Read Kalderash Romani Cornilescu Bible 2020 (Romania) Psalmea 76 Bible Online

Psalmea 76 - Kalderash Romani Cornilescu Bible 2020 (Romania) bible

Psalmea 76

¹Karing o maibaro le dilabaitorengo.Dilabaimahko le instrumentença le koardença. Khă psalmo le Asafohko.Khă dilabaimos. O Dell sî prinjeando ando Iuda, baro sî Lehko Anau ando Israelo.

²E çăra Lesti sî ando Salemo, thai o than Lehko ando Siono;

³oče linčeardea O le săjeçi, o skhuto, e sabia, thai le arme le mardimahkă. (Atărdimos)

⁴Tu san barimahko, mai zuralo sar le baŕlebară le čiorditorengă.

⁵Nandearde sas le zurale kodola pherde illehko, sutine e lindri le merimasti; Naštisarde te arakhăn pe, sa kodola manuši le zurale.

⁶Kai xolli Tiri, Devlla le Iakovohko, sutine i le grastarea thai i le grast.

⁷Sode dă daraimahko san Tu! Kon dašti te ašel angla Tute, kana astardeol Ti xolli?

⁸Phendean o mothodimos dă opral andal čerurii; e phuw izdraia thai ašili muto,

⁹kana vazdinisai'lo o Dell te kărăl čeačimos, thai te skăpil sa le bibaxtalen pai phuw. (Atărdimos)

¹⁰O manuši lăudil Tu orta i ande xolli lesti, kana xureaves Tu sa Te xollearimasa.

¹¹Kărăn solaxaimata le Devllehkă, tumară Devllehkă, thai pherăn le! Sa kola kai den Les roata, te anen pativa le Devllehkă kolehkă le daraimahko.

¹²O phagăl o barimos le raimatango, O sî daraimahko anda le thagar la phuweakă.