Read Kalderash Romani Cornilescu Bible 2020 (Romania) Le Pilde 7 Bible Online

Le Pilde 7 - Kalderash Romani Cornilescu Bible 2020 (Romania) bible

Le Pilde 7

¹Šeaua, nikăr le divanuri mîŕă, thai nikăr tute le phendimata mîŕă.

²Nikăr le phendimata mîŕă, thai traisa; arakh le sîkaimata mîŕă sar e lumina le iakhăndi.

³Phandele kal naia, ramosar le po sastriç te illehko.

⁴Phen le xaraimahkă: „Tu san mîŕî phei!” Thai deanau o prinjeandimos teo amal,

⁵kaste arakhăl tu la romneatar avrăhkăreatar, la strănatar kai phenel divanuri guglimahkă.

⁶Bešauas koa jeamo mîŕă khărăhko, thai dikhaus maškar le sastriça.

⁷Dikhlem maškar kola le bizumade, dikhlem maškar le tărne khă rakles bi godeako.

⁸Nakhălas pai uliça, koa kolço kai bešelas iekh anda kadala străinea, thai astardeala po drom kai jealas karing lako khăr.

⁹Sas kana perăl e reat, ande reat kali thai tunerikosa.

¹⁰Thai, dikta kă, prastaia lehkă anglal khă juwli xureadi sar ăkh kurva thai le illesa čiordano.

¹¹Sas laši mosti thai bi atărdimahko; lakă pînŕă našti bešenas lakă khără:

¹²kana pe uliça, kana andel piaçurea, kata sal kolçuri bešelas koa arakhaimos.

¹³Oi lea les ande angali thai čiumidea les, thai khă mosa bilajavehko phendea lehkă:

¹⁴„Sîmas unjile kha jertfasa naimasti, ades pherdem mîŕă solaxaimata.

¹⁵Anda kodea ankăstem tukă anglal, te rodau tu, thai arakhlem tu.

¹⁶Lašardem muŕo than vălurimatănça, thodem than poxtanença andoa Ejipto;

¹⁷piteardem muŕo than smirnasa, aloiasa thai skorçišoarasa.

¹⁸Av, te matiuas kamblimastar ji dă droboitu, te čeailiuas răzgăimatăndar!

¹⁹Kă muŕo rom nai khără, teleardea ande khă lungo phirimos,

²⁰lea pesa o gono le lovença, thai či amboldela pe khără dăsar koa šonuto o neo.”

²¹Sa dindoi lehkă duma oi kovleardea les, Ttai çîrdea les pehkă uštença le guglimahkărănça.

²²Andakh data lea te jeal pala late, sar o guruw kai jeal koa šindimos, sar khă čerbo kai prastel karing o astardimos,

²³sar e čirikli kai perăl ande phal, bi te jeanel kă potinela la čivavasa, ji kana e suliça šol pe ande lako buko.

²⁴Thai akana, šaoŕalelo, ašunen ma, thai len godi kal divanuri mîŕă mohkă.

²⁵Te na perăl teo illo karing o drom iekha sar kadalako juwleako, na xasao pe lakă droma.

²⁶Kă oi kărdea te perăn but jertfe, thai but sî kola kai mudardea le oi.

²⁷Lako khăr sî o drom karing o than le mullengo, o drom kai ulel karing le thana le mullimahkă.