Read Kalderash Romani Cornilescu Bible 2020 (Romania) Ieremia 26 Bible Online

Ieremia 26 - Kalderash Romani Cornilescu Bible 2020 (Romania) bible

Ieremia 26

¹Koa anglal raimos le Ioiachimohko, o šeau le Iosiahko, o thagar le Iudahko, sas phendino kakoa divano andai rig le Raiesti:

²„Kadea delduma o Rai: „Aši ande bar le Khărăsti le Raiesti, thai phen kolengă kai aven anda sal četăçi le Iudahkă te bandeon ando Khăr le Raiehko, sa le divanuri kai mothoau tukă te phenes le; na mekh či khă divano anda lende.

³Daštil pe kă ašunena, thai amboldena pe sakogodi katoa drom lehko o nasul; atunčeara kăiua Ma le nasulimatăstar, kai dauas Ma godi te kărau les andai doši lengă kărdimatăngă le nasulimahkă.”

⁴Te phenes lengă: „Kadea delduma o Rai: „Kana či ašunen Ma kana mothoau tumengă te phirăn palai Kris Mîŕî, kai thodem tumengă la anglal;

⁵kana či ašunen le divanuri Mîŕî robengă le prooročengă, saven tradau tumengă le, saven tradem tumengă le kana phaŕadeododes, thai saven či ašundean le,

⁶Atunčeara kăraua le Khărăhkă kadalehkă sar kărdem le Silohkă, thai kăraua andai četatea kadea khă buti armaiati anda sa le neamuri la phuweakă.”

⁷Le raša, le prooročea, thai soa poporo ašundine le Ieremias phendindoi kadala divanuri ando Khăr le Raiehko.

⁸Thai kana isprăvisardea phendimahko o Ieremia sa so mothodeasas lehkă o Rai te phenel sa le poporohkă, le raša, le prooročea, thai soa poporo, thodine o vast pe leste, thai phendine: „Trăbul te merăs biathadimahko!”

⁹Anda soste prooročis ando Anau le Raiehko, thai phenes: „O Khăr kadoa arăsăla sar o Silo, thai četatea kadea avela pustiime thai bi bešlitorengo?” Soa poporo tidea pe ande rig le Ieremiasti ando Khăr le Raiehko.

¹⁰Kana ašundine le šerălebară le Iudahkă kadala butea, ankăste andoa khăr le thagarehko koa Khăr le Raiehko, thai bešline koa udar kukoa o nevo le Khărăhko le Raiehko.

¹¹Atunčeara le raša thai le prooročea dineduma kadea le šerălebarăngă thai sa le poporohkă: „O manuši kadoa sî došalo le došimasa le mullimahko; kă prooročisardea pai četatea kadea, sar ašundean orta tume tumară kanença!”

¹²O Ieremia phendea sa le šerălebarăngă thai sa le poporohkă: „O Rai tradea ma te prooroči poa Khăr kadoa thai pai četatea kadea sa le butea kai ašundean le tume.

¹³Akana orton tumară droma thai tumară kărdimata, ašunen o mui le Raiehko, le Devllehko tumarăhko, thai o Rai kăila pe le nasulimatăstar kai phendea les pa tumende!

¹⁴Sode pa mande, dikta ma andel vast tumară; kărăna mangă so fala tumengă kă sî mišto thai čeačio.

¹⁵Dăsar te jeanen kă, te mudarăna ma kărdeona došale ratestar bidošalo, tume, e četatea kadea thai lakă bešlitorea; kă o Rai tradea ma ande čeačimaste tumende te phenau ando ašundimos tumaro sa kadala divanuri!”

¹⁶Le šerălebară thai soa poporo phendine le rašangă thai le prooročengă: „O manuši kadoa nai došalo le merimasa; kă deamengăduma ando Anau le Raiehko, amară Devllehko!”

¹⁷Thai iekh anda le phură le čemehkă uštile, thai phendine sa le tidimahkă le poporohkă:

¹⁸„O Mika andoa Moršet prooročilas po čiro le Ezechiahko, o thagar le Iudahko: „Kadea delduma o Rai le oštirengo: „O Siono avela arome sar khă phuw, o Ierusalimo arăsăla khă gomilabarăndi, thai o baŕobaro le Khărăhko le Raiehko khă učimos garadino văšença.”

¹⁹Ta mudardea les kadea o Ezechia, o thagar le Iudahko, thai soa Iuda? Či darai'lo o Ezechia le Raiestar? Thai atunčeara o Rai kăisai'lo le nasulimatăstar kai phendeasas les pa lende. Thai ame te pharearas amaro duxo kha bikrisako kaditi dă bari?”

²⁰(Ta mai sas khă manuši kai prooročilas ando Anau le Raiehko: o Uria, o šeau le Šemaiahko, andoa Chiriat-Iearim. O prooročisardea pai četatea kadea thai poa čem kadoa orta sa kodola butea sar o Ieremia.

²¹O thagar o Ioachim, sal zuralle lehkă, thai sa le šerălebară lehkă, ašundine le divanuri lehkă, thai o thagar rodea te mudarăles. Ta o Uria, kai sas lehkă phendini e buti kadea, darai'lo, našlo thai gălo ando Ejipto.

²²O thagar o Ioachimo tradea varesar manuši ando Ejipto thai kadea: le Elnatanos, o šau le Akoborohko, thai pe avrăn andekhthan lesa ando Ejipto.

²³Kadala ankaladine andoa Ejipto le Urias thai andine les koa thagar o Ioachim, kai mudardea les la sabiasa, thai šudea lehko stato o mullo ande le thanalemullengă le šavengă le poporohkă.)

²⁴Ta o vast le Axikamohko, o šau le Šafanohko, sas le Ieremiasa, thai o či mekleas te avel dino ando vast le poporohko kaste avel mudardo.