Read Kalderash Romani Cornilescu Bible 2020 (Romania) Ieremia 14 Bible Online

Ieremia 14 - Kalderash Romani Cornilescu Bible 2020 (Romania) bible

Ieremia 14

¹O Divano le Devllehko, phendino le Ieremiahkă kana sas o staxomos.

²„O Iuda rovel le četăçi lehkă sî pustimena, tristome, thai dukhadine, thai le çîpimata le Iersualimohkă vazden pe.”

³Kola le bară traden kolen le çînŕăn te anen pai, ta kola le çînoŕă, kana jean kal xainga, či arakhăn pai, thai ambolden pe le vasurença nangă: lajeane thai lollearde garaven pehko šero.

⁴E phuw phaŕadeol, anda kă či perăl brîšind ando čem, thai le phuwearea, athade ando ajiukărimos lengo, garaven pehko šero.

⁵Orta i e čerboaika poa kîmpo kărăl thai mekăl pehkă puien, anda kă či arakhăl zălenimos.

⁶Le čiuši le văšune bešen pel thana uče thai nangă, phurdindoi aero sar varesar le sap; bilan lengă iakha, anda kă nai čear.”

⁷„Kana le bikrisa tumară denduma pa tumende, butearăn, andoa Anau Tiro, Raia! Kă le duraimata amară sî but, bezexardeam angla Tute.

⁸Tu, kai san o ajukărimos le Israelohko, o Skăpitorii lehko ando čiro le kamimahko: anda soste te aves khă străino ando čem, sar khă phiritorii, kai šol pe dă sar te nakhavel e reat ande la?

⁹Sostar te aves sar khă manuši baŕuimahko, sar khă zurallo, kai našti kandel ame? Thai varesar, Tu san ando maškar amaro, Raia, thai o Anau Tiro sî akhardo pa amende. Anda kodea na mekh ame!”

¹⁰Dikta so phenel o Rai poa poporo kadoa: „Čeaileole te našen întea thai orde. Či mekăn pehkă pînŕă; anda kodea o Rai nai les čeailimos lendar; akana anel pehkă godi lengă bikrisandar, thai došavel lengă bezexa!”

¹¹O Rai phendea mangă: „Na rudisao andoa poporo kadoa!

¹²Kă, orta kana postina, sa či ašunaua lengă rudimata, thai orta kana anena phabarimata dă sa thai jertfe xabenehkă, či laua le; či kamau te mudarau le la sabiasa, le bokhalimasa thai la čiumasa.”

¹³„Me demanglal: „Uf! Raia Devlla! Dikta kă le prooročea lengă phenen: „Či dikhăna sabia, thai či avela tume bokhalimos; kă o Rai dela tume ando than kadoa khă pačea nikărdimasti.”

¹⁴Ta o Rai deamanglal: „Le prooročea lengă prooročin xoxaimata ande Muŕo Anau; Me či tradem le, či dem le mothodimos, thai či dem lengă duma; ta on prooročin varesar vedenii xoxamne, prooročimata khančehkă, athadimata thai ankaladimata anda lengo illo.

¹⁵Anda kodea kadea delduma o Rai pal prooročea kai barem kă či tradem le Me, prooročin varesar ande Muŕo Anau, thai phenen: Či avela či sabia či bokhalimos ando čem kadoa.” — „Le prooročea kadala avena xasarde mudardine la sabiatar thai le bokhalimastar!

¹⁶Ta kolen, savengă proorčin lengă on, avena tinzome pel uliçî le Ierusalimohkă, bokhalimatar thai sabiatar; či avela kon te prahole, či len, či lengă romnean, či lengă šaven, či lengă šeian; šorau kadeadar o nasulimos lengo pa lende.”

¹⁷„Phen lengă e buti kadea: „Šorăn mîŕă iakha iasfa des thai reat, thai či atărdeon. Kă e šeiebari, e šei mîŕă poporosti sî maladi khă šindimasa but uçîmahko.

¹⁸Kana ankleau koa kîmpo, dau pal manuši pusade sabiatar. Kana šoama ande četatea, dau pa varesar manuši šutearde bokhatar; orta i o prooroko thai o rašai phirăn soa čem, bi te jeanen karing jean.”

¹⁹„Šudean Tu dă sa le Iudas, thai čidabadikhlean Teo dii kaditi dă but o Siono? Anda soste malaves ame kadea, kă manai či khă sastimos anda amende? Çîrdasas ajukărimos pačeako, thai či avel khanči lašo, ajukras khă čiro sastimahko, thai nai dă sar daraimos!”

²⁰„Raia, prinjeanas o nasulimos amaro, thai e bikris amară daddendi; kă bezexardeam angla Tute.

²¹Anda o Anau Tiro, nadin, na de bipativ o skamin le raimahko Tea slavako! Na bîstăr, na phag o phanglimos Tiro amença!

²²Ta sî maškar le idolea le neamurengo vo iekh kai te anel brîšind? Or daštil o čeri te del brîšind? Či des Tu brîšind, Raia, o Dell amaro? Ame ajukăras ande Tute, kă Tu kărdean sa kadala butea!