Read Kalderash Romani Cornilescu Bible 2020 (Romania) Isaia 40 Bible Online

Isaia 40 - Kalderash Romani Cornilescu Bible 2020 (Romania) bible

Isaia 40

¹„Răzgăin, răzgăin le poporos Mîŕăs, phenel o Dell tumaro.

²„Denduma dă mišto o Ierusalimo, thai çîpisarăn lehkă kă e robia isprăvisaili, kă e bikris sas ispăšime; kă lea andoa vast le Raiehko duarăs anda sa le bezexa lehkă.

³Khă mui çîpil: „Lašarăn ande pustia o drom le Raiehko, orton andel thana le šukă khă drom anda o Dell amaro!

⁴Orsavi xar te avel vazdini, orsao baŕbaro thai orsao pleai te aven bandearde, le tičiurea te parugleon andel islazurii, thai le tidimata andel pleaiora!

⁵Atunčeara dičiola pe e slava le Raiesti, ande leaka kodea orsavi făptura dikhăla la; kă o mui le Devllehko deaduma.

⁶Khă mui phenela: „Çîpisar!” — thai me demanglal: „So te çîpi?” — „Orsavi făptura sî sar e čear, thai soa străfeaimos lako sar e lulludi poa kîmpo.

⁷E čear šuteol, e lulludi perăl, kana phurdel e bravall le Raiesti pa late.” — Ande čeačimaste, o poporo sî sar e čear:

⁸e čear šuteol, e lulludi perăl; ta o divano le Devllehko amarăhko ašel ando veako.

⁹Ankli ta pe khă baŕbaro učio, kaste phenes le Sionohkă o ašundimos kuko o lašo; vazde teo mui zurallimasa, kaste phenes le Ierusalimohkă o ašundimos kukoa o lašo; vazde teo mui; na dara, thai phen le manušengă le Iudahkărăngă: „Dikta o Dell tumaro!

¹⁰Dikta, o Rai o Dell avel zorasa, thai mothol Pehkă vastesa. Dikta kă o potindimos sî Lesa, thai le dimata aven angla Leste.

¹¹O nigrăla pesti turma sar khă Bakreari, lela le bakrišen ande angali, thola le ka Pehko kolin, thai phiravela kovles le bakrean kai denčiučii.”

¹²„Kon măsurisardea le paia pehkă vastesa? Kon măsurisardea le čerurea la palmasa, thai tidea e phuw andekh trito măsurimos? Kon tollisardea le baŕlebară le tollosa, thai le pleaia le tollosa?

¹³Kon rodeas o Duxo le Raiehko thai kon luminisardea Les le phendimatănça Lehkă?

¹⁴Kasa dea pe duma O, kaste lel sîkaimos? Kon sîkadea les o drom le čeačimahko? Kon sîkadea Les o xaraimos, thai kărdea Lehkă prinjeando o drom le atearimahko!

¹⁵Dikta, le neamuri sî sar khă piteaimos paiehko andai kanta, sî sar e poši pai kumpăna; O vazdel le ostroave sar khă boamba tišaiati.

¹⁶O Libano či arăsăl andai iag, thai le jiwine lehkă či arăsăn anda o phabarimos dă sa.

¹⁷Sa le neamuri sî sar khanči angla Leste, nai dă sar khančimos thai xasardimos.

¹⁸Kasa kamen te ameazăn le Devlles? Thai save amaezămosa ameana Les?

¹⁹O buteari šorăl o idolo, thai o rupeari xureaveles sumnakasa, thai šorăl lehkă lançuçurea rupehkă.

²⁰Ta kon sî čioŕo, alosarăl sar pativ khă kašt kai či terneol; rodel pehkă khă buteari bujando, kaste kărăl, kai te na perăl.

²¹„Či jeanen? Či ašundean? Či kărdeape tumengă prinjeando dă anglal? Či dean tume čiăkhdata koa kărdimos la phuweako?”

²²O bešel opral le čerkohko la phuweako, thai le bešlitorea lehkă sî sar le grastlačearekă angla Leste; O tinzol le čerurea sar khă dikhlo sano, thai buflearăle sar khă çăra, kaste bešel ande leste.

²³O paŕuvel ande khančeste le voievoduren, thai kărăl khă khančimos anda le krisînitorea la phuweakă.

²⁴Dă sar so sî thodine, dă sar sî thodine andephuw, dă sar anglunisaili lendi tulpina ande phuw: thai O phurdel pa lende, ta šuteon, thai khă bravalloŕî lel le sar varesar sulumen.

²⁵„Kasa ameazpăna Ma, kaste avau orta sar leste?” phenel Kukoa o Sfînto.

²⁶„Vazden tumară iakha opră, thai dikhăn! Kon kărdea kadala butea? Kon kărdea te jean pala o dindimos, ando širo, e oštirea lendi? O akharăle saoŕăn po anau; kadea dă bari sî e zor thai o zurallimos Lehko, kă iekh či lipsol.”

²⁷„Andasoste phenes tu, Iakove, andasoste phenes tu, Israelona: „E bax mîŕî sî garadi angloa Rai, thai o čeačio muŕo sî nakhado le dičimasa angloa Dell muŕo?”

²⁸Či jeanes? Či ašundean? O Dell o vešniko, o Rai kărdea le riga la phuweakă. O či ašadeol, čina či čiiol; o prinjeandimos Lehko našti avel ateardino.

²⁹O del zor kolehkă ašado, thai barearăl e zor kolesti kai perăl ando zallimos.

³⁰Le tărnăxarea ašadeon thai čiion, orta le tărne perăn;

³¹ta kola kai patean pe ando Rai nevearăn pesti zor, on xurean sar le vulturea; prasten thai či ašadeon, phirăn thai či ašadeon.”