Read Kalderash Romani Cornilescu Bible 2020 (Romania) Ezechiel 14 Bible Online

Ezechiel 14 - Kalderash Romani Cornilescu Bible 2020 (Romania) bible

Ezechiel 14

¹Varesar andal phură le Israelohkă avile mande thai bešline angla mande.

²Thai o Divano le Raiehko dea mangă duma kadea:

³„Šeau le manušehko, le manuši kadala phiraven pehkă idolea ando illo, thai karfon pehkă iakha karing so kărdea lengă kaste perăn ande bikris! Te mukau Ma Me te avau pušlino lendar?

⁴Anda kodea delengăduma, thai phen lengă: „Kadea delduma o Rai, o Dell: „Orsao manuši andoa khăr le Isaraelohko, kai phiravel pehkă idolea ando illo, thai sao karfol pehkă dikhlimata karing so kărdea les te perăl ande pesti bikris — kana avela te delduma le proorokohkă, — Me, o Rai, daua les anglal, ande xolli bute lehkă idolengă,

⁵kaste astarau orta ande lehko illo koles andoa khăr le Israelohko, kai duri'le mandar andai doši sa le idolengo.

⁶Anda kodea, phen le khărăhkă le Israelohkă: „Kadea delduma o Rai, o Dell: „Ambolden tume, thai den tume rigate katal idolea tumară, ambolden tumară dikhlimata kata sal prikăjimata tumară!

⁷Kă orsao manuši andoa khăr le Israelohko, or andal străinea kai bešen andakh čiro ando Israelo, kai duri'le Mandar, kai phiraven pehkă idolea ande pehko illo, thai či lel pehkă dikhlimata kata so kărdea les te perăl ande bikris lesti, — kana avela te delduma khă proorokohkă, kaste pušel Ma anda leste, — Me, o Rai, orta anda Mande daua les anglal.

⁸Amboldaua Muŕo Mui poa manuši kodoa, kăraua lehkă khă sămno pomenimahko, thai xasaraua les bimeklimahko andoa maškar Mîŕă poporohko. Thai jeanena kă Me sîm o Rai!

⁹Kana o prooroko mekăla pe xoxado te phenel khă divano, Me, o Rai, athadem le proorokos kodoles; Tinzoua Muŕo vast pa leste, thai xasaraua les andoa maškar Mîŕă poporohko le Israelohko.

¹⁰Phiravena kadea lendi bezex, thai o došimos le proorokohko avela sa kadeasar o došimos kolehko kai puše les,

¹¹kaste na mai xasarăl Mandar o khăr le Israelohko, thai te na mai maril pe sa le bikrisăngo lengărănça. Atunčeara avena o poporo Muŕo, thai Me avaua o Dell lengo, phenel o Rai, o Dell!”

¹²O Divano le Raiehko dea mangă duma kadea:

¹³„Šeau le manušehko, kana bezexarăla ăkh čem pa Mande, dindoi pe kal bikris, thai tinzoua Muŕo vast pa leste, — kana linčearaua e rowli le manŕăsti, kana tradaua lengă o bokhalimos, kana xasaraua le biatărdimahko le manušen thai le juwindimatăn,

¹⁴Orta te avino ando maškar lehko kadala trin manuši: o Noia, o Danielo thai o Iovo, on nahkă skăpisarăn dă sar lengo duxo ando bibezexalimos lengo, phenel o Rai, o Dell.”

¹⁵Te mekaua ta o čem te avel nakhadino le jiwinendar le văšune, kai mekăna la bi poporohko, te araslino khă pustimos katar nakhă mai nakhăl khonikh, andai buti kadale jiwinengo,

¹⁶thai te mai avino ande lako maškar kadala trin manuši, pe čivava Mîŕî, phenel o Rai, o Dell, kă nahkă skăpisarăn či šave, či šeia, ta dă sar on skăpisarăna, thai o čem arăsăla khă pustimos.

¹⁷Or kana te anaua e sabia poa čem kadoa, kana phenaua te nakhăl e sabia andoa čem, kana xasarauas le biatărdimahko le manušen thai le jiwinen,

¹⁸thai te avino ande lehko maškar kadala trin manuši, pe čivava Mîŕă, „phenel o Rai, o Dell, kă či skăpisarăna či šave, či šeia, ta dăsar dă sar on korkoŕo skăpisarăna.

¹⁹Or kana te tradaua e čiuma ando čem kadoa, te šoraua Mîŕî arman pa leste ando merimos, kaste xasarau le biatărdimahko le manušen thai le jiwinen,

²⁰thai te avino ando maškar lehko, o Noia, o Danielo thai o Iov, pe čivava Mîŕî, phenel o Rai, o Dell — kă nahkă skăpisarăn či šave, či šeia, ta dăsar on skăpisarăna pehko duxo andoa bibezexalimos lengo.”

²¹Ta varesar, kadea delduma o Rai o Dell: „Barem kă tradau poa Ierusalimo kola štar došimata barimahkă Mîŕă: e sabia, o bokhalimos, le jiwine le văšune thai e čiuma, kaste xasarau biarakhaimahko anda leste le manušen thai le jiwinen,

²²sa avela khă ašimos kai skăpila, kai anklela anda leste, thai kadea: šave thai šeia. Dikta, kadala avena tumende, dikhăna lengo phirimos thai lengă kărdimata, thai kovleona andoa bibaxtalimos kai anau les poa Ierusalimo, anda sa so anau pa leste.

²³On kovlearăna tume, kana dikhăna lengo phirimos thai lengă kărdimata, thai prinjeanena kă na bi čeačimahko kărau Me sa so kărau poa Ierusalimo, phenel o Rai, o Dell.”