Read Kalderash Romani Cornilescu Bible 2020 (Romania) Levetiko 17 Bible Online

Levetiko 17 - Kalderash Romani Cornilescu Bible 2020 (Romania) bible

Levetiko 17

¹O Rai dea duma le Moisahkă, thai phendea:

²„De duma le Aaronohkă thai lehkă šeavengă, thai phen lengă: „Dikta so mothodea o Rai.

³Kana varekon andoa khăr le Israelohko delšuri ande tabara or avri anda e tabăra, khă guruw, khă bakrišo or khă busni,

⁴thai či aneles koa uluw la çărako le arakhadimasti, kaste aneles pativ le Raiehkă anglai çăra le Raiesti, o rat kadoa avela thodino ando dindimos le manušehko kodolehko: šordea rat; o manuši kodoa avela mulimahko anda o maškar pehkă poporohko.

⁵Anda kodea le šeave le Israelohkă, ando than te denšuri pehkă jertfengă po kîmpo, trăbun te anenle koa rašai, angloa Rai, koa uluw la çărako le arakhadimasti, thai te anele le Raiehkă sar jertfe naismaskă.

⁶O rašai te pitearăl o rat po altari le Raiehko, koa uluw la çărako le arakhadimasti; thai te phabarăl o thullimos, kai avela khă khandimatahko čeailo angloa Rai.

⁷Te na mai anen pehkă jertfe kal idolea savença kurvin: Kadea avela khă kris vešniko anda lende thai anda lengă avimata pala lende.

⁸Te phenes lengă kadeadar: Kana khă manuši andoa khăr le Israelohko or anda le străinea kai bešen ande lengo maškar, anel ăkh phabarimos dă sa or aver jertfa,

⁹thai či anela koa uluw la çărako le arakhadimasti, kaste anela jertfa le Raiehkă, o manuši kodoa te avel mullimahko anda pehko poporo.

¹⁰Kana khă manuši andoa khăr le Israelohko or anda le străinea kai bešen ande lengo maškar, xan rat orsohko, amboldaua Muŕo Mui kata kodoa kai xal o rat, thai mudaraua les andoa maškar pehkă poporohko.

¹¹Kă e čivava le statosti sî ando rat. Dem tumengă les kaste thon les po altari, kaste kandel iertimahko anda le suflete tumară, kă anda e čivava anda leste kărăl o rat iertimos.

¹²Anda kodea phendem le šeavengă le Israelohkă: „Khonikh anda tumende te na xal rat, thai či o străino kai bešel ande tumaro maškar te na xal rat.

¹³Kana vo iekh anda le šeave le Israelohkă or anda le străinea kai bešen ande tumaro maškar astarăn khă juvindimos or khă čirikli kai xal pe, te šorăl lako rat, thai te garaveles phuweasa.

¹⁴Kă e čivava orsave statosti bešel ande lehko rat, kai sî ande leste. Anda kodea phendem le šeavengă le Israelohkă: „Te na xan o rat či khă statohko; kă e čivava sako statosti sî ande lehko rat: orkon xala anda leste, avela mullimahko.

¹⁵Orkon, avindoi oçal, avindoi străino, kai xala anda khă juvindimos mullo or šindino avrandar, te xalavel pehkă çoale, te naiol ando pai, thai avela marime ji reateako; pala kodea avela bimarime.

¹⁶Kana či xalavel pehkă çoale, thai či naiarăl pehko stato, phiravela pehko bezexalimos.”