Read Kalderash Romani Cornilescu Bible 2020 (Romania) Psalmea 25 Bible Online

Psalmea 25 - Kalderash Romani Cornilescu Bible 2020 (Romania) bible

Psalmea 25

¹Khă psalmo le Davidosti. Tute, Raia, vazdau muŕo duxo.

²Ande Tute, Devlla, pateau ma: te na avau dino lajavehko, kaste na bukurin pe mîŕă dušmaia mandar!

³E, sa kukola kai patean ande Tute či avena dine lajavehkă: Ta lajavehkă avena kukola kai mekăn Tu bi čeačimahko.

⁴Sîkau mangă, Raia, le droma Tiră, thai sîkau ma le droma Tiră.

⁵Godear ma ando čeačimos Tiro, thai sîkau ma; kă Tu san o Dell mîŕă skăpimahko, Tu san orkana muŕo ajukărimos!

⁶An Tukă godi, Raia, Te meklimastar thai Te lašimastar; kă sî vešnikuri.

⁷Na an Tukă godi mîŕă athadimatar andoa tărnimos muŕo, či le bikrisăngo mîŕăngo; ta an Tukă godi mandar, pala Tiri mila, anda Tiro laxšimos, Raia!

⁸O Rai sî čeačio thai orta: anda kodea O sîkavel le bezexalengă o drom.

⁹O kărăl kolen le meklinetele te phirăn ande sa so sî orta. O sîkavel kolen le meklinetelal o drom Pehko.

¹⁰Sa le droma le Raiehkă sî mila thai pateaimos, anda kola kai arakhăn o phanglimos thai Lehkă mothodimata.

¹¹Anda o Anau Tiro, Raia, iertisar mîŕă bikris, kă bari sî!

¹²Kon sî o manuši, kai daral le Raiestar? Kodolehkă o Rai sîkavel lehkă o drom kai trăbul te alol les.

¹³O bešela ando baxtalimos, thai e sămînça lesti stăpînila o čem.

¹⁴O amalimos le Raiehko sî anda kola kai daran Lestar, thai o phanglimos kărdo Lesa del le sîkaimos.

¹⁵Me amboldau biatărdimahko le iakha karing o Rai, kă O ankalave la mîŕă pînŕă andai phal.

¹⁶Dikh ma thai avel Tu mila mandar, kă sîm korkoŕo thai bibaxteako.

¹⁷O biujimos mîŕă illehko bareol: ankalav ma anda muŕo năkazo!

¹⁸Dikh Ta muŕo čioŕîmos thai o prastaimos muŕo, thai iertisar sa mîŕă bezexa.

¹⁹Dikh sode sî dă but mîŕă dušmaia, thai so zuralea xolleasa phirăn pala ma.

²⁰Arakh muŕo duxo, thai skăpisar ma! Na mekh ma te avau dino lajavehko kana patea ma ande Tute!

²¹Te arakhăl ma o bidošalimos thai o bibezexalimos, kana thoau muŕo ajukărimos ande Tute!

²²Skăpisar, Devlla, le Israelos anda sea lehkă năkazuri.