Read Kalderash Romani Cornilescu Bible 2020 (Romania) Psalmea 27 Bible Online

Psalmea 27 - Kalderash Romani Cornilescu Bible 2020 (Romania) bible

Psalmea 27

¹Khă psalmo le Davidosti. O Rai sî e lumina thai o skăpimos muŕo: kastar te darau? O Rai sî o nikărdimos mîŕa čivavako: kastar te avel mangă dar?

²Kana aven le nasul pa mande, kaste xan muŕo mas, orta on — le tinuitorea thai mîŕă dušmaia — mištin pe thai perăn.

³Orta khă oštirea te avel pa mande, Muŕo illo sa nahkă daral. Orta mardimos te vazdel pe pa mande, sa pherdo pateamos avaua.

⁴Khă buti mangau kata o Rai, thai kamau la phabarindoi: sahkă kamau te bešeau sa mîŕî čivava ando Khăr le Raiehko, Kaste dikhau o mîndrimos le Raiehko, thai te dikhau Lehko Templo.

⁵Kă O avela mança ande Pesti çăra, ando des le kăznimahko, garavela ma tala e beli Lehka çărati, thai vazdela ma po kotorlebaŕăhko.

⁶Dikta kă i vazdel pe muŕo šero pa le dušmaia mîŕă, kai den ma angali: anaua jertfe ande çăra Lesti ando ašundimos la šingako, dilabaua thai lăudiua le Raies.

⁷Ašun ma, Raia, o mui kana akharau Tu: avel Tu mila mandar thai ašun ma!

⁸O illo phenel mangă anda e rig Tiri: „Rode o Mui Muŕo!” Thai o Mui Tiro, Raia, rodau!

⁹Na garau mangă Teo Mui, na durear xolleasa Te robos! Tu san o kandimos muŕo, na mekh ma, na telear mandar, Raia mîŕă skăpimahkă!

¹⁰Kă muŕo dadd thai mîŕî dei mekăn ma, ta o Rai lel ma.

¹¹Sîkau ma, Raia, o drom Tiro, thai sîkau mangă o drom kukoa o orta, anda e doši mîŕă dušmaiendi.

¹²Na mekh ma koa lašo čeailimos mîŕă dušmaiengo! Kă pa mande vazdinisai le varesar dikhlitorea xoxamne, thai varesar manuši, kai phurden dăsar mardimos.

¹³O! te na avino pateamno kă dikhaua o lašimos le Raiehko pe phuw kolengo le juvindengo! …

¹⁴Ajukăr ando Rai! Av zuralo, muršear teo illo, thai ajukăr ando Rai!