Read Kalderash Romani Cornilescu Bible 2020 (Romania) Ezechiel 2 Bible Online

Ezechiel 2 - Kalderash Romani Cornilescu Bible 2020 (Romania) bible

Ezechiel 2

¹O phendea mangă: „Šeau le manušehko, aši ande pînŕănde, thai daua tukă duma!”

²Sar dea mangă duma kadala divanuri, šutea pe duxo ande mande, thai kărdea ma te ašeau ande pînŕănde; thai ašundem ka Kokoa kai delas mangă duma.

³O phendea mangă: „Šeau le manušehko, tradau tu kal šave le Israelohkă, ka kadala „popoare muithulle”, kai vazdinisai'le pa Mande; on thai lengă dadda bezexarde angla Mande, ji ando des dă adesara.

⁴E, kal šave kadala kai tradau tu, sî bilajawehko thai le illesa baŕuno. Tu te phenes lengă: „Kadea delduma o Rai, o Dell!”

⁵Avela kă ašunena, avela kă či acunena, — kă sî ăkh khăr muithullengo — jeanena varesar kă ando maškar lengo sî khă prooroko.

⁶Tu, šeau le manušehko, te na daras lendar, čina te na daras lengă divanurendar; thai barem kă on sî varesar ruguri thai kanŕă paša tute, thai barem kă bešes andekhthan varesar skorpiença, varesar na dara lengă divanurendar thai na darao lengă muiendar, kă sî ăkh khăr muithullengo.

⁷Ta te phenes lengă Mîŕă divanuri, avela kă ašunena, avela kă či ašunena; kă sî varesar muithulle!

⁸Tu kadea, šeau le manušehko, ašun so phenau tukă! Na av muithullo, sar kadoa khăr le muithullengo! Pîtăr teo mui, thai xa so daua tu!”

⁹Dikhlem, thai dikta kă ăkh vast sas tinzome karing mande, thai nikrălas khă lill ando tipo khă sulohko.

¹⁰Pîtărdea les angla mande, thai sas ramome andral thai avreal; ande leste sas ramome jelimata, roimata thai vatimata.