Read Kalderash Romani Cornilescu Bible 2020 (Romania) Psalmea 55 Bible Online

Psalmea 55 - Kalderash Romani Cornilescu Bible 2020 (Romania) bible

Psalmea 55

¹Karing o mai baro le dilabaitorengo. Dă dilabaimos le instrumentença le koardença. Khă dilabaimos le Davidohko. Le godi, Devlla, koa rudimos muŕo, thai na garadio mîŕă rudimatăndar!

²Ašun ma thai de ma anglal! xasardiuau kote thai întea, thai kovleardiuau,

³andoa mui le dušmanohko thai andoa meklimos le nasulimatahko. Kă on šuden o bibaxtalimos pa mande, thai phirăn pala mande xolleasa.

⁴Isdral o illo ande mande, thai astarăl ma e dar le mullimasti,

⁵astarăl ma e dar thoa daraimos thai len ma le daraimata.

⁶Me phenau: „O, te avino ma le phaka le golumbohkă, sahkă xureau, thai sahkă arakhau varekai than xodinimahko!”

⁷E, sahkă našau dur dă sa, thai jeauas te bešeau ande pustia. (Atărdimos) .

⁸Sahkă našau iekhatar kakh garaimos la bravalleatar kadalatar thai le barăbrîšindestar kadalestar.

⁹Mudar le, Raia, xulau lengă šiba, kă ande četatea dikhau xolli thai čiungara;

¹⁰des thai reat on okolin pel zidurea: e bikris thai o nasulimos sî ande lengo kolin;

¹¹o nasulimos sî ando maškar lako, thai o čiorimos thai o athadimos nai le gor ande lakă pieçe.

¹²Na khă dušmano prasal ma, kă sahkă ŕăbdi: Na kukoa kai nai mança vazdel pe pa mande, kă sahkă garadiuau angla leste.

¹³Ta tu, kai dinauas tu iekh sar mança, tu, phral trušulehko thai amal mança!

¹⁴Ame, kai traisaras andekhthan ando čeailo amalimos, thai jeasas andekhthan le butimasa ando Khăr le Devllehko!

¹⁵Te avel o mullimos pa lende, thai te ulen dă juwinde ando than le mullimahko! Kă o nasulimos sî ande lengo than, ande lengo illo.

¹⁶Ta me çîpi karing o Dell, thai o Rai skăpila ma.

¹⁷Reate, droboitu thai koa dopaši le desăhko, xondi thai rovau, thai O ašunela muŕo mui.

¹⁸Skăpila ma andoa mardimos kai del pe pa mande, thai anela mangă e pačea, kă but mai sî pa mande!

¹⁹O Dell ašunela ma, thai mekălaletele, O, kai, ando veako, bešel po skamin Lehka raimahko. (Atărdimos) . Kă ande lende nai či khă ajukărimos paruglimahko, thai či daran le Devllestar.

²⁰On thon o vast pe kola kai trainas ande pačea lença, thai ušteaven pehko phanglimos.

²¹Lengo mui sî guglo sar e smîntîna, ta ando illo phiraven mardimos: le divanuri lengă sî mai isdrane sar o zetino, ta kana anklen on andoa mui, sî varesar săbii.

²²Tho ti bax ando vast le Raiehko, thai O nikrăla tu. O či mekăla tu čiăkhdata te perăl kukoa o bibezexalo.

²³Thai Tu, Devlla, ulearăsa le ando fundo la groapako. Le manuši trušale ratestar thai athaimastar, či arăsăna či o dopaši lengă desăngo. Ta me patea ma ande Tute!