Read Kalderash Romani Cornilescu Bible 2020 (Romania) Psalmea 40 Bible Online

Psalmea 40 - Kalderash Romani Cornilescu Bible 2020 (Romania) bible

Psalmea 40

¹Karing o maibaro le dilabaitorengo. Khă psalmo le Davidohko. Thodemas muŕo ajukărdimos ando Rai, thai O bandi'lo karing mande, ašundea mîŕă çîpimata.

²Ankaladea ma andai groapa le merimastii, anda O fundo la čikako; thodea mîŕă pînŕă po kotorlebaŕăhko, thai zureardea mîŕă pašea.

³Thodea mangă ando mui khă dilabaimos neo, khă lăudimos andoa Dell amaro. But dikhline e buti kadea, darai'le, thai pateaie pe ando Rai.

⁴Baxtalo le manušestar, kai thol pehko pateaimos ando Rai, thai sao či ortol pe karing kola le barimatăngă thai xoxamne!

⁵Raia, Devlla, but sî le šukarimata thai le planurea Tiră anda mande: khonikh našti ameal Tusa. Kamaua te vesti le thai te Šingarau le, ta o dindimos lengo sî but baro kaste phenau le.

⁶Tu na kames či jertfa, či pativ xabenesti, ta xîvardean mîŕă kan; či mangăs či phabarimos dă sa, či jertfa skăpimasrti.

⁷Atunčea phendem: „Dikhta ma kă avau! — ando papiro le lillehko sî ramome pa mande —

⁸kamau te kărau so Tu mangăs, Devlla! Thai e Kris Tiri sî ando fundo mîŕă illehko.

⁹Vestiu e mila Tiri, ando tidimos kukoa o baro; dikta kă či phandavau mîŕă ušt. Tu jeanes e buti kadea, Raia!

¹⁰Či nikrau ando illo muŕo e milla Tiri, ta vestiu o čeačimos Tiro thai o skăpimos Tiro, thai či garavau o lašimos thai o pateaimos Tiro ando tidimos kukoa o baro.

¹¹Tu, Raia, či atărdearăsa mangă le lašimata Tiră; ta o lašimos thai o pateaimos Tiro arakhăna ma orkana.

¹²Kă nasulimata bi dindimahko aven pe mande, arăsle ma le došalimata anda le bikrisa mîŕă; našti te mai răbdi lengo dikhlimos. Sî mai but sar le ball mîŕă šerăhkă, thai kovleol muŕo illo.

¹³Skîpisar ma, Raia! Av, Raia, iekhatar ando kandimos muŕo!

¹⁴Te aven lajavehkă thai perade, sa kola kai kamen te len mîŕî čivava! Te den parpale thai te lolleon lajavestar kola kai kamen muŕo xasarimos!

¹⁵Te ašen kašteardine lengă lajavestar, kola kai phenen mangă: „Ha! Ha!”

¹⁶Te bukurin pe thai te vesălin pe ande Tute sa kola kai roden Tu! Kola kai kamen o skăpimos Tiro te phenen bi atărdimahko: „Baro te avel o Rai!”

¹⁷Me sîm čioŕo thai lipsome, ta o Rai del Pe godi mande. Tu san o kandimos thai o skăpitorii muŕo: av iekhatar, Devlla!