Read Kalderash Romani Cornilescu Bible 2020 (Romania) Le Pilde 2 Bible Online

Le Pilde 2 - Kalderash Romani Cornilescu Bible 2020 (Romania) bible

Le Pilde 2

¹Šeaua, te lesa le divanuri mîŕă, te garavesa tusa le sîkadimata mîŕă,

²te lesa godi koa xaraimos, thai te bandearăsa teo illo koa prinjeandimos;

³kana mangăsa xaraimos, thai kana rudisa tu andoa prinjeandimos,

⁴te rodesa les sar le rupes, thai phirăsa pala leste sar pala khă mandimos,

⁵atunčea atearăsa e dar le Raiestar, thai arakhăsa o prinjeandimos le Devllehko.

⁶Kă o Rai del xaraimos; Anda Lehko mui anklel prinjeandimos thai atearimos.

⁷O del skăpimos kolen bibezexako, del khă skuto kolen kai phirăn ando bidošalimos.

⁸Nikăr le droma le bibezexalimahkă, thai arakh o drom Lehkă pateamnengo.

⁹Atunčeara atearăsa o čeačimos, e kris, o biathaimos, sal droma kai nigrăn koa mištimos.

¹⁰Kă o xaraimos avela ando illo tiro, thoa prinjeandimos avela o čeailimos te duxohko;

¹¹o jeanglimos avela pa tute, o prinjeandimos arakhăla tu,

¹²kaste skăpil tu le dromestar le jungalestar, le manušestar kai nikrăl divanuri rimome;

¹³kolendar kai mekăn le droma le čeačimahkă, kaste phirăn pel droma le tunerikohkă;

¹⁴kai bukurin pe te kărăn nasul, thai thon pehko čeailimos ando nasulimos,

¹⁵kai phirăn pel droma bangă, thai astarăn pel droma amblade;

¹⁶kaste skăpintu i la romneatar avrăhkăreatar, i la străinatar, kai phenel divanuri astardimahkă,

¹⁷kai mekăl ăl romes pehkă tărnimahko, thai bîstrăl o phanglimos lakă Devllehko.

¹⁸Kă lako khăr ulel koa merimos, thai o drom lako nigrăl ka kola le mulle:

¹⁹či iekh kai jeal late či mai amboldel, thai či mai arakhăl o drom la čivavako.

²⁰Anda kodea, tu te phirăs po drom le manušengo dă mišto, thai te nikrăs le droma kolengă le bibezexalengă!

²¹Kă le manuši bibezexako bešena ando čem, thai le manuši bidošako ašena ande leste;

²²ta kola le jungale avena xasardine andoa čem, thai kola bipateamne avena ankalade anda leste.