Read Kalderash Romani Cornilescu Bible 2020 (Romania) Ieremia 13 Bible Online

Ieremia 13 - Kalderash Romani Cornilescu Bible 2020 (Romania) bible

Ieremia 13

¹„Kadea dea mangă duma o Rai: „Telear ta tin tukă khă brečinari inohko thai tholes pe te tičiuri; ta te na tindearăs les ando pai!”

²Tindem o brečinari, pala o mothodimos le Raiehko, thai thodem les pe mîŕă tičiuri.

³Pala kodea o divano le Raiehko dea mangă duma o duito data, kadea:

⁴„Le o brečinari, kai tindean les, thai saves phangleanles pa te tičiuri, ušti ta, thai jea koa Eufrato, thai garav les oče ando phaŕaimos khă kotorăbaŕăhko.”

⁵Gălemtar, thai garadem les kooa Eufrato, sar phendea mangă o Rai.

⁶Pala mai but des, O Rai phendea mangă: „Ušti ta, telear koa Eufrato, thai le oçal o brečinari, kai mothodemas tukă te garaves les oče!”

⁷Teleardem koa Eufrato, xunadem, thai lem o brečinari andoa than kai garademas les; ta dikta kă o brečinarii sas rimome thai manas lašo khančehko.

⁸O divano le Raiehko dea mangă duma kadeadar:

⁹„Kadea delduma o Rai: „Kadea xasaraua o barimos le Iudahko thai o mîndrimos pai măsura dă baro le Ierusalimohko.

¹⁰O popioro kadoa sî khă poporo nasul: či kamel te ašunel le divanuri Mîŕă, phirăl pala le telerimata lehkă illehkă, thai jealtar pala aver devla, kaste kandel lengă thai te bandeon angla lende; anda kodea arăsăla orta sar o brečinari kadoa, kai manai lašo khančehko!

¹¹Kă, sar astardeol o brečinarii le tičiurendar khă manušehkărăstar, kadea astardilemas Me sal khărăstar le Israelohkărăstar thai sal khărăstar le Iudahkărăstar, phenel o Rai, kaste avel o poporo Muŕo, o Anau Muŕo, o lăudimos Muŕo thai slava Mîŕî; ta či ašunde Ma.

¹²Anda kodea phen lengă le divanuri kadala: „Kadea delduma o Rai, o Dell le Israelohko: „Sa le vasuri pherdeona molleasa!” Thai on pušena tu: „Pateas kă ame či jeanas, kă sa le vasuri pherdeona molleasa?”

¹³Atunčeara phen lengă: „Kadea delduma o Rai: „Dikta, pheraua sa le bešlitoren le čemehkă kadalehkă, le thagaren kai bešen po skamin le raimahko le Davidohko, le rašan, le prooročen, thai sal bešlitoren le Ierusalimohkărăn, pheraua le matimos.

¹⁴Linčearaua le iekh dă avrăn, le dadden thai le šaven andekhthan, phenel o Rai. Či mekaua le, či avela ma milla lendar, khanči či lopînzîla ma te xasarau le.”

¹⁵„Ašunen thai len godi! Na aven mîndrimahkă, kă o Rai del tumengă duma!

¹⁶Den slava le Raiehkă, tumară Devllehkă, ji kana či avel o tuneriko, ji pune či maladeon tumară pînŕă lebaŕlebarăndar la reateakă! Ajukărăna e lumina, ta O paruvela la ande ušal le merimasti, thai paruvela la andekh kalimos andraimahko.

¹⁷Ta kana či kamen te ašunen, rovaua čioreal, andoa mîndreaimos tumaro; bilana mîŕă iakha andel iasfa, anda kă e turma le Raiesti avela nigărdi ande robia.

¹⁸Phen le thagarehkă thai la thagarneakă: „Bešen pe phuw! Kă pelea tumengă poa šero e kununa e thagarni kai kandelas tumengă sar kučimos.”

¹⁹„Le četăçi katar avelodes sî phandade, thai nai kon te pîtrăle. Soa Iuda sî nigărdo ande robia, e, dă ku sa sî nigărdo ande robia.”

²⁰„Vazde ta te iakha thai dikh kolen kai aven katar avelereat. Kai sî e turma kai sas tukă dini, e turma saveatar sanas kaditi dă mîndro?

²¹So phenesa kana thona mai bară pa tute le străinen kodolen kai sîtileanas te aven tukă amal dă pašal? Či astarăna tu le dukha, sar astarăn kha juwlea koa kărimos?

²²Thai kana phenesa ande teo illo: „Andasoste kărdeol pe mangă e buti kadea? „Andai doši le bute tiră bikrisăngo, vazdinisai'le te podea le çoalengă, thai nandeon te kălkia la zorasa.

²³Daštil khă Etiopiano te paruvel pesti morči, or khă pardoso te paruvel pehkă pete? Sa kadea, daština tume te kărăn o mištimos, tume, kai san sîkadine te kărăn o nasul?

²⁴Anda kodea, pharavaua le, sar e poši lini la bravalleatar le pustiimakăreatar.

²⁵Dikta ti bax, e rig kai măsuri tukă la, phenel o Rai, anda kă bîstărdean Ma, thai thodean teo pateaimos ando xoxaimos.

²⁶Anda kodea vazdaua te podea thai daua tukă le poa šero, kaste dičiol pe teo lajau.

²⁷Dikhlem le butkurvărimata thai le xarmintimata tiră, le kurvării le bikrisînime pel pleaia thai pel phuwea, dikhlem te prikăjimata! Au tutar, Ierusalimona! Či kames te ujearăs tu? Sode mai bešesa?”