Read Kalderash Romani Cornilescu Bible 2020 (Romania) Levetiko 18 Bible Online

Levetiko 18 - Kalderash Romani Cornilescu Bible 2020 (Romania) bible

Levetiko 18

¹O Rai dea duma le Moisahkă, thai phendea:

²De duma le šeavengă le Israelohkă thai phen lengă: „Me sîm o Rai, o Dell tumaro.

³Te na kărăn so kărdeol pe andeo čem le Ejiptohko kai bešlean, thai te na kărăn so kărdeol pe ando čem le Kanaanohko kai nigrau tume Me; te na len tume pala lengă sîkadimata.

⁴Te nikrăn le mothodimata Mîŕă, tahi te nikraăn Mîŕă krisa: te phiraven le. Me sîm o Rai, o Dell tumaro.

⁵Te arakhăn le krisa thai le mothodimata Mîŕă: o manuši kai phiravela le, traila anda lende. Me sîm o Rai!

⁶Či iekh anda tumende te na pašol pehka vicatar le ratesti, kaste dikhăl lako nandimos. Me sîm o Rai.

⁷Te na rodes o nandimos te daddehko, či o nandimos tea deiako. Sî tukă dei: te na rodes lako nandimos.

⁸Te na rodes o nandimos la romneako te daddesti. Sî o nandimos tiră daddehko.

⁹Te na rodes o nandimos tea pheako, e šei te dadesti, or e šei tea dati, kărdi ando khăr or avri andoa khăr.

¹⁰Te na rodes o nandimos la šeako te šeavesti or la šeati tea šeako. Kă sî o nandimos tiro.

¹¹Te na rodes o nandimos la šeako la romneako te daddesti, kărdi anda teo dadd. Sî tukă phei.

¹²Te na rodes o nandimos la pheko te daddesti. Sî viça paše te daddesa.

¹³Te na rodes o nandimos la pheako tea deiako. Sî viça paše tea deiasa.

¹⁴Te na rodes o nandimos le phralehko te daddehko. Te na pašos lehka romneatar. Sî tukă bibi.

¹⁵Te na rodes o nandimos tea boreako. Sî e romni te šeavesti: te na rodes lako nandimos.

¹⁶Te na rodes o nandimos la romneako te phralesti. Sî o nandimos te phralehko.

¹⁷Te na rodes o nandimos kha juvleako thai laka šeako. Te na les la šea lakă šeavesti, či la šea laka šeati, kaste rodes lengo nandimos. Sî tukă viça paše: sî khă bezexalimos.

¹⁸Te na les la phea tea romneati, kaste kărăs lakă xoli, rodindoi lako nandimos pašea tea romneako, sode čiro oi sî ande čivava.

¹⁹Te na pašeos paša khă romni ando čiro lakă biujarimahko, kana sî nasfali, kaste rodes lako nandimos.

²⁰Te na lestu la romneasa te avrimahkărăsa, kaste bezexarăs lasa.

²¹Te na des či iekh anda te šeave te avel andino sar jertfa le Molohkohkă, thai te na bezexares o Anau le Devllehko tirăhko. Me sîm o Rai.

²²Te na soves khă muršesa sar sovel varekon kha juwleasa. Sî khă jungalimos.

²³Te na soves kha gurumneas, kaste bezexarăstu lasa. E juwli te na pašol paša khă juvindimos kaste kurvărăšil lesa. Sî khă bezexalimos.

²⁴Te na marin tume či iekhăsa anda kadala butea, kă anda sa kadala butea marisaile ăl neamuri kai našavaua le angla tumende.

²⁵O čem sas marime anda lende; Me došaraua lengo bezexalimos, thai e phuw šaglea anda pehko mui le bešlimatăngo lako.

²⁶Kadeadar arakhăn le krisa thai Mîŕă mothodimata, thai na kărăn či iekh anda kadala prikăjimata, či obešlimahko, či o străino kai bešel ande tumaro maškar.

²⁷Kă sa kadala prikăjimata kărdine le ăl manuši anda kadoa čem, kai sas angla tumende ande leste; thai kadea o čem sas prikăjime.

²⁸Len sama ka na varesar te šadel tume i tumen o čem pehkă mosa, kana prikăjina les, sar šaglea le neamuren kai sas angla tumende ande leste.

²⁹Kă sa kukola kai kărăna vo iekh anda kadala pîngărimata, avena mullimahkă andoa maškar pehkă poporohko.

³⁰Arakhăn le mothodimata Mîŕă, thai na kărăn či iekh anda kadala sîkadimata jungale kai kărdeonas angla tumende, kaste na marin tume lença. Me sîm o Rai o Dell tumaro.”