Read Kalderash Romani Cornilescu Bible 2020 (Romania) Le Pilde 22 Bible Online

Le Pilde 22 - Kalderash Romani Cornilescu Bible 2020 (Romania) bible

Le Pilde 22

¹Khă anau lašo sî mai kamblino dă sar khă bravalimos baro, thai te aves kamblino kučearăl mai but dă sar o rup thai o sumnakai.

²O bravalo thai o čioŕo arakhadeon: o Rai kărdea i iekhăs i le kovrăs.

³O manuši o xarano dikhăl o bibaxtalimos thai garadeol, ta kola le dille jean angle thai sî došalde.

⁴O potindimos le meklimahkotelal, la darati le Raiestar, sî o bravalimos, e slava thai čivava.

⁵Kanŕă thai astardimata sî po drom le manušehko le rimomenehko: kukoa kai arakhăl pehko duxo dureol lendar.

⁶Sîkau le šaoŕăs o drom kai trăbul te phirăles, thai kana phureola, či dureola lestar.

⁷O bravalo stăpînil pa kola le čioŕă, thai kukoa kai lel unjile, sî o robo kolehko kai del unjile.

⁸Kon thol bikris, bikris tidela, thai e ŕai la bikrisati lesti sî koa gor.

⁹O manuši kai fales nasul avela dinodumadămišto, anda kă del le čioŕăs anda pehko manŕo.

¹⁰Našau le prasaimatores, thai e čiungar jealatar, le biateardimata thai le prasaimata atărdeona.

¹¹Kon kamel o ujimos le illehko, thai sî les lašimos pel ušt, sî amal le thagaresa.

¹²Le iakha le Raiehkă arakhăn koles kai sî les jeanglimos, Ta atărdearăl le divanuri kolehkă le rimomenehkă.

¹³O khandino phenel: „Avri sî khă leo, kai dašti mudarăll ma po drom!”

¹⁴O mui le kurvengo sî khă groapa andră; kas kamel te došarăl les o Rai, kodoa perăl ande late.

¹⁵O čealadimos sî astardo le illestar le šaoŕăhkărăstar, ta e raii le xamasti pîtărălala lestar.

¹⁶Kon thol po čioŕo kaste barearăl pehko bravalimos, avela te del i o avrăhkă mai bravalo thai nigrăla lipsomos.

¹⁷Bandear teo kan, thai ašun le divanuri le xaranengă, thai le o sîkaimos muŕo ando illo.

¹⁸Kă sî mišto te nikrăs le ande tute, thai te aven tukă sa ăkhdata pel ušt.

¹⁹Anda kaste thos teo pateamos ando Rai, kamau te sîkavau tu me ades, e, tut.

²⁰Či lašardem me kadea ando ramomos anda tute phendimata thai sîkadimata,

²¹kaste sîkavau tu butea zuralea, divanuri čeačimahkă, kaste desanglal orbença čeačimahkă kolehkă kai tradel tu?

²²Na le poa čioŕo, anda kă sî čioŕo, thai na thopharimos po bibaxtalo kai bešel koa udar!

²³Kă o Rai nikrăla lendi buti, thai lela e čivava kolendi kai lena pa lende.

²⁴Na amalisao le manušesa le xolleardesa, thai na phir le manušesa iekhatar kai xolli,

²⁵ta na varesar te sîteos lehkă astardimos andoa duxo.

²⁶Na av maškar kola kai thon sumadimata, maškar kola kai den kamăta andal unjilimata.

²⁷Kă kana nai sosa te potines, anda soste kamesa te lel pe teo pato tala tute?

²⁸Na mutisar e phuw e puraii, kai thodela te dadda.

²⁹Kana dikhăs khă manuši lašo ande pesti buti, kodoa dašti bešel pašal thagar, na pašal manuši širohkă.