Read Kalderash Romani Cornilescu Bible 2020 (Romania) Ezechiel 11 Bible Online

Ezechiel 11 - Kalderash Romani Cornilescu Bible 2020 (Romania) bible

Ezechiel 11

¹O Duxo čiordea ma, thai nigărdea ma koa udar le lulludearimahko le Khărăhko le Raiehko, kai rodel karing lulludearălokham. Thai dikta kă koa šutimos le udarăhko, sas biš thai panji manuši, thai ande lengo maškar dikhlem le Iaazanias, o šeau le Azurohko, thai le Petalias, o šeau le Benaiahko, le šerălebară le poporohkă.

²Thai o Rai phendea mangă: „Šeau le manušehko, kadala sî le manuši kai kărăn le planuri bikrisakă, thai den phendimata nasulimahkă ande četatea kadea!

³On phenen: „Nai dă sar o čiro o lašardo kaste vazdas khăra! E četatea sî o kăzano, thai ame sam o mas.”

⁴Anda kodea prooročisar pa lende, prooročisar, šeau le manušehko!”

⁵Atunči o Duxo le Raiehko pelo pa mande, thai phendea mangă: „Kadea denduma tume, khăr le Israelohko! Thai so avela tumengă ande godi, jeanau but mišto!

⁶Kărdean khă butimos mudardimatăngo ande četatea kadea, thai pherdean le uliçi kolença le mudardença.

⁷Anda kodea, kadea delduma o Rai, o Dell: „Le mulle tumară kai tinzosardean le ando maškar kadala četateako, sî o mas, thai oi sî o kăzano; ta tume avena ankalade avri anda late.

⁸Daran la sabiatar, ta Me anaua e sabia pa tumende, phenel o Rai, o Dell.”

⁹„Ankalavaua tume andai četatea kadea, daua tume ando vast le străinengo, thai pheraua le krisa Mîŕă pa tumende!

¹⁰Perăna malade la sabiatar, krisîniua tume, kai riglaphuweati le Israelosti, thai jeanena kă Me sîm o Rai.

¹¹E četatea kadea či avela o kăzano tumaro, thai tume či avena o mas anda leste: ta kai riglaphuweati le Israelosti krisîniua tume!

¹²Thai jeanena kă Me sîm o Rai, savehkă mothodimata či phiradean le, thai savehkă krisa či pherdean le, ta kărdean buti pala le nikărdimata le neamurengă kai den tume rig.”

¹³Ta kana prooročiuas me, mullo o Pelatia, o šeau le Benaiahko. Me pelem le mosa kai phuw, thai çîpisardem muiesa zuralesa: „Au! Devlla raia, kames te xasarăs Tu so mai ašileas andoa Israelo?”

¹⁴Thai o Divano le Raiehko dea mangă duma kadea:

¹⁵„Šeau le manuxšehko, le phral tiră, e, le phral tiră, kola andai robia, thai soa khăr le Israelohko, sî kola pa save phenen le bešlitorea le Ierusalimohkă: „On sî dur le Raiestar, o čem sas dino amengă ando stăpînimos!…”

¹⁶Anda kodea phen pa lende: „Kadea delduma o Rai, o Dell: „Kana nikrau le durearde maškar le neamurea, kana phaŕadem le ande bute čema, varesar sîmas lengă khă Templo anda varesar čiro, ando čem ande sao aviline.

¹⁷Anda kodea te phenes lengă: „Kadea delduma o Rai o Dell: „Tidaua tume andoa maškar le popoarăngo, tidaua tume pale andal čema ande save san phaŕadine, thai daua tume o čem le Israelohko.

¹⁸Thai kana avena ande leste, ankalavena oçal sal idolea thai sal prikăjimata.

¹⁹Daua le aver illo, thai thoaua khă duxo neo ande tumende. Laua anda lengo stato o illo le baŕăhko, thai daua le khă illo masăhko,

²⁰kaste phirăl pala Mîŕă mothodimata, te arakhăl thai te pherăl le krisa Mîŕă; thai on avena o poporo Muŕo, thai Me avaua o Dell lengo.

²¹Ta kolengă savengo illo atearăl čeailimos andal idolea thai lengă prikăjimata, amboldaua lengă kărdimata pa lengo šero, phenel o Rai o Dell.”

²²Pala kodea le xeruvimea tinzosarde pehkă phaka, aviline le roatença, thai slava le Devllesti le Israelosti sas opral pa lende.

²³E slava le Raiestui vazdinisai'li andoa maškar la četateako, thai thodea pe po baŕobaro kata o lulludearimos la četateako.

²⁴Ta man lea ma o Duxo thai nigărdea ma pale, ando dikhlimos, andoa Duxo le Devllehko, ande Xaldea, kal astarde le mardimahkă. Thai kadea o dikhlimos, kai sas ma, xasai'lo mandar.

²⁵Palakodea phendem le astardengă le mardimahkărăngă sa le butea, kai sîkadeasas mangă le o Rai.