Read Kalderash Romani Cornilescu Bible 2020 (Romania) Psalmea 77 Bible Online

Psalmea 77 - Kalderash Romani Cornilescu Bible 2020 (Romania) bible

Psalmea 77

¹Karing o maibaro le dilabaitorengo. Pala o Iedutuno. Khă psalmo le Asafohko. Çîpi mîŕă mosa karing o Dell, çîpi mîŕă mosa karing o Dell, thai O ašunela ma.

²Ando des le năkazohko mîŕăhko, rodau le Raies; reate, mîŕă vast ašen tinzome biatărdimahko; muŕo duxo či kamel či khă răzgăimos.

³Anau mangă godi le Devllestar, thai Susini; Dau ma godi andră ande mande, Thai xolleaol muŕo duxo. (Atărdimos)

⁴Tu nikrăs mîŕă iakha pîtărde; thai, dă but so kovleardiuau, našti dau duma.

⁵Dau ma godi kal puranimata des, kal bărši kai nakhle. Dilea la reateakă, gîndi andră ande muŕo illo, perăl muŕo duxo andel gîndurea thai phenau:

⁶Daugodi ka mîŕă dilabaimata reate, daugodi andral ane muŕo illo, perăl muŕo duxo pel godimata thai phenau:

⁷„Šudela o Rai anda orkana? thai či mai avela O lašimasa?

⁸Isprăvisaio Lehko lašimos ando veako? Gălotar Lehko šinaimos anda orkana?

⁹Bîstărdea o Dell te mai aveles mila? Çîrdea O, ande xolli Lesti, parpale o iertimos?” (Atărdimos) .

¹⁰Atunčeara phenau mangă: „Kukoa so kărăl ma te dukhavel ma, sî kă e čeači Kolesti But Baro manai kodea”…

¹¹Ta sa lăudiua le butea le Raiehkă, kă anau mangă godi le šukarimatăndar Tirăndar kai sas mai anglal;

¹²e, daua ma godi ka sal butea Tiră, thai laua sama ka sal kărdimata Tiră.

¹³Devlla, le droma Tiră sî sfinçome! Sao Dell sî baro sar amaro Dell?

¹⁴Tu san o Dell, kai kărăs šukarimata; Tu sîkadean ti zor maškar le popoare.

¹⁵Anda Tiro vast, Tu skăpisardean Te poporos, le šeaven le Iakovohkă thai le Iosifohkă. (Atărdimos).

¹⁶Kana dikhle Tu le paia, Devlla, kana dikhle Tu le paia, izdraine, thai le andraimata zdrunčinisai'le.

¹⁷Le norea šordine pai la vadrasa, o trăsneto ašundi'lo andel norea, thai le săjeçi Tiră xureai'le ande sako riga.

¹⁸O bašlimos Tiro andea khă akhuvdi bari bravall, le trăsnimata străfeardine e lumea: e phue izdraia thai zdrunčinisa'li.

¹⁹Ortosardean Tukă ăkh drom andai marea, khă poteka andal bară paia, thai či prinjeaile Te pašea.

²⁰Nigărdean Te poporos sar ăkh kîrdo, andoa vast le Moisasko thai le Aaronohko.