Read Kalderash Romani Cornilescu Bible 2020 (Romania) Dilabaimos Le Dilibaimatăngo 7 Bible Online

Dilabaimos Le Dilibaimatăngo 7 - Kalderash Romani Cornilescu Bible 2020 (Romania) bible

Dilabaimos Le Dilibaimatăngo 7

¹So šukar sî te pînŕă ande te podimata, šei raiesti! Le riga le roata te tičiurengă sî sar varesar lănçuçuri thodine kai koŕ, butearde khă vastestar butearehko bujando.

²O păŕ tiro sî sar khă tahtai roata, katar nai te na avel e moll e khandimeni; o stato tiro sî sar khă drăz divesti, phangi krinença.

³Lidui te čiučea sî sar dui pui čerbohkă, sar le čeanga khă busneorakovăšuni.

⁴Ti koŕ sî sar khă turno fildešohko; le iakha tiră sî sar le iazuri le Xesbonohkă, paša o udar Bat-Rabim; o nakh tiro sî sar o turno le Libanohko, kai dikhăl karing o Damasko.

⁵Teo šero sî sar o Karmelo, thai le ball te šerăhkă sî sar e purpura e thagarni: ji pune i khă thagar avela lănçuime te tičendar! …

⁶So šukar thai čeailimasti san tu, kamblie, ando maškar le răzgăimatăngo!

⁷O stato tiro sî sar o finiko, thai te čiučea sar varesar drakha.

⁸Phenau mangă: „Ankleaua ando finiko, thai astaraua lehkă ŕaia!” Atunčeara te čiučea avena sar le drakha andai răz, o khandimos te phurdimahko sar le phabengo.

⁹Thai teo mui šorăl khă moll alosardi, kai thawdel kowles sar dimosanglal kal răzgăimata mîŕă, thai istral pel ušt amară kana sovas!

¹⁰Me sîm mîŕă kamblimenesti, thai o sî lehkă doro mandar.

¹¹Avta, kamblimena, avta te ankleas po kîmpo, te tradas reate andel gava!

¹²Kana phaŕadeol o des te jeas andel răza, te dikhas kana mugurisardea e răz, kana pîtărdea e lulludi, thai kana lulludearde le rodii. Oče dava tu muŕo kamblimos.

¹³Le mandragore šuden pehko khandimos, thai opral le udarăhko same sako moda roadendi laxše, nevea thai purane, saven, anda tute, kamblimena, garadem le.