Read Kalderash Romani Cornilescu Bible 2020 (Romania) Le Pilde 17 Bible Online

Le Pilde 17 - Kalderash Romani Cornilescu Bible 2020 (Romania) bible

Le Pilde 17

¹Mai mišto khă kotor manŕo šuko, pačeasa, dă sar ăkh khăr pherdo masa, xoleasa!

²Khă sluga godeasa stăpînil poa šeau kai kărăl lajeau, thai xulavela o mandimos pehkă phralença.

³E tigaia lămuril o rup, thai o bou lămuril o sumnakai; ta kukoa kai zumavel le ille, sî o Rai.

⁴Kukoa o nasul ašunel limasa godi ka kukoa le uštesa bikrisako, thai o xoxamno bandearăl o kan kai šib le xasardimasti.

⁵Kon marăl pehkă khălimos le čioŕăstar, marăl pehkă khălimos Kolestar kai kărdea les; kon bukuril pe anda khă bibaxtalimos, či ašela bidošalo.

⁶Le šeave le šeavengă sî e kununa le phurăndi, thai le dadda sî e slava lengă šeavendi.

⁷Le divanuri le alosarde či lašaon ando mui khă čealadehko; sodesa mai xançî le divanuri xoxamne ando mui khă manušehkă andai viça alosardi!

⁸Le pativa amean khă baŕ kuči ande Ll iakha kolengă kai len le: or karing ambolden pe, izbutin.

⁹Kon garavel khă athadimos, rodel o kamblimos, ta kon pheneles orkana ande pehkă divanuri, durearăl le amalen.

¹⁰Khă xamos šol pe mai but ande khă manuši prinjeandimahko, dă sar ăkh šell maladimata ande kukoa o čealado.

¹¹Kukoa o nasul či rodel dăsar čiungar, ta khă solo bi milako avela tradino pa leste.

¹²Mai mišto te arakhăs khă rišni line latar lakă puien, dă sar khă čealado ando čealadimos lehko.

¹³Kukolehkă kai amboldel nasul andoa mišto, či mekăla o nasulimos lehko khăr.

¹⁴O gor kha čiungarako sî sar o dimosdrom une paiengo; andakodea, atărdear e čiungar anglal te astardeol.

¹⁵Kukoa kai iertil le došales thai došarăl le bidošales, sî lidui khă prikăjimos angloa Rai.

¹⁶Ka soste kandel o rup ando vast le čealadehko? Te tinel o xaraimos? …Ta nai les godi.

¹⁷O amal o čeačio kamel orkana, thai ando bibaxtalimos arăsăl sar khă phral.

¹⁸O manuši bi godeako del sumadimos, thol pe sumadi anda pehko pašo.

¹⁹Kon kamel le zaia kamel e bezex, thai kon vazdel pesti poarta but učii, rodel pehko xasardimos.

²⁰Kukoa le illesa bičeačio či arakhăl o baxtalimos, thai kukoa la šibasa rimome perăl ando bibaxtalimos.

²¹Kon del kărimos khă čealadehkă avela les tristomos, thai o dadd khă čealadehko našti bukuril pe.

²²Khă illo vesălo sî khă lašo leako, ta khă duxo xolleardo šutearăl le kokala.

²³Kukoa o nasul lel pativa pe garaimaste, kaste amboldel le droma le čeačimahkă.

²⁴O xaraimos sî ando mui le manušehko prinjeando, ta le iakha le čealadehkă roden les koa gor la phuweako.

²⁵Khă šeau čealado anel năkazo pehkă daddehkă, thai kărtimos kolakă kai kărdea les.

²⁶Nai mišto te došaves koles le bibezexales kakh gloaba, či te malaves koles le neamostar alosardo anda e zan lengă bibezehalimahkă.

²⁷Kon lopînzîl pehkă orbe, prinjeanel o jeanglimos, thai kas sî les o duxo kovlo sî khă manuši prinjeando.

²⁸Orta i khă dillo nakhăla xarano te ašelamuto, thai dă prinjeando te nikrăla pehko mui.