Read Kalderash Romani Cornilescu Bible 2020 (Romania) Eclesaiato 10 Bible Online

Eclesaiato 10 - Kalderash Romani Cornilescu Bible 2020 (Romania) bible

Eclesaiato 10

¹Le mačea le mullea rimon thai šuklearăn o zetino le bitindorehko le čikănengo; sa kadea, xançî čealadimos izbîndil o xaraimos thai slava.

²O illo le xaranehko sî ande čeači rig lesti, ta o illo le čealadehko ande bičeači lesti.

³Thai pe orsao drom phirăla o čealado, pa sa či avelales e godi, thai phenel saoŕăngă kă sî čealado!

⁴Kana astardeol pa tute e xolli kolesti kai stăpînil, na mekh teo than, kă o rat o šudro arakhăl tu bară bezexăndar.

⁵Sî khă nasul kai diklem les tala o kham, khă athadimos, kai avel kata kukoa kai tradel:

⁶o čealadimos sî thodino andel khăra le barăngă, ta le bravale bešen andel thana le mai telal.

⁷Dikhlem robea pel grast, thai le voievoduri phirindoi telal sar le robea.

⁸Kon xunavel e groapa avrăsti, perăl o ande late, thai kon peravel khă zîdo, avela xalo khă sapestar.

⁹Kon phaŕavel baŕ, sî dukhado lendar, thai khon phaŕavel kašt sî ando nasulimos.

¹⁰Kana točil pe o sastri, thai ašel biskuçome, trăbul te duvarăs te zora; anda kodea koa skăpimos arăsăs andoa xaraimos.

¹¹Kana xal o sap, anda kă či sas drabardo, o drabaitorii nai les či khă valoso anda lehko butearimos.

¹²Le divanuri khă xaranehkă sî čeailimahkă, ta le ušt le čealadehkă anen lehkă o xasardimos.

¹³Kukoa anglal divano kai anklel andoa mui sî khă čealadimos, ta kukoa mai palal sî khă čealadimos i mai nasul.

¹⁴O čealado phenel khă butimos orbengo, barem kă o manuši či jeanel so avela, thai kon phenela lehkă so avela pala leste?

¹⁵O pharimos le čealadehko ašavel koles kai či prinjeanel o drom karing e četatea.

¹⁶Au tutar, čem, savehko thagar sî khă šaoŕo, thai savehkă voievodurea xan thai pen ji dădroboitu!

¹⁷Baxtalo tutar čem, savehko thagar sî andai viça bari, thai savehkă voievodurea xan koa čiro lašardo, kaste zurearăn pehkă zora, ta na varesar te den pe koa matimos!

¹⁸Kana le vast sî kovle, mekăl pe e grinda, thai kana khandinin le vast, delbrîšind ando khăr.

¹⁹Le desalbară kărdeon pe anda o xamos, e moll vesălil e čivava, ta o rup dele pe sa.

²⁰Na dearman le thagares, či orta ando gîndo, thai na dearman koles le bravales ande odaia kai soves; kă dašti kărdeola ta e čirikli le čeresti te nigrăl ti orba, thai khă solo phakănça de del po mui te orbe.