Read Kalderash Romani Cornilescu Bible 2020 (Romania) Le Pilde 14 Bible Online

Le Pilde 14 - Kalderash Romani Cornilescu Bible 2020 (Romania) bible

Le Pilde 14

¹E juwli e xaraii vazdel pehko khăr, ta e juwli e čealadi peraveles orta oi pehkă vastença.

²Kon phirăl le bibezexalimasa, daral le Raiestar, ta kon astarăl pel droma bangă, či šol Les sama.

³Ando mui le čealadehko sî khă ŕai anda Lehko barimos, ta le xaranen arakhăn lengă ušt.

⁴Kai nai guruw, e ieslea axšel nandi, ta e zor le guruwendi anel bravalimos rodengo.

⁵Khă dikhlitorii pateamno či xoxavel, ta khă dikhlitorii xoxamno phenel xoxaimata.

⁶O prasaitorii rodel o xaraimos ta či arakhăles, ta anda o manuši o prinjeando o jeanglimos sî khă buti lesno.

⁷Dureao le čealadestar, kă na pe lehkă ušt arakhăsa o jeanglimos.

⁸O xaraimos le manušehko xarano kărăles te dikhăl pe sao drom te phirăl. Ta o čealadimos kolengo le bidinde athavel orta len.

⁹Kola le bidinde khălen pehkă la bezexasa, ta maškar kola la bibezexako sî lašokamimos.

¹⁰O illo prinjeanel pehkă năkazurea, thai či khă străino našti amil pe ande lehko bukurimos.

¹¹O khăr kolengo le jungalengo avela xasardo, ta e çăra kolendi le bibezexalendi lulludearăla.

¹²But droma dašti fal laše le manušehkă, ta mai palal dičiol pe kă nigrăn koa merimos.

¹³Butivar orta ando maškar le asamahko o illo dašti avel xolleardo, thai o bukurimos dašti del koa gor năkazostar.

¹⁴Kukoa le illesa xasardo čeaileol pehkă dromendar, thai o manuši le mištimastar čeaileol i o dă sostar sî ande leste.

¹⁵O manuši lesno pateamno pateal orsao divano, ta o manuši o xarano lel sama mišto sar phirăl.

¹⁶O xarano daral thai dureol kata o nasul, ta o bidindo sî fălome thai bi darako.

¹⁷Kon sî iekhatar kai xolli kărăl dillimata, thai o manuši pherdo nasulimos kărdeol bidikhlino.

¹⁸Kola le dile sî le rig čealaimastar, ta le manuši le xarane sî kununime jeanglimasa.

¹⁹Kola le jungale bandeon angla kola le laše, thai kola bikrisako anglal udara kolehkă le bibezexalehkă.

²⁰O čioŕo sî bidikhlino orta i lehkă amalostar, ta o bravalo sî les but amal.

²¹Kon či dabadikhăl pehkă pašes kărăl khă bezex, ta baxtalo kas sî les mila anda koal le bibaxtale.

²²Ande čeačimaste kola kai gîndin nasul xasardeon, ta kola kai gîndin mišto butearăn mištimasa thai pateaimasa.

²³Orkai kărdeo buti sî i valoso, ta orkai dăsar delpeduma, sî lipsomos.

²⁴O bravalimos sî khă kununa anda kola le xarane, ta koa le bidinde nai le avervareso dă sar čealadimos.

²⁵O dikhlitorii kai phenel o čeačimos skăpil duxurea, ta kukoa le athaimahko phenel xoxaimata.

²⁶Kon daral le Raiestar sî les khă nikărimos zuralo ande Leste, thai lehkă šeaven sî le ăkh than garaimahko ande Leste.

²⁷E dar le Raiestar sî khă isvoro čivavako, oi arakhăl ame le astardimatăndar le mullimahkărăndar.

²⁸O butimos le poporohko sî e slava le thagaresti, O lipsomos le poporohko sî o xasardimos le voievodohko.

²⁹Kon sî lokăs kai xolli sî les but prinjeandimos, ta kon astardeol iekhatar kărăl but dillimata.

³⁰Khă illo ujeardo sî e čivava le statosti, ta e xolli sî o ternimos le kokalengo.

³¹Kon mekăltelal le čioŕăs, prasal pehkă Vazditores, ta kas fal nasul kolestar kai nai les, del pativ pehkă Vazditores.

³²Kukoa o nasul sî perado lehkă nasulimastar, ta kukoa o bibezexalo orta i koa merimos çîrdel ajukărimos.

³³O xaraimos xodinil ande khă illo prinjeando, ta ando maškar kolengo bidinde o del pe anglal.

³⁴O bibezexalimos vazdel khă poporos, ta e bezex sî o lajau le popoarăngo.

³⁵Khă thagar sî les čeailimos khă kanditorestar xarano, ta kukoa le prasaimahko, azbales e xolli lesti.