Read Kalderash Romani Cornilescu Bible 2020 (Romania) Le Pilde 1 Bible Online

Le Pilde 1 - Kalderash Romani Cornilescu Bible 2020 (Romania) bible

Le Pilde 1

¹Le pilde le Solomonohkă, o šeau le Davidohko, o thagar le Israelohko,

²andoa prinjeandimos le xaraimahko thai le sîkaimahko, andoa atearimos le divanurengo la godeakă;

³anda o limos le sîkaimatăngo le laše atearimahko, le čeačimahko, la krisako thai dăbibandimahko;

⁴kaste del kolen bizumade xaraimos godeako, le tărnes prinjeandimos krisînimahko,

⁵te ašunel ta i o xarano, thai barearăla pehko prinjeandimos, thai i kukoa o prinjeando, lela pehko sîkadimos

⁶andoa astarimos le atearimahko kha pildako or khă divanohko andral, o atearimos le divanurengo le xaranengo thai le divanurengo lengo janglimasa.

⁷E dar le Raiestar sî o anglal le prinjandimahko; ta le dile či len sama o xaraimos thai o sîkaimos.

⁸Ašun, šava, o sîkaimos te daddehko, thai na šude le sîkadimata tea dakă!

⁹Kă on sî sar khă kununa mundro pe teo šero, thai khă lanço sumnakuno ka ti koŕ.

¹⁰Šeaua, kana varesar bezexale kamen te athaven tu, na mekh tu lino lendar!

¹¹Kana phenena tukă: „Av amença! Av te tinzosaras astardimata kaste šoras rat, te tinzosaras bi čeačimahko phalea kolehkă le bidošalehkă;

¹²av te nakhavas le dă juvinde, sar o than le mullengo, thai orta, sar kola kai ulen ande groapa;

¹³arakhasa sako moda buteandi kuči, Thai pherasa amară khăra buteandar;

¹⁴avela tu i tut ti rig orta sar amende, khă straiça avela ame saoŕăn!”

¹⁵šeava, te na telearăs po drom lença, durear teo punŕo pa lengo drom!

¹⁶Kă lengă pînŕă prasten koa nasul, thai iuçîn te šorăn rat.

¹⁷Ta dă iveantaină šudel pe e phal angla le iakha sal čirikleangă;

¹⁸kă on tinzon astardimata orta pa pehko rat, thai lengă duxohkă tinzon lehkă phalea.

¹⁹Kadea sî e bax sa kolengo xarvalea valosohkă: o xarvalimos anel o xasardimos kolengo kai de pe leste.

²⁰O xaraimos çîpil pel uliçî, vazdel pehko mui andel piaçuri:

²¹çîpil kai sî o ašundimos mai baro; kal udara, ande četatea, phenel lehkă divanuri:

²²„Ji kana kamena o dilimos, dilalelor? Ji kana čeailola tume le prasaimata le prasaimazorehkă thai či dabadikhăna le dile o prinjeandimos?

²³Ambolden tume te ašunen mîŕă xamata! Dikta, šoraua o duxo muŕo pa tumende, kăraua tumengă prinjeande mîŕă divanuri…

²⁴Anda kă me akharau tume thai tume dentume parpale, anda kă tinzo muŕo vast thai khonikh či lel sama,

²⁵anda kă šuden sa le phendimata mîŕă, thai či čeaileol tume mîŕă xamata,

²⁶anda kodea i me, asaua kana avena ande vo khă bibaxtalimos, maraua mangă khălimos tumendar kana astarăla tume e dar,

²⁷kana astarălas tume e dar sar khă bravall, thai kana patearăla tume o bibaxtalimos sar khă vîrtejo, thai kana dela pa tumende o năkazo thai o stradimos.

²⁸Atunčea akharăna ma, thai či daua anglal; rodena ma, thai či arakhăna ma.

²⁹Anda kă čidabadikhle o prinjeandimos, thai či alosarde e dar le Raiestar,

³⁰anda kă či kambline le divanuri mîŕă, thai či line sama sa mîŕă xamata.

³¹Anda kodea čeaileona la roadasa lengă phirimatăngo.

³²Kă o nikărdimos le dilengo mudarăle, thai o ujimos le čealadengo xasarăle;

³³ta kukoa kai ašunel ma bešela bi te lel sama, traila ando ujimos thai bi darako anda vo khă nasulimos.