Tu, Raia, na dureo! Tu, e Zor mîŕî, av iekhatar ande muŕo kandimos!

²⁰Skăpisar muŕo duxo la sabiatar, thai e čivava anda le deară le juklengă!

²¹Skăpisar ma andoa mui le leohko, Thai ankalav ma anda le šinga le guruwehkă!

²²Vestiua Tiro Anau mîŕă phralengă, thai lăudisaraua Tu ando maškar le tidimahko.

²³Kola kai daran le Raiestar, lăudin Les! Tume sa, e sămînça le Iakovosti, slăvin Les! Isdran angla Leste, sa tume, sămînça le Israelosti!

²⁴Kă o čina či prasal, čina či dabadikhăl le năkazurea kolehkă le bibaxtalehkă, či garavel Pehko Mui lestar, ta ašune les kana del mui karing Leste.

²⁵Ando tidimos o baro, Tu avesa o lăudimos muŕo: thai pheraua mîŕă solaxaimata angla kola kai daran Tutar.

²⁶Le čioŕă xana thai čeaileona, kola kai roden le Raies, lăudina Les: baxtalo te avel tumaro illo ando veako!

²⁷Sa le gora la phuweakă anena pehkă godi thai amboldena pe koa Rai: sa le familii le neamurengă dena čeanga angla Tute.

²⁸Kă le Raiehko sî o thagarimos: O stăpînil pal neamurii.

²⁹Sa kola le zurale pai phuw xana thai dena čeanga i on; angla Leste bandeona sa kukola kai ulen ande phuw, kola kai našti te nikrăn pesti čivava.

³⁰Khă sămînça manušendi kandela Les; thai dela pe duma poa Rai karing kola kai avena pala lende.

³¹Kadala avena thai vestina o čeačimos Lehko, vestina e buti Lesti le poporohkă kai kărdeola.