Read Kalderash Romani Cornilescu Bible 2020 (Romania) Le Pilde 23 Bible Online

Le Pilde 23 - Kalderash Romani Cornilescu Bible 2020 (Romania) bible

Le Pilde 23

¹Kana bešes kai skafidi anda iekh anda kola le bară, le sama so sî tu anglal:

²tho tukă khă šuri ande koŕ, kana san but xarvalo.

³Na kam le xabenata lehkă le alosarde, kă sî khă xamos athadimahko.

⁴Na tinuisao kaste bravaos, na tho teo prinjeandimos ande kadoa.

⁵Dăsar so šudean te iakha pe leste thai manai; kă o bravallimos kărăl pehkă phaka, thai, sar o vulturo, lel pehko xureaimos karing le čerurii.

⁶Na xa o manŕo kolehko čiungarako, thai na kam lehkă xabenata le alosarde,

⁷kă o sî sar iekh kai kărăl pehkă dindimata ando duxo. „Xa thai pi”, phenel tukă o; ta o illo lehko nai tusa.

⁸O kotor kai xalean les, šadesa les, thai le čeaile divanuri kai mothosa e, avena xasarde.

⁹Na de duma koa kan khă čealadehkă, kă o čidinel le divanuri tiră le xaraimahkă.

¹⁰Na mutisar e phuw la phiwleati, na šutu ande phuw le bidaddengo,

¹¹kă o amboldintorii lengo sî zuralo: O nikrăla lendi buti pa tute.

¹²Pîtăr teo illo koa sîkaimos, thai le kan kal divanuri le jeanglimahkă.

¹³Na derigate le šaoŕăs kata o xallimos, kă te malavesa les la ŕaiasa, či merălla.

¹⁴Mardindoi les la ŕaiasa, ankalaves lehko duxo andoa than le mullengo.

¹⁵Šeaua, te avela teo illo xarano, o illo muŕo bukurila pe;

¹⁶thai o andraimos muŕo vesălila pe, kana te ušt phenena so sî mišto.

¹⁷Te na xolleaol teo illo pe kola le bezexale, ta te aveles orkana dar andoa Rai;

¹⁸kă sî khă potindimos, thai či šindeola tukă o ajukărimos.

¹⁹Ašun, šeaua, thai av xarano; ortosar teo illo po drom o čeačio.

²⁰Na av maškar kola kai pen moll, či maškar kola kai pravardeon masăsa.

²¹Kă o matearno thai kukoa kai xalbut čioŕaon, thai o soimos kărăl tu te phiraves kotora.

²²Ašun te daddes, kai kărdea tu, thai na bidin tea deia, kana phurili.

²³Tin o čeačimos, thai na bitin les, o xaraimos, o sîtimos thai o prinjeandimos.

²⁴O dadd kolehko bibezexalo vesălil pe, thai kukoa kai del kărimos khă xaranehkă bukuril pe.

²⁵Te bukuril pe teo dadd thai ti dei, te vesălil pe kutea kai kărdea tu.

²⁶Šeaua, dema teo illo, thai te arakhăn čeailimos te iakha ande Mîŕă droma.

²⁷Kă e kurva sî khă groapa andră, thai e străina khă xaing tidini.

²⁸Oi arakhăl sar ăkh čior, thai barearăl maškar le manuši o dindimos kolengo le rimome.

²⁹Kahkă sî le vătimata? Kahkă sî le akharimahkădimata? Kahkă sî le biateardimata? Kahkă sî le roimata? Kahkă sî le Dukhadimata bi došako? Kahkă sî le iakha le lolle?

³⁰Kolengă kai bešenxasarde kai moll, thai jean te mai nandearăn khă tahtai xamime molleasa.

³¹Na dikh kai moll kana thavdel lolli thai kărăl mărgăritare ando tahtai; oi istral lesne,

³²ta palal xal sar ăkh sap thai pusavel sar khă basiliko.

³³Te iakha dikhăna pala le romnea avrăngă, thai teo illo deladuma dilimata.

³⁴Avesa sar khă manuši suto ando maškar la mareako, sar khă manuši suto po gor khă katargohko.

³⁵„Mlaladea ma…ta či dukhal ma! Mardea ma…ta či atearau khanči! Kana ušteaua? Mai kamau moll!”