Read Kalderash Romani Cornilescu Bible 2020 (Romania) Isaia 55 Bible Online

Isaia 55 - Kalderash Romani Cornilescu Bible 2020 (Romania) bible

Isaia 55

¹„Sa tume kola le trušale, aven kal paia, orta i kukoa kai nai les love! Aven thai tinen xabenata, aven thai tinen moll thai thud, bi lovengo thai bi potindimahko!

²Sostar kîntărin rup anda khă buti kai či čeailearăl? Sostar den tumaro valoso la buteako anda vareso kai či čeailearăl? Ašunen Ma kadeadar, thai xana so sî lašo, thai o duxo tumaro čeaileola xabenença pravardimahkă.

³Len godi, thai aven Mande, ašunen, thai o duxo tumaro juwila: kă Me phandaua tumença khă phanglimos vešniko, kaste zurearau le lašimata Mîŕă angloa Davido.

⁴Dikta, thodem les dikhlitorii pašal popoare, šero thai stăpînitorii le popoarăngo.

⁵Ande čeačimaste, akharăsa neamurea, kai či prinjeanes le, thai popoare kai či prinjeanen tu prastena tute, andoa Rai, o Dell tiro, andoa Sfînto le Israelohko, kai proslăviltu.”

⁶„Roden le Raies sode čiro dašti arakhăl pe; akharăn les, sode čiro sî paše,

⁷Te mekăl pe kukoa o jungalo lehkă dromestar, thai o manuši o bikrisako te mekăl pe le gîndurengă lehkă, te amboldel pe koa Rai kai avela les milkla lestar, koa Dell amaro, kai či ašadeol iertindoi.

⁸„Kă le gînduri Mîŕă nai le gînduri tumară, thai le droma tumară nai le droma Mîŕă, phenel o Rai.

⁹„Ta sode sî dă opră le čerurea angla e phuw, kaditi sî dă opră le droma Mîŕă angla le droma tumară thai le gînduri Mîŕă angla le gînduri tumară.

¹⁰Kă pala sar o brîšind thai o iw ulen andal čerurea, thai či mai ambolden pe parpale, ta tindearăn e phuw thai kărăn la te rodil thai te butearăl, kaste del sămînça le thodimatores thai manŕo kolehkă so xal,

¹¹sa kadea i o Divano Muŕo, kai anklel anda Muŕo mui, či mai amboldel pe Mande bi rodohko, ta kărăla o kamimos Muŕo thai pherăla le planurea Mîŕă.

¹²E, anklena bukurimasa, thai avena phiradine pačeasa. Le baŕlebară thai le pleaia ašundeona pe vesălimastar angla tumende, thai sal kašt andoa islazo marăna andal pălmi.

¹³Ando than le rugohko vazdela pe o tiparoso, ando than le kanŕăngo bareola o mirto. Thai e buti kadea avela khă slava andoa Rai, khă sămno vešniko, bixasardimahko.”