Read Kalderash Romani Cornilescu Bible 2020 (Romania) Psalmea 38 Bible Online

Psalmea 38 - Kalderash Romani Cornilescu Bible 2020 (Romania) bible

Psalmea 38

¹Khă psalmo le Davidohko. Andimahko godi. Raia. Demangă duma ande Ti xolli, thai na došarma ande Teo xolearimos.

²Kă le sîjeçi Tiră pusadepe ande mande, thai Teo vast mekăl pe pa mande.

³Či mai ašilea khanči sastevesto ando mas muŕo, anda e xolli Tiri; manai či khă zor andel kokala mîŕă, pala e bezex mîŕî.

⁴Kă mîŕă bikrisa vazden pe opral pa muŕo šero; Ssr khă baro pharimos, sî but phară anda mande.

⁵Le šindimata mîŕă khanden pharăs thai sî pherde patimos, pala muŕo dilimos.

⁶Sîm bandeardo, but dă but ašado; soro des phirau pherdo tristomos.

⁷Kă ăkh dukh phabardi šinel mîŕă poŕa, thai či mai ašilea khanči sastevesto ande muŕo mas.

⁸Sîm bi zorako, linčeardo biatărdimahko; o biujimos mîŕă illehko kărăl ma te çîpi.

⁹Raia, sa mîŕă kamblimata sî angla Tute, thai le roimata mîŕă nai Tukă biprinjeande.

¹⁰O illo marăl mangă iekhatar, e zor mekăl ma, thai lumina mîŕă iakhăndi manai mança.

¹¹Le amal thai le prinjeande mîŕă dureon mîŕa dukhatar, thai le neamuri mîŕă bešen rigate.

¹²Kola kai kamen te len mîŕî čivava tinzon pehkă astardimata; kola kai roden muŕo bibaxtalimos, phenen jungalimata, thai soro des kărăn athadimata.

¹³Ta me sîm sar khă kašuko, či ašunau; Sîm sar khă muto; kai či pîtărăl o mui.

¹⁴Sîm sar khă manuši, kai či ašunel, thai ando mui savehko nai či khă dimos anglal.

¹⁵Raia, ande Tute ajukărau; Tu desa anglal, raia, Devlla!

¹⁶Kă phenau: „Na mekh te bukurin pe le dušmaia mîŕă mandar, thai te denpe bară pa mande, kana muŕo punŕo perăla!”

¹⁷Kă sîm paše te perau, thai dukh mîŕî sî orkana angla mande.

¹⁸Phenau mîŕî bikris, dukhal ma mîŕa bezexatar.

¹⁹Ta le dušmaia mîŕă sî pherde čivava thai pherde zor; kola kai či dabadikhăn ma bičeačimahko, sî but koa dindimos.

²⁰On ambolden mangă nasul andoa mištimos, on nai mança, anda kă me phirau pala o mištimos.

²¹Na mekh ma, Raia! Devlla, Te na dureo mandar!

²²Av iekhatar ande muŕo kandimos, Raia, o Skăpimos muŕo!