Read Kalderash Romani Cornilescu Bible 2020 (Romania) Isaia 3 Bible Online

Isaia 3 - Kalderash Romani Cornilescu Bible 2020 (Romania) bible

Isaia 3

¹O Rai, o Dell le oštirengo, lela andoa Ierusalimo thai andoa Iuda orsao maškar traiohko, orsao isvoro manŕăhko, thai orsao isvoŕo paiehko,

²le zuralles thai le manušes le mardimahkărăs, le krisînitores thai le proorokos, le drabarnes thai le phurăs,

³le šerăslebarăs pa panvardeši thai le drăgătores, le phendimatones, le butearăs le alosardes thai le drabarnes le bujandes.

⁴„Daua le rakloŕă orta šerăbară”, phenel o Rai, „thai varesar šaoŕoŕă stăpînina pa lende.”

⁵Le manuši mekăna pe iekh pa aver, iekh mekăla pe poa kolaver, sakogodi pa pehko pašo, o tărno malavela koles le phurăs, thai o manuši le khančehko kukoles thodino ande pativ.

⁶Jeana ji očeta iekh astarăla pehkă phrales ando khăr lengă daddehko, thai phenela lehkă: „Tut sî tu khă raxami, av amaro šerobaro! Le le peraimata kadala tala teo vast!”

⁷Ta sa ande kodoa des o delaleanglal: „Našti te avau felčero, kă ando khăr muŕo nai či manŕo či raxami: na thon ma šerobaro poa poporo.”

⁸Mištil o Ierusalimo, perăl o Iuda, anda kă le divanuri thai le kărdimata lengă sî ortomena poa Rai, nakhlindoi Lehkă dikhlimata le barimahkă.

⁹O sîkadimos lengă muiehko pîŕîl pa lende, thai, sar le Sodomiçea, den pe dă gol e bikris lendi, bi te garaven la. Au lengă duxostar, kă lašarăn pehkă nasulimata.

¹⁰Mišto kolestar le bibezexalestar! Lehkă jala lehkă mišto, kă bukurila pe andoa rodo pehkă kărimatăngo.

¹¹Au kukolestar le jungalestar! Lehkă jala lehkă nasul, kă tidela o rodo pehkă kărimatăngo.

¹²O poporo muŕo sî nikărdinotelal varesandar šaoŕă, thai stăpînin les varesar juwlea! O poporo muŕo, le traditorea lehkă nigrăn tu ando xasarimos, thai pustiin o drom pe sao phirăs!

¹³O Rai sîkadeol Pe koa krisînimos, bešel ande pînŕănde kaste krisînil le popoaren.

¹⁴O Rai šol pe kai kris le phurănça Pehkă poporohkă thai le mai barănça lehkă: „Tume xalean e răz! O limos lino katoa čioŕo sî ande tumaro khăr!

¹⁵Save čeačimasa ušteaven tume andel pînŕă Mîŕă poporos, thai mekăn tume pal čioŕă?” Phenel o Rai, o Dell le oštirengo.

¹⁶O Rai phenel: „Anda soste le šeia le Sionohkă sî barimatahkă, thai phirăn la koŕasa tinzome thai le dikhlimatănça čeailimatahkă, anda kă phirăn çînoŕorăs, thai bašaven le brăçarença katoa punŕo,

¹⁷o Rai, mekăla biballengo o krešteto le šerăhko le šeiango le Sionohko, o Rai sîkavela lengo lajau.”

¹⁸Ando des kodoa, o Rai ankalavela le brăçări kai thon le sar xureaimos kal pînŕă, thai le khamoŕă thai le šonuturiçi,

¹⁹le zlaga, le brăçarea, thai le kasînčea;

²⁰le phanglimata poa šero, le laçuçuri katal pînŕă thai le brečinarea, le kutii le sungaimatănça thai le baierurea drabarde;

²¹le angrustea thai le verijea andoa nakh;

²²le çoale ledesăbarăhkă thai le gada kola le buflle, le raxamea thai le punji;

²³le glinde thai le gada le sane, le turbane thai le kasînčii le sane.

²⁴Thai atunčeara ando than le sungaimahko o čeailo avela khandimos; thai ando than la bričireako, khă šelo; ando than le ballengo zbîrli, khă šero biballengo, ando than la raxameako la buflleako, khă gono tidino; khă sămno darardimahko, ando than le šukarimahko.

²⁵Le murši tiră pherăna mudarde la sabiatar thai le zuralle tiră ando mardimos.

²⁶Le udara la šeakă le Sionohkăreakă rovena thai jălina; thai oi bešela nandeardi pe phuw.