Read Kalderash Romani Cornilescu Bible 2020 (Romania) Levetiko 4 Bible Online

Levetiko 4 - Kalderash Romani Cornilescu Bible 2020 (Romania) bible

Levetiko 4

¹O Rai dea duma le Moisaskă, thai phendeas:

²„De duma le šeavengă le Israelohkă, thai phen lengă: „Kana bezexarăla varekon bi te kamel anda vo iekh anda le mothodimata le Raiehkă, kărindoi vareso kai či trăbulas kărdo; kadea sar:

³Te bezehardino o rašai kai leas o makhlimos, anda kadea andea e doši poa poporo, te anel le Raihkă khă guruwiç bi dukhako, sar jertfa iertimasti anda e bezex kai kărdea.

⁴Te anel o guruwiçî koa uluw la çărako le arakhadimasti, angloa Rai, te thol pehko vast po šero le guruwiçăhko, thai te delesšuri angloa Rai.

⁵O rašai kai lea o mahklimos, te lel andoa rat le guruwiçăhko, thai te anel les kai çăra le arakhadimasti:

⁶te makhăl pehko nai ando rat, thai te pitearăl eftavar angloa Rai, angla e perdeaua dă andral le sfîntone thanesti.

⁷Pala kodea o rašai te makhăl le ratesa le šinga le altarehkă anda e tămîia le khandimasti, kai sî angloa Rai ande çăra le arakhadimasti, thai sa o kolaver rat le guruwiçăhko te šorăl les kal pînŕă le altarehkă anda le phabarimata dă sa, kai sî koa uluw la çărako le arakhadimasti.

⁸Te lel sa o thulimos le guruwiçăhko andino sar jertfa iertimasti, kadea sar: o thulimos kai garavel le xurdimata thai sa o thulimos kai nikrăl lendar,

⁹kola le dui rîničea, thoa thulimos pa lende, pa le bečea, thai poa prapuro le bukăhko, kai randela les pašal rîničea. O rašai te lel kadala riga,

¹⁰sar len pe kata o guruwiçî andino sar jertfa naismasti, thai te phabarăl le po altari anda le phabarimata dă sa.

¹¹Ta e morči le guruwiçăsti, sa lehko mas, o šero, le pînŕă, le xurdimata thai e gošni lesti,

¹²kadea sa o viçălo kai mai ašilo, te ankalave les avri anda e tabăra, ande khă than ujo, kai šudel pe o ušar, thai te phabară les kaštença pe iag; te avel phabardo pe gomila le ušarăsti.

¹³Kana sa o tidimos le Israelohko bezexardea bi te kamel thai bi te jeanel, kărdindoi so či trăbulas anda iekh anda le mothodimata le Raiehkă, butea kai či trăbunas kărdine, kărindoi pe kadea došalo,

¹⁴thai kana e bezex kărdi ašundea pe, o tidimos te anel khă guruwiçî angloa Rai, thai te delšuri o guruwiçî angloa Rai.

¹⁵Le phură le tidimahkă te thon pehkă vast po šero le guruwiçăhko angloa Rai, thai te denšri o guruwiçî angloa Rai.

¹⁶O rašai kai leas o makhlimos, te anel andoa rat le guruwiçăhko ande çăra le arakhadimasti;

¹⁷te kovlearăl o nai ando rat, thai te pitearăl lesa eftavar angloa Rai, angla e perdeaua andral.

¹⁸Te makhăl le ratesa kadalesa le šinga le altarehkă kai sî angloa Rai ande çăra le arakhadimasti, thai te šorăl sa o rat kai mai ašilo kal pînŕă le altarehkă anda le phabarimata dă sa, kai sî koa uluw la çărako.

¹⁹Sa o thulimos le guruwiçăhko te lel les thai te phabară les po altari.

²⁰Le guruwiçăsa kadalesa te kărăl orta sar kărdea le guruwiçăsa andino sar jertfa iertimasti, te kărăl sa kadea. Kadeadar te kărăl o rašai iertimos anda lende, thai avena iertime.

²¹O guruwiçî kai ašilo, te ankalavenles pala kodea avri anda e tabăra, thai te phabară les sar i koles anglal. Kadea sî khă jertfa iertimasti andoa tidimos.

²²Kana khă šerobaro bezexardea, kărdindoi bi te kamel anda khă mothodimos le Rahko, le Devllehko lehko, butea kai či trăbunas kărdine thai pelo došalo,

²³thai arăsăl te jeangleol pe e bezex kai kărdeala, te anel jertfa khă busno bi dukhako!

²⁴Te thol pehko vast po šero le busnehko, thai te delešuri ando than kai denpešurea le phabarimata dă sa angloa Rai. Kadea sî khă jertfa iertimasti.

²⁵O rašai te lel le naiesa andoa rat la jertfako le iertimasti, thai te makhăl le šinga le altarehkă anda le phabarimata dă sa, thoa kolaver rat te šoră les kal pînŕă le altarehkă anda le phabarimata dă sa.

²⁶Sa o thulimos te phabară les po altari, sar phabardea o thulimos kata e jertfa le naismasti. Kadea kărăla o rašai anda o šerobaro kodoa o iertimos anda lesti bezex, thai avela ierto.

²⁷Kana varekon anda o poporo bi anavehko bezexardea bi te kamel, kărdindoi so či trăbul anda le mothodimata le Raiehkă, thai kărdea butea kai na trăbunas kărdine thai kărdi'lo kadea došalo,

²⁸thai arăsăl te dičiol pe lesti bezex kai kărdea la, te anel jertfa khă busni bi dukhako, anda e bezex kai kărdea la.

²⁹Te thol pehko vast po šero la jertfako le iertimasti, thai te delašuri ando than kai denpešuri le phabarimata dă sa.

³⁰O rašai te lel le naiesa andoa rat la jertfako, te makhăl le šinga le altarehkă anda le phabarimata dă sa, thai sa o kolaver rat te šoră les kal pînŕă le altarehkă.

³¹O rašai te lel sa o thulimos, sar lel pe o thulimos la jertfako le naismasti, te phabară les po altari, thai oi avela khă khandimatahko čeailo le Raiehkă. Kadea kărăla o rašai e jertfa andoa manuši kadoa, thai iertla pe lehkă.

³²Te anela jertfa iertimasti khă bakrišo, te anel khă rig juwlikani bi dukhadi.

³³Te thol pehko vast po šero la jertfako, thai te delašuri sar jertfa iertimasti ando than kai denpešuri le phabarimata dă sa.

³⁴O rašai te lel le naiesa anda o rat la jertfako, te makhăl lesa le šinga le altarehkă anda le phabaruimata dă sa, ta sa o kolaver rat te šorăl les kal pînŕă le altarehkă.

³⁵O rašai te lel sa o thulimos, sar lel pe o thulimos le bakrišehko andino sar jertfa naismasti, thai te phabarăl les po altari, pa le jertfe phabarde iagatar angloa Rai. Kadea kărăla o rašai andoa manuši kadoa o iertimos la bezexako kai kărdea les, thai iertil la pe lehkă.