Read Kalderash Romani Cornilescu Bible 2020 (Romania) Le Pilde 26 Bible Online

Le Pilde 26 - Kalderash Romani Cornilescu Bible 2020 (Romania) bible

Le Pilde 26

¹Sar či lašardeol o iw millai, thai o brîšind ando čiro le tidimahko, kadea či lašardeol e slava anda khă čealado.

²Sar xutel e čirikli orde thai întea thai sar xureal e rîndunika, kadea či astarăl e arman pe bičeačimaste.

³O čiuno sî andoa grasat, o xamo andoa magari, thai ŕai andal zăia le čealadengă.

⁴Na de anglal le čealadehkă pala lehko čealadimos, kaste na ameas i tu lesa.

⁵De anglal le čealadehkă pala lehko čealadimos, kaste na pateal pe xarano.

⁶Kukoa kai tradel khă solia pe iekh čealado, šinel korkoŕo pehkă pînŕă, thai pel o bičeačimos.

⁷Sar sî le pînŕă le čiungohkă, kadea sî khă orba xaraii ando mui le čealadengo.

⁸Sar thosa khă baŕ ande praštia, kadea sî i kana des barimos khă čealades.

⁹Sar khă kanŕo kai avel ando vast khă manušehko mato, kadea sî khă orba xaraii ando mui le čealadengo.

¹⁰Sar khă arkašo kai dukhavel sa la lumea, kadea sî kukoa kai tomnil le čealaden thai le anglal avilinen.

¹¹Sar amboldel pe o jukăl ka so šaglea, kadea amboldel pe o čealado ka lehko čealadimos.

¹²Kana dikhăs khă manuši kai pateal oe xarano, dašti te avel tu mai but ajukărimos kata iekh čelado dă sar anda leste.

¹³O khandino phenel: „Avri sî khă leo, pel uliçî sî khă leo!

¹⁴Sar amboldeol o udar pe le çîçnea, kadea amboldel o khandino ande lehko pato.

¹⁵O khandino šol pehkă vast ando čearo, thai avel lehkă pharo te nigrăla pale koa mui.

¹⁶O khandino pateal pe mai xarano dă sar efta manuši kai den anglal krisasa.

¹⁷Khă phiritorii kai amil pe andekh čiungar kai či dikhăles, sî sar iekh kai astarăl khă jukăl kanendar.

¹⁸Sar o čealado kai šudel suliçî astarde thai mudarimahkă,

¹⁹kadea sî o manuši kai athavel pehkă pašes, thai pala kodea phenel: „Kamblem dăsar te khăla mangă!”

²⁰Kana manai kašt, e iag atărdeol; thai kana manai či khă pupuitorii, e čiungar atărdeol.

²¹Pala sar o angar kărăl angarastarde, thai o kašt iag, sa kadea i o manuši zaiako astarăl e čiungar.

²²Le divanuri le pupuitorekhă sî sar varesar guglimata, istran ji koa fundo le poŕăngo.

²³Sar e zgura le rupestar thodini pekh xançî phuw, kadea sî le ušt le astarde thai khă illo jungalo.

²⁴Kukoa kai čidabadikhăl paŕugleol pehkă uštença, thai ande peste lašarăl o athaimos.

²⁵Kana del tukă duma muiesa guglo, na patea les, kă efta prikăjimarta sî ande lehko illo.

²⁶Orta te garavela pehko bidikhlimos ando paruglimos, sa lehko nasulimos dičiola pe ando tidimos.

²⁷Kon xunavel e groapa avrăsti perăl o ande late, thai o baŕ amboldel pe pa kukoa kai spideles.

²⁸E šib e xoxamni či dabadikhăl kolen kai peravele oi, thai o mui čeaŕmakhlo lašarăl o xasardimos.