Read Kalderash Romani Cornilescu Bible 2020 (Romania) Ieremia 12 Bible Online

Ieremia 12 - Kalderash Romani Cornilescu Bible 2020 (Romania) bible

Ieremia 12

¹„Tu san but čeačio, Raia, kaste xau ma Tusa; kamau vresar te pušau Tu pa le lašardimata Tiră. Anda soste jeanangle o drom kolengo le nasulimatăngo, thai sa le čiordimahkă juwin ande pačea?

²Thodean le, astardine anglunimos, bareon, den rodo. So sî čeačes, sa paše lengă mostar, ta dur lengă illestar!

³Varesar, Tu, Raia, prinjeanes ma, dikhăs ma, rodes muŕo illo thai dikhăs kă sî Tusa. Lele sar varesar bakrean, kai trăbun šinde, thai lašarle andoa des le mudardimahko!

⁴Ji kana te rovel o čem, thai te šuteol e čear pa sa le islazurea? Merăn le jiwine thai le čiriklea andai doši le nasulimatăngo le bešlitorengo. Kă on phenen: „O (Ieremia) nai te dikhăl amaro gor!”

⁵„Kana prastaindoi kolença kai prasten pel pînŕă, on ašaven tu, sar daštisa te les tu koa nakhaimos varesar grastença? Thai kana či pateas tu koa garaimos dă sar ande khă čem ujeardo, so kărăsa pe le riga le phuteardimahkă le Iordanohkă?

⁶Kă orta te phral thai o khăr te daddehko bitinen tu, orta on çîpin le mosa baro pala tute. Na patea le kana phenena tukă orbe amalimahkă.”

⁷„Mekhlem Muŕo khăr, thai meklem Muŕo mandimos, dem Mîŕa kamblimena ando vast lakă dušmaiengă.

⁸O mandimos Muŕo arăslo anda Mande sar khă leo ando văši, xunxuisardea pa Mande; anda kodea či dabadikhau la,

⁹Ta arăslo o mandimos Muŕo anda Mande khă čirikli limasti pestriçome, ande rig saveati tiden pe sal čiriklea le limahkă?” „Jeantar thai tiden sal jiwine le kîmpohkă, anen le kaste xan la!”

¹⁰„Khă baro dindimos bakrerăngo pustiin mîŕî răz, ušteaven mîŕî phuw andel pînŕă; e phuw kutea mîŕî le čeailimasti paruven la ande khă pustimos meklino.

¹¹Pustiin la, thai oi bešel tristome thai pustime angla mande. Soa čem sî pustiime, thai khonikh či lel sama pe leste.

¹²Pa sa le učimata le pustiimahkă aven pustiitorea, kă e sabia le Raiesti xal o čem kata khă gor koa kolaver; thai khonikh nai meklino ande pačea.

¹³Thodine div, thai tiden kanŕă, ašadile bi valosohko.” „Te avel tumengă lajau so tiden, palai xolli e astardi le Raiesti!”

¹⁴„Kadea delduma o Rai pa sal paše mîŕă kola le nasulimatăngă, kai azbaven pe le mandimastar kai dem les le poporohkă Mîŕăhkă le Israelohkă: „Dikta, çîrdaua le anda lengo čem, thai çîrdaua o khăr le Iudahko andoa maškar lengo.

¹⁵Ta pala so çîrdaua le, avelama pale mila lendar, thai anaua le parpale sakoiekhăs ande lehko mandimos, thai sakoiekhăs ande lehko čem.

¹⁶Thai te sîteona le droma Mîŕă poporohkă, te solaxana po Anau Muŕo, phendindoi: „Juwindo sî o Rai! „sar sîkadine Mîŕă poporos te solaxal po Baal, atunčeara avena baxtale ando maškar Mîŕă poporohko.

¹⁷Ta kana či ašunena khanči, xasaraua bimeklimahko khă kadalestar poporo, mudaraua les thai xasaraua les, phenel o Rai.”