Read Kalderash Romani Cornilescu Bible 2020 (Romania) Ezechiel 1 Bible Online

Ezechiel 1 - Kalderash Romani Cornilescu Bible 2020 (Romania) bible

Ezechiel 1

¹Ando trinto bărši, ando panjto des le šonehko štarto, ta kana sîmas maškar le astarde le mardimahkă kata o nanilaši o Šebar, pîtărdi'le le čerurea, thai sasma dikhlimata devlikane.

²Ando panjto des le šonehko — sas ando panjto bărši la robiako le thagarehko le Ioiachimohko, —

³O Divano le Raiehko deaduma le Ezechielohkă, o šeau le Buziehko, o rašai, ando čem le Xaldeiengo, paša o nanilaši o Chebar; thai oče avilo o vast le Raiehko pa leste.

⁴Dikhlem, thai dikta kă avileas kataravelereat khă bravall bari, khă noro thullo, thai khă drăz iagati, kai šudelas ande sal riga khă lumina străfeaimasti, ando maškar saveako dudearălas sar khă xarkuma lučime, kai anklelas andoa maškar la iagako.

⁵Sa ando maškar, mai dičiolas štar juwindimata juwinde, savengo ameazaimos sas les khă ameaimos manušehko.

⁶Sakoiekh anda lende sas les po štar tipuri, thai sakoiekh sas les po štar phaka.

⁷Le pînŕă lengă sas orta, thai e šulbiça le pînŕăndi lendi sas sar le pînŕăsti khă guruwiçăsti, thai străfeanas sar varesar xarkuma lučime.

⁸Talal phaka, le kole štară rigăndar lengă, sas le varesar vast manušehkă; thai sa li štar sas le po štar tipuri thai phaka.

⁹Lengă phaka sas astarde iekh la kolavreatar. Thai kana phirănas, či amboldenas pe ande či khă rig, ta sakoiekh jealas orta angle.

¹⁰Sode poa tipo lengă muiengo sas kadea: anglal, saoŕă sas le po khă mui manuxšehko, koa čeačio lengo, sa štar sas le po khă mui leohko, koa bičeačio lengo, sa štar sas le po khă mui guruwehko, ta parpale, sa štar sas le po khă mui vulturohko.

¹¹Le phaka sakoiekhăkă sas tinzome opră, kadea kă dui anda lengă phaka arăsănas ji ka kola le pašarde, ta dui garavenas lengă staturea.

¹²Sakoiekh jealas orta angle, thai kadea karing tradelas le o duxo te jean, karing oče jeanas; ta ando phirimos lengo či amboldenas pe ande či khă rig.

¹³Ando maxškar kadale juwindimatăngo juwinde sas vareso sar angar iagakă astarde, kai phabonas; thai varesar sar paraiagăngă phirălas orde thai întea maškar kadala juwindimata juwinde; e iag kadea šudelas khă lumina străfeaimasti, thai anda leste anklenas trăsneturi.

¹⁴Ta le juwindimata juwinde kana prastenas thai amboldenas pe, sas sar o trăsneto.

¹⁵Dikhauas ka kadala juwindimata juwinde, thai dikta kă pe phuw, avri andal juwindimata le juwinde, sas po khă roata ka sakoiekh anda lengă štar tipuri lengă.

¹⁶O ameazaimos kadale roatengo thai o materialo anda save sas kărde amealas xrisolitohko, thai sa lištar sas le sa kodoa kărdimos. O ameaimos thai o kărdimos lengo sas kadea modako ta sako roata amealas kă sî ando maškar avrea roatako.

¹⁷Kana jeanas, prastenas pe sal štar riga lengă, thai či amboldenas pe dăfel anda lengo phirimos.

¹⁸Sas le varesar obezi khă učimahko daraimahko, thai pe lengă obezi, kola štar roate sas pherde iakha dă sal rigăndar.

¹⁹Kana phirănas le juwindimata le juwinde, phirănas i le roate paša lende, thai kana vazdenas pe le juwindimata le juwinde katai phuw, vazdenas pe i le roate.

²⁰Kai tradelas le o duxo te jean, oče jeanas, karing kamelas o duxo; thai andekhthan lença vazdenas pe i le roate, kă o duxo le juwindimatăngo juwinde sas andel roate.

²¹Kana jeanas le juwindimata le juwinde, jeanas i le roate; kana atărdeonas on, atărdeonas i le roate; kana vazdenas pe pai phuw, vazdenas pe i le roate; kă o duxo le juwindimatăngo le juwinde sas andel roate.

²²Opral pal šeră le juwindimatăngo le juwindengo sas vareso sar khă tinzomos le čerehko, kai amealas le kristalosa străfeaimahkărăsa, thai tinzolas pe ando aero opră pa lengă šeră.

²³Tala o čerii kadoa, le phaka lengă bešenas orta, tinzome iekh karing e kolaver, thai mai sas ka sakoiekh po dui phaka, kai garavenas lengă staturea.

²⁴Kana phirănas, ašundem o vîjimos lengă phakăngo, sar o vîjimos le paiengo le barăngo, thai sar o mui le Kolehko Asazurallehko. Kana phirănas, sas khă vuieto muialimahko sar kha oštireako; ta kana atărdeonas, peravenas pehkă phaka tele.

²⁵Thai avelas khă vuieto kai telearălas dă opral le čerehko tinzome pa lengă šeră; ta kana atărdeonas mekănas pehkă phaka tele.

²⁶Opral o čerii kai sas pa lengă šeră, sas vareso sar khă baŕ safirohko, ando tipo khă skaminehko raimahkărăhko; pe kadoa tipo skaminehko dičiolas khă tipo manušehko kai bešelas pe leste.

²⁷Mai dikhlem pale khă străfeaimos xarkumako lučisardo sar varesar iag, andral saveako sas o manuši kadoa, thai sao străfealas anda sal riga; dă kata o tipo le lehkă ŕîničengo ji opră, thai kata o tipo le rîničengo lehkă ji tele, dikhlem sar khă moda iagati, thai anda sal riga sas dinoroata kha luminatar străfeaimahkăreatar.

²⁸Sar o dičimos le dikhlehkolečerehko, kai bešel ando noro andekh des brîšindehko, kadea sas i o ameaimos kadala luminako străfeaimahkăreako, kai delalesroata. Kadea sas o sîkaimos la slavako le Raiehkăreako. Kana dikhlem les, pelem le mosa pe phuw, thai ašundem o mui Iekhăhko kai delasduma.