Read Kalderash Romani Cornilescu Bible 2020 (Romania) Psalmea 83 Bible Online

Psalmea 83 - Kalderash Romani Cornilescu Bible 2020 (Romania) bible

Psalmea 83

¹Khă dilabaimos. Khă psalmo le Asafohko. Devlla, na ašimuto! Na ašimuto, Ta na xodinisao, Devlla!

²Kă dikta kă le dušmaia Tiră kovleardeon pe, thai kola kai čidabadikhăn Tu vazden o šero.

³Kărăn planurea pherde čiorimata pa Teo poporo, thai den pe duma pa kola nikărdine Tutar.

⁴„Aven”, phenen on „te mudaras le andoa maškar le neamurengo kaste na mai phendeol pe o anau le Israelohko.

⁵Tiden pe saoŕă khă illesa, kărăn phanglimos pa Tute:

⁶le çăre le Edomohkă thai le Ismaleiçea, o Moabo thai le Xagareniçea,

⁷o Ghebal, o Amon, o Amalek, le Filistenea le manušença le Tirohkărănça.

⁸E Asiria tidel pe i oi lença, thai del unjile pehko vast le šeavengă le Lotohkă. (Atărdimos).

⁹Kăr lengă sar le Madianohkă, sar le Siserahkă, sar le Iabinohkă koa paioro le Chisonohko,

¹⁰kai sas mudarde ando En-Doro, thai arăsle khă gošni la phuweakă.

¹¹Le šerălebarăngă lengă kăr lengă Sar le Orebohkă thai le Zeebohkă, Thai sa le raimatăngă lengă sar le Zebaxohkă thai le Çalamunahkă!

¹²Kă on phenen: „Te thoas o vast pe le thana le Devllehkă!”

¹³Devlla, kăr lengă sar e bravall la pošati, sar o sulum lino la bravalleatar,

¹⁴sar e iag kai phabarăl o văši, thai sar e para, kai astarăl le Baŕlebară!

¹⁵Phir pala lende Te barăbrîšindesa, thai šu e dar ande lende Tea bravalleasa!

¹⁶Garav lengo mui lajavesa, kaste roden Teo Anau, Raia!

¹⁷Te aven lajavehkă thai darardine ando veako, te lolleol lengo mui lajavestar, thai te xasaon!

¹⁸Kaste jeanen kă dăsar Tu, savehko Anau sî o Dell, Tu san Kukoa But Baro pe sai phuw;