Read Kalderash Romani Cornilescu Bible 2020 (Romania) Le Pilde 12 Bible Online

Le Pilde 12 - Kalderash Romani Cornilescu Bible 2020 (Romania) bible

Le Pilde 12

¹Kon kamel o xallimos, kamel o jeanglimos; ta kon čidabadikhăl o xallimos, sî khă dillo.

²O manuši le mištimahko lel o lašimos le Raiehko, ta o Rai krisînil koles pherdo nasulimos.

³O manuši či zureaol andoa jungalimos, ta o angluno kolengo bibezexale či mištila pe.

⁴Khă juwli pativali sî e kununa lakă romesti, ta kutea kai kărăles lajavehko sî sar o ternimos andel kokala lehkă.

⁵Le gîndurea kolengă bibezexale sî dăsar čeačimos, ta le divanuri kolengă le jungalengă nai dăsar athadimos.

⁶Le divanuri kolengă le jungalengă sî sar varesar astardimata te šorăn rat, ta o mui kolengo bi bezexako skăpile.

⁷Kola le jungale sî dinemuial, thai či mai avena, ta o khăr kolengo le bibezexalengo ašel ande pînŕănde!

⁸Khă manuši sî kučeardo pala o măsurimos lehkă prinjeandimahko, ta kukoa le illesa rimome sî bidikhlino.

⁹Mai mišto te aves meklinotelal thai te avel tu khă kandimahko, dă sar te kărăs po baro thai te na avel tu so te xas.

¹⁰Kukoa o bibezexalo fales nasul le jivinendar, ta o illo kolehko le jungalehko sî bi milako.

¹¹Kon kărăl buti ka pesti phuw avela les bravalimos manŕăhko, ta kon phirăl palal butea khančehkă sî bi godeako.

¹²Kukoa o jungalo del pe kai buti kolengo bikrisako, ta o angluno kolengo bibezexale rodil.

¹³Ando bezexalimos le uštença sî khă astardimos čioŕîmahko, ta kukoa o bibezexalo skăpil andai čiungar.

¹⁴Andoa rodo le mohko čeaileoles lašimatăndar, thai sakogodi lel palai buti lehkă vastendi.

¹⁵O drom le bičealadehko sî bi bezexako angla lehkă iakha, ta o xarano ašunel le phendimata.

¹⁶O čealado andakhdata del po mui lesti xolli, ta o xarano garavel o prasaimos.

¹⁷Kon phenel o čeačimos kărăl khă mothodimos čeačio, ta o dikhlitorii o xoxamno delduma athaimos.

¹⁸Kon delduma ando tipo o lesno, dukhavel sar o pusaimos kha sabiako, ta e šib le xaranendi anel sasteardimos.

¹⁹O ušt kai phenel o čeačimos sî zureardo ando veako, ta e šib e xoxamni či ašel dăsar ăkh leako.

²⁰O athaimos sî ando illo kolengo kai den godi o nasulimos, ta o bukurimos sî anda kola kai phenen o împătimos.

²¹Či khă bibaxtalimos či kărdeol kolehkă le bibezexalehkă, ta kola le jungale sî astardine nasulimatăndar.

²²Le ušt le xoxamne sî bidikhline le Raiehkă, ta kola kai kărăn buti čeačimasa sî Lehkă čeailimahkă.

²³O manuši o xarano garavel pehko jeanglimos, ta o illo le čealadengo vestil o čealadimos.

²⁴O vast kolengo le vrenikurengo stăpînila, ta o vast le khandinengo potinela biro.

²⁵O biujimos andoa illo le manušehko peraveles, ta khă orba laši vesăliles.

²⁶Kukoa o bibezexalo sîkavel pehkă amalehkă o drom o lašo, ta o drom le jungalengo nigrăl le ando xasardimos.

²⁷O khandino či pekăl pehko vînato, ta o mandin le kučimahko khă manušehko sî e buti.

²⁸Po drom le bibezexalimahko sî e čivava, thai po drom sămnome latar nai merimos.