Read Kalderash Romani Cornilescu Bible 2020 (Romania) Isaia 11 Bible Online

Isaia 11 - Kalderash Romani Cornilescu Bible 2020 (Romania) bible

Isaia 11

¹Pala kodea khă Odrasla anklela anda e tulpina le Isaiesti, thai khă Vlăstarii dela anda lehkă angluminata.

²O Duxo le Raiehko xodinila Pe pa Leste, duxo xaraimahko thai prinjeandimahko, duxo phendimahko thai zurallimahko, duxo le jeanglimahko thai le darastar le Raiestar.

³O čeailimos lehko avela e dar le Raiestar; či krisînila pala o ameaimos, čina či mothola pala kola le ašundine,

⁴ta va krisînila kolen le čioŕăn pala o čeačimos, thai mothola binikărimahko pa le bibaxtale le čemehkă; malavela e phuw la rowleasa Lehkă divanosa, thai le phurdimasa Lehkă uštença mudarăla le nasulimenes.

⁵O bibezexalimos avela o bričinari Lehkă tičiurengo, thai o pateaimos o brečinarii Lehkă pateaimahko.

⁶Atunčeara o ruw bešela andekhthan le bakrišesa, thai o pardoso sovela andekh than le busnesa; o guruwiçî, o puio le leohko, thai le jiwine le thulearde, avena andekhthan, thai arakhăla le khă šaoŕo;

⁷e gurumni thai e rišni xanačear andekhthan, thai le puii lengă sovena andekhthan. O leo xala suluma le guruwesa.

⁸E gloata la čiučeati khălela pehkă koa mui la xîveako la năpîrkati, thai o šaoŕo o çărkome šola o vast ando garaimos le sapehko.

⁹Či kărdeola pe či khă nasul thai či khă xasarimosd pe soa baŕbaro Muŕo kukoa o sfînto; kă e phuw avela pherdi prinjeandimos le Raiehko, sar o fundo le paiehko le paiendar kai garaven les.

¹⁰Ando des kodoa, o Lulludearimos le Isaiehko avela sar khă flako andal popoare; le neamuri amboldena pe Leste, thai e slava avela ande Lehko bešlimos.

¹¹Ande kodoa čiro, o Rai tinzola Pehko vast o duito data, kaste potinelpale o ašimos Pehkă poporohko, phaŕado ande Asiria thai ando Ejipto, ando Patros thai ande Etiopia, ando Elam, ando Šinear thai ando Xamat, thai andel ostroave la mareakă.

¹²O vazdela khă flako andal neamurii, tidela le našadinen le Israelohkărăn, thai tidela kolen le pharadinen le Iudahkă, kata kola štar gora la phuweakă.

¹³E xolli le Efraimosti atărdeola, thai le dušmaia le Iudahkă avena xasardine; o Efraimo či mai avela jeloso po Iuda, thai o Iuda či mai avela o dušmano le Efraimohko,

¹⁴ta xureana po dumo le Filisteinengă karingperălokham, thai čiorăna andekhthan le šaven Karingavelodes. O Edom thai o Moab avena o limos lengă vastengo, thai le šave le Amonohkă avela lengă meklinetelal.

¹⁵O Rai šutearăla e šib la mareati le Ejiptosti, vazdela Pehko vast poa Nanilaš ande Lesti xolli, xulavela les ande efta paiora, kadea kă daština te nakhăn les podime.

¹⁶Thai avela khă drom andoa ašimos Lehkă poporohko, kai mai ašela ande Asiria, sar sas andoa Israelo, ando des kana ankăste andoa čem le Ejiptohko.