Read Kalderash Romani Cornilescu Bible 2020 (Romania) Psalmea 78 Bible Online

Psalmea 78 - Kalderash Romani Cornilescu Bible 2020 (Romania) bible

Psalmea 78

¹Khă dilabaimos le Asafohko. Ašun, muŕo poporo, le sîkaimata mîŕă! Len sama kal divanuri mîŕă mohkă!

²Pîtrau muŕo mui thai dau duma andel pildea, vesti o xaraimos le čirurengo kai nakhle.

³So ašundem, so jeanas, so phendine amengă amară dadda,

⁴či garavasa lengă šavendar; ta vestisarasa le neamohkă le manušengă kai avena le lăudimata le Raiehkă, e zor Lesti, thai le šukarimata kai kărdea le.

⁵O thodeas khă phendimos ando Iakovo, dea ăkh kris ando Israelo, thai mothodea amară daddengă te sîkaven pehkă šeaven ande late,

⁶kaste avel prinjeandi kolendar kai avena pala lende, le šeavendar kai kărdeona pe, thai save, kana kărdeona bară, te den duma pa late lengă šeavengă;

⁷anda kadala te thon sa pehko pateaimos ando Dell, thai te arakhăn Lehkă mothodimata.

⁸Te na aven, sar pehkă dadda, khă viça bi ašundimahko thai amboldino, khă viça, kai nai la khă illo zuralo, thai savehko duxo nai pateamno ando Dell!

⁹Le šeave le Efraimohkă, înarmome thai çîrdindoi le arkosa, dine le zăia ando čiro le mardimahko,

¹⁰anda kă či nikărdine o phanglimos le Devllehko, thai či kamble te phirăn orta pala Lesti Kris.

¹¹Dine bîstărimos Lehka buteakă, le šukarimatăngă Lehkă, kai sîkadeasas lengă.

¹²Angla lengă dadda, O kărdeasas šukarimata ando čem le Ejiptohko, ando islazo o Çoano.

¹³Xuladea e marea, thai pîtărdea lengă drom anda late, vazdindoi le paia sar khă zîdo.

¹⁴Phiradea le desă khă norosa, thai sai reat la luminasa kha iagati străfeaime.

¹⁵Šindea kotoralebaŕăhkă ande pustia, thai dea le te pen sar anda varesar valurea bute paiença.

¹⁶Kărdea te xuten isvoare andal kotoralebaŕăhkă, thai te thavden sar varesar nanilašurea.

¹⁷Ta on sa či atărdile te na Bezexarăn angla Leste, či atărdile te vazden pe pa Kukoa But Baro ande pustia.

¹⁸Zumade le Devlles ande lengo illo, manglindoi xabe pala lengă kamblimata.

¹⁹Dine duma poa Dell, thai phendine: „Ta daštila o Dell te thol ăkh skafidi ande pustia?

²⁰Dikta, kă O maladea o kotorlebaŕăhko, ta thavde paia, thai šordi'le bigorăhko. Ta daštila O te del i manŕo, or te anel mas Pehkă poporohkă?”

²¹O Rai ašundea, thai xoleai'Lo. Khă iag astardi'li poa Iakovo, thai avili poa Israelo Lesti xolli,

²²anda kă či pateaine ando Dell, anda kă nas le pateamos ande Lehko kandimos.

²³O mothodea le norengă opral, thai pîtărdea le udara le čerurengă:

²⁴dea brîšind pa lende manasa xabenesti, thai dea le div andoa čerii.

²⁵Xaline saoŕă o manŕo kolengo le barăngo, thai tradea lengă xabe te čeaileon.

²⁶Thodea te phurdel andel čerurii e bravall kataranklelokham, thai andea, anda Pesti zor, e bravall kataravelodes.

²⁷Dea brîšind pa lende masăsa sar e poši, thai čiriklea phakănça, sode e tišai la mareati;

²⁸kărdea lengă te perăn ando maškar lengă çărengo, anda sa le riga lengă thanengă.

²⁹On xale thai pravardi'le pe čeailimaste: o Dell dea le so kablinesas.

³⁰Ta či astardesas te sîmpărin mišto pehko poftimos, o xabe sas doară ande lengo mui,

³¹kana avili e xolli le Devllesti pa lende, maladea le merimasa le mai zuralen anda lende, thai peradea le tărnen le Israelohkărăn.

³²Sa kadalença, on či atărdi'le te bezexarăn, thai či pateaine ande Lehkă šukarimata.

³³Anda kodea, O šindea lengă des khă phurdimasa, šindea lengă bărši andekh gor iuçîmahko.

³⁴Kana malavelas le mullimasa, on rodenas Les, amboldenas pe thai ortonas pe karing o Dell;

³⁵anenas pehkă godi kă o Dell sî lengo Kotorbaŕăhko, thai kă o Dell Aseazuralo sî o Skăpitorii lengo.

³⁶Ta athavenas Les le mosa, thai xoxavenas Les la šibasa.

³⁷Lengo illo nas lengă zuralo angla Leste, thai nas pateamne le phanglimahkă Lehko.

³⁸Varesar, ande mila Lesti, O iertil o bibezexalimos thai či mudarăl; butivar atărdearăl Pesti xolli thai či del drom sa Pehko xollearimos.

³⁹O andea pehkă godi kă on či sas dă sar mas, khă phurdimos kai nakhăl thai či mai amboldel.

⁴⁰Sodivar vazdinisai le on pa Leste Ande pustia! Sodivar xolleardine Les on ande pustietatea!

⁴¹E, či atărdi'le te zumaven le Devlles, thai te xollearăn le Sfîntones le Israelohkărăs.

⁴²Či mai andine pehkă godi andai zor Lesti, andoa des, kana skăpisardea le ăl dušmanostar,

⁴³le šukarimată kai kărdea le ando Ejipto, thai le semnurendar mîndrimahkă andoa islazo o Çoano.

⁴⁴Sar paruglea lengă nanilašuri ando rat, thai našti mai pile pai anda lengă paia.

⁴⁵Sar tradea pa lende varesar mačea otrăvime, kai xalele, thai xuteamnea, kai xasardele.

⁴⁶Sar dea lengă diva xamos le termengă, thai o rodo lenga buteako xamos le grastengălačeareakă.

⁴⁷Sar čioŕardea lengă răza, mardindoi le baŕăsa, thai le smoitinuri andoa Ejipto le brîšindebaŕănça.

⁴⁸Sar muklea lengă guruwen ando brîšindlebaŕăhko. Thai le kîrduri ande iag le čeresti.

⁴⁹O šudea pa lende Pesti xolli e astardi, O xollearimos, o iuçîmos thai o năkazo: khă kîrdo înjerengo andimahkă le bibaxtalimatăngă.

⁵⁰Sar dea drom orta e xolli, či skăpisardea lengo duxo katoa merimos, thai dea lendi čivava orta le mullimahkă;

⁵¹sar maladea le anglal kărdinen andoa Ejipto, e anglal zor andel çăre le Xamohkă.

⁵²Sar telerdea Pehkă poporosa sar varesar bakrea, thai nigărdea le sar iekh kîrdo ande pustia.

⁵³Sar nigărdea le bi či kha grijako, kaste na mai avel lengă dar, ta e marea garadea lengă dušmaien.

⁵⁴Sar andea le pe phuw Lesti e sfînto, karing o baŕbaro kadoa, kai e čeači Lesti lea les.

⁵⁵Sar našadea le neamuren angla lende, xuladea lengă o čem andel riga le mandimatahkă, thai thodea le semençii le Israelohkă te bešen ande lengă çăre.

⁵⁶Ta on zumade le Devlles But Barăs, vazdinisai'le pa Leste, thai či nikărdine Lehkă mothodimata.

⁵⁷Ta duri'le thai sas bipateamne, sar pehkă dadda, dine pe rigate, sar khă arko athaimahko.

⁵⁸Xollearde Les andal učimata lengă, thai astardine e jelozia pehkă idolença.

⁵⁹O Dell ašundea, thai xoleai'Lo, thai dea arman jungales dăsa le Israelos.

⁶⁰Meklea Pehko than andoa Silo, e çăra kai bešelas maškar le manuši.

⁶¹Thai dea e slava lini la robiakă, thai o barimos Lehko ando vast le dušmanohko.

⁶²Dea e zor la sabiati pa Pehko poporo, thai xollea'lo po mandimos Lehko.

⁶³Lehkă tărnen phabardea le e iag, thai le šeiabarea manas andel desalebară dilleança abeaohkă.

⁶⁴Lehkă raša peline mudarde la sabiatar, thai le phiwlea lehkă či mai ruine.

⁶⁵Atunčeara o Rai ušti'lo, sar iekh kai suto, sar khă zuralo matiardo molleasa,

⁶⁶thai maladea Pehkă dušmaien, kai našenas, garadindoi le prasaimasa vešniko.

⁶⁷Ta šudea e çăra le Iosifosti, thai či alosardea e semençia le Efraimosti;

⁶⁸ta alosardea e semençia le Iudasti, o baŕbaro le Sionohko, kai kamel les.

⁶⁹Thai vazdea o sfînto than sar le čerururea dă učio, thai zuralo sar e phuw, kai kărdea les ando veako.

⁷⁰Alosardea Pehkă robos le Davidos, thai lea les katai stîna le bakreandi.

⁷¹Lea les pala le bakrea, kai denas thud, kaste nigrăl kai čear Lehkă poporos le Iakovos, thai po mandimos Lehko le Israelos.

⁷²Thai o Davido nigărdea le khă illesa bibezexalo, thai phiradea le vastença jeangline.