Read Kalderash Romani Cornilescu Bible 2020 (Romania) Ieremia 7 Bible Online

Ieremia 7 - Kalderash Romani Cornilescu Bible 2020 (Romania) bible

Ieremia 7

¹Dikta o divano dinoduma le Ieremiahkă, andai rig le Raiesti:

²„Beši koa udar le Khărăhko le Raiehko, vestisar oče o divano kadoa, thai phen: „Ašunen o Divano le Raiehko, sal murši andoa Iuda, kai šon tume pe kadala udara, kaste bandeon angloa Rai!”

³„Kadea delduma o Rai le oštirengo, o Dell le Israelohko: „Orton tumară droma thai le kărdimata, thai mekaua tume te bešen ando than kadoa.

⁴Na pravardeon ajukărimatănça athadimahkă, phendindoi: „Kadoa sî o Templo le Raiehko, o Templo le Raiehko, o Templo le Raiehko!”

⁵„Kă dă sar kana ortona tumară droma thai le kărdimata, kana kărăna o čeačimos iekh anda aver,

⁶kana či mai mekănazuralimos po străino, pel bidadehko thai pe phiwli, kana či šorăna rat bidošalo ando than kadoa, thai kana či jeana pala aver devla, karing o bibaxtalimos tumaro,

⁷dă sar kadea mekaua tume te bešen ando than kadoa, ando čem kai demles tumară daddengă, andae vecničia ji ande vešničia.

⁸Ta dikta kă tume pravardeon ajukărimatănça xoxaimahkă, kai či kanden khančeste.

⁹Sar? Čiorăn, mudarăn, butkurvărin, solaxan bangăs, anen tămîia koa Baal, jean pala aver devla kai či prinjeanen le! …

¹⁰Thai pala kodea aven te dikhautume angla Mande, ando Khăr kadoa pa sao sî akhardo o Anau Muŕo thai phenen: „Sam skăpisardine!” … ta pale te kărăn sa kadala prikăjimata!

¹¹„Sî o Khăr kadoa pa sao sî akhardo Muŕo Anau, khă thanšudrto čiorăngo angla tumende?” „Me orta dikhau e buti kadea, phenel o Rai!”

¹²Jeantar kadeadar ando than kai sas Mangă rudimahko ando Silo, kai thodemas mai dămult te bešel o Anau Muŕo, thai dikhăn so kărdem leghkă, andai doši le nasulimasti le poporosti Mîŕăsti le Israelosti!

¹³„Thai akana, anda kă kărdean sa kadala kărimata, phenel o Rai, anda kă dem tumengă duma kana pharadeol o des, thai či ašundean, anda kă akhardem tume thai či deananglal,

¹⁴kăraua le Khărăhkă pa sao sî akhardo Muŕo Anau, ande sao thon tumaro pateaimos, thai le thanehkă kai dem les tumengă thai tumară daddengă, kăraua lengă orta sar kărdem ando Silo.

¹⁵Thai šudaua tume kata Muŕo Mui, sar šudem sa tumară phralen, sai sămînça le Efraimosti!”

¹⁶„Ta tu na šutu andoa poporo kadoa, na vazde či manglimata, či rudimata anda lende, thai na mang paša Mande; kă či ašunaua tu!

¹⁷Či dikhăs so kărăn on ande le četăçi le Iudahkă, thai pel uliçi le Ierusalimohkă?

¹⁸Le šaoŕă tiden kašt, le dadda astarăn e iag, le juwlea kovlearăn o aŕo, kaste kărăn melea la thagarneakă le čeresti, thai te šorăn jertfe pimahkă avră devlengă, kaste xollearăn Ma.”

¹⁹„Ta Man xollearăn Ma on? Phenel o Rai; na orta len, karing lengo lajau?”

²⁰„Anda kodea, kadea delduma o Rai: „Dikta, e xolli thai e arman Mîŕî šordeona pe poa than kadoa, pal manuši thai pal jiwine, pal kašt poa kămpo thai pal roade la phuweakă; thai phabola, thai či mudardeola.”

²¹„Kadea delduma o Rai le oštirengo, o Dell le Israelohko: „Thon le phabarimata tumară dă sa kal jertfe tumară, thai xan lengo mas!

²²Kă či demduma khanči tumară daddença thai či dem le či khă mothodimos dikhlimasa kal phabarimata dă sa thai kal jertfe, ando des kana ankaladem le andoa čem le Ejiptohko.

²³Ta dikta o mothodimos kai dem les: „Ašunen o mui Muŕo, thai Me avaua o Dell tumaro, ta tume avena o poporo Muŕo; phirăn pe sal droma kai mothodem tumengă, kaste aven baxtale.”

²⁴Ta on či ašundine, thai či line godi, ta line pe palal phendimata thai le telerimata lengă illehkă le nasulimahkă, dine parpale thai či găline angle.

²⁵Andoa des kana ankăste tumară dadda andoa Ejipto, ji ando des dă adesara, tradem tumengă sa Mîŕă kanditoren, le prooročea, tradem le ande sako des, dă droboitu.

²⁶Ta on či ašunde Ma, či line godi; çăpenisarde e koŕ, thai kărdine mai nasul dă sar lengă dadda.

²⁷Thai orta kana phenesa lengă sa kadala butea, sa či ašunena tu; thai te çîpisa pe lende, či dena tu anglal.

²⁸Anda kodea, phen lengă: „Kadoa sî o poporo kai či ašunel o mui le Raiehko, pehkă Devllehko, thai sao či kamel te lel sîkaimos; gălotar o čeačimos, našlo anda lengo mui.”

²⁹„Akana, mîŕau te ball, Ierusalime, thai šudele dur; ankli pel učimata, thai kăr khă dilabaimos roimahko! Kă o Rai šudel thai dureol le neamostar le manušengo, kai astarde lesti arman.

³⁰Kă le šave le Iudahkă kărdine so sî nasul angla Mande, phenel o Rai; thodine le prikăjimata lengă ando Khăr pa sao akharăl pe Muŕo Anau, kaste marin les.

³¹Vazdine i thana učimahkă ando Tofeto, ande xar e Ben-Xinom, kaste phabarăn ande iag pehkă šaven thai pehkă šeian: buti kai Me či mothodem lengă, thai čina či nakhlea Mangă andai godi.”

³²„Anda kodea, aven des, phenel o Rai, kana či mai phenela pe Tofet thai e xar Ben-Xinom, ta phenela pe e xar le mudarimasti, thai praxona pe le mulle ando Tofet, anda o lipsomos thanehko.

³³Le staturea le mulle kadale poporohkă avena o pravardimos le čirikleango le čerehko thai le jiwinengo la phuweakă; thai khonikh či daravela le.

³⁴Kăraua kadea te atărdeol andel četăçi le Iudahkă thai pel uliçi le Ierusalimohkă, le çîpimata le bukurimahkă thai le çîpimata le vesălimahkă, le dilabaimata le tărnehkă thai le dilabaimata la tărneakă, kă o čem arăsăla khă pustiimos!”