Read Kalderash Romani Cornilescu Bible 2020 (Romania) Isaia 46 Bible Online

Isaia 46 - Kalderash Romani Cornilescu Bible 2020 (Romania) bible

Isaia 46

¹„O Bel perăltele, o Nebo perăl; le idolea sî thodine pel gurumnea thai le jiwine; le idolea kai phiraven le tume arăsline khă pharimos, anda e gurumni e ašadi!

²Peline, pelinetele andekhthan, našti te skăpin o pharimos; on orta jean ande robia.

³Ašunen Ma, khăr le Iakovohko, thai soa ašimos le khărăhko le Israelohko, tume, kai lem tume andel zăia dă kata o kărdimos tumaro, kai phirdadem tume po dumo dă katoa kărdimos tumaro:

⁴ji koa phurimos tumaro Me avaua sa Kodoa, ji kal parnimata tumară nikăraua tume. Phiradem tume, thai sa mai kamau te phiravau tume, te nikrav tume thai te skăpi tume.

⁵Paša kaste thona Ma, kasa ameazăn Ma? Kasa ameazăna Ma, thai lašarăna Ma?

⁶On šorăn o sumnakai andai punga, thai thon o rup ande toll; tokmin khă rupari te kărăl khă del anda lende, thai bandeon thai den čeanga angla leste.

⁷Phiraven les, len les po dumo, thon les ka lehko than; oče ašel, thai či mištil pe anda lehko than. Pala kodea çîpin pe leste, ta či delanglal, čina či skăpile kana akharăn les.

⁸Nikrăn godi kadala butea, thai aven manuši, Aven tumengă ande firea, bezexalelor.”

⁹„Anen tumengă godi anda kukola kărdine andel čirurea le purane; kă Me sîm o Dell, thai nai aver, Me sîmo Dell thai nai či iekh sar Mande.

¹⁰Me vestisardem tumengă dăanglal so sî te kărdeol pe thai dă sar but angle so înkă nai pherdino. Me phenau: „Le mothodimata Mîŕă ašena ande pînŕănde, thai nigraua Mangă koa pherdimos sa Muŕo kamimos.

¹¹Me akharau kato lulludearimos le khamehko khă čirikli xamasti, andakh čem dureardo, khă manuši kaste pherăl le planuri Mîŕă: E, Me phendem, thai Me pheraua.

¹²Ašunen Ma, manuši le illesa baŕuno, dušmaia le bibezexalimahkă!

¹³Me pašarau o bibezexalimos: nai dur; thai o skăpimos Muŕo či dičiola. Me thoaua o skăpimos Muŕo ando Siono thai slava Mîŕî poa Israelo.”