Read Kalderash Romani Cornilescu Bible 2020 (Romania) Ezechiel 20 Bible Online

Ezechiel 20 - Kalderash Romani Cornilescu Bible 2020 (Romania) bible

Ezechiel 20

¹Ando eftato bărši, ando des o dešto, le šonehko panjto, iekh andal phură le Israelohkă avile mande kaste pušen le Raies, thai bešline angla mande.

²Thai o Divano le Raiehko deamangăduma kadea:

³„Šeau le manušehko, deduma le phurăngă le Israelohkărăngă, thai phen lengă: „Kadea delduma o Rai, o Dell: „Te pušen avilean Ma? Pe čivava Mîŕî, kă či mekaua Ma te avau pušlo tumendar, phenel o Rai, o Dell.”

⁴„Kames te krisînis le, šeau le manušehko? Kana kames te krisînis le, tho lengă anglal sa le prikăjimata lengă daddengă!

⁵Phen lengă: „Kadea delduma o Rai, o Dell: „Ando des kana alosardem le Israelos, vazdem Muŕo vast karing e sămînça le khărăsti le Iakovosti, thai sîkadilem lengă ando čem le Ejiptohko; vazdem Mangă o vast karing lende, thai phendem: „Me sîm o Rai, o Dell tumaro!”

⁶Ando des kodoa, Vazdem Muŕo vast karing lende, kaste nigrau le andoa čem le Ejiptohko ande khă čem, kai rodemas les anda lende, čem ande sao thavdel thud thai avdin, o mai šukar anda sal čema.

⁷Atunči phendem lengă: „Šuden sakogodi le prikăjimata kai çîrden tumară dikhlimata, na marisaon le idolença le Ejiptohkărănça! Me sîm o Rai, o Dell tumaro!”

⁸Ta on amboldinisai'le pa Mande, thai či kambline te ašunen Ma. Či iekh či šudea le prikăjimata, kai çîrdenas lehkă dikhlimata, thai či dinerigate le idolea le Ejiptohkă. Atunči thodem ando gîndo te šorau Mîŕî xolli pa lende, te atărdearau Mîŕî xolli pa lende, ando maškar le čemehko le Ejiptohko.

⁹Ta sas Ma ando dikhlimos o Anau Muŕo, kaste na avau marime andel iakha le neamurengo maškar kai arakhadeonas, thai angla save săkadilemas lengă, kaste ankalavau le andoa čem le Ejiptohko.

¹⁰Thai ankaladem le kadea andoa čem le Ejiptohko, thai nigărdem le ando pustiimos.

¹¹Dem le Mîŕă krisa, thai kărdem lengă prinjeande Mîŕă mothodimata, kai trăbul te pherăle o manuši, kaste trail anda lende.

¹²Dem le i Mîŕă Savaturi, te avel khă sămno maškar Mande thai lende, anda kaste jeanen kă Me sîm o Rai, kai sfinçole.

¹³Ta o khăr le Israelohko vazdinisai'lo pa Mande ando pustiimos. Či găline palal krisa Mîŕă, kai trăbulas te pherăle o manuši, kaste trai ande lende, thai marisarde Mangă pai măsura dă but le Savaturi Mîŕă. Atunči sas Ma ande godi te šorau Mîŕî xolli pa lende ando pustiimos, kaste xasarau le.

¹⁴Ta sas Ma ando dikhlimos o Anau Muŕo, kaste na avau marime andel iakha le neamurengă angla save ankalademas le andoa Ejipto.

¹⁵Orta i ande pustia kana vazdem Muŕo vast karing lende thai solaxadem kă nigrauas le ando čem kai mothodemas, čem ande sao thavdel thud thai avdin, o mai šukar čem anda sal čema;

¹⁶thai kadea anda kă šudine le mothodimata Mîŕă thai či phirdine pala Mîŕă krisa, thai anda kă marisarde Mîŕă Savaturi, kă lengo illo či duri'lo kata lengă idolea.

¹⁷Ta dikhlem milasa karing lende, či xasardem'le, thai či linčeardem'le ande pustia.

¹⁸Atunčea phendem lengă šavengă ando pustiimos: „Na len tume palal lašardimata tumară daddengă, na nikărăn lengă divanuri, thai na marisarăn tume lengă idolença!

¹⁹Me sîm o Rai, o Dell tumaro; phirăn orta palal lašardimata Mîŕă, arakhăn Mîŕă mothodimata, thai pherăn le.

²⁰Sfiçîsarăn le Savaturi Mîŕă, kă on sî khă sămno maškar Mande thai tumende, kaste jeanen kă Me sîm o Rai, o Dell tumaro!”

²¹Ta le šave amboldinisai'le i on pa Mande. Či phirde pala le lašardimata Mîŕă, či arakhline thai či pherdine le mothodimata Mîŕă, kai trăbul te pherăle o manuši, kaste trail anda lende, thai marisade le Savaturi Mîŕă. Atunčeara sas Ma ande godi te šorau Mîŕî arman pa lende, te atărdearau Mîŕî xolli pa lende ande pustia.

²²Ta çîrdem Muŕo vast parpale, thai sas Ma andel iakha o Anau Muŕo, kaste na avel prikăjime anglal neamuri angla save ankalademas le andoa Ejipto.

²³Ande pustia, vazdem pale Muŕo vast karing lende, thai solaxadem lengă kă sî te pharavau'le maškar le neamurea, thai te šudau le maškar mai but čema,

²⁴anda kă či pherdine le mothodimata Mîŕă, thai šudine le sîkaimata Mîŕă, thai ambolde pehkă iakha karing le idolea lengă daddengă.

²⁵Ta dăsar dem le i krisa kai nas laše, ta mothodimata anda save naštinas te traisarăn.

²⁶Marisardem le andal pativa lengă le xabenehkă, kana nakhavenas andai iag sa lengă anglal kărdinen; kamblem te došarau le kadea, thai te sîkavau lengă kă Me sîm o Rai.”

²⁷„Anda kodea, šeau le manuxšehko, deduma le kghărăhkă le Israelohkă, thai phen lengă: „Kadea delduma o Rai, o Dell: „Tumară dadda prsaine Ma i mai but, sîkadindoi le bipateamne angla ande.

²⁸Thai dăsar, kana nigărdem le ando čem kai solaxademas kă daua lengă les, thai on šudine pehkă iakha karing orsao pleai učio thai karing orsao kašt patriamahko, oče andine pehkă jertfe, oče andine pehkă pativa le xabenehkăkai xollearănas Ma, oče phabarde pehkă miresme khă khandimahko čeailo, thai oče šordine pehkă jertfe le pimahkă.

²⁹Me pušlem le: „Kon sî kadala učimata ka save jean?” Anda kodea dea pe lengă o anau „učimata” ji ando des dă adesara!

³⁰Andakodea, phen le khărăhkă le Israelohkă: „Kadea delduma o Rai, o Dell: „Kamen te marisarăn tume sar kărdine tumară dadda thai te kurvin prastaindoi pala lengă prikăjimata?

³¹E, andindoi tumară pativa le xabenehkă, nakhaindoi tumară šaven andai iag, marin tume i ades andal idolea tumară. Thai Me te mekau Ma te avau pušlino tumendar, khăr le Israelohko! Pe čivava Mîŕî, phenel o Rai, o Dell, kă či mekaua Ma pušlino tumendar!

³²Či dikhăna pherdindoi pe so dentumegodi, kana phenen: „Kamas te avas sar le neamurea, sar le familii le kolavrăngă čema, kamas te kandas le kaštehkă thai le baŕăhkă!”

³³Pe čivava Mîŕă, — phenel o Rai o Dell — kă Me orta avaua Thagar pa tumende, vastesa zurallo thai vastesa tinzome, thai šordinoi Mîŕî arman.

³⁴Ankalavaua tume andoa maškar le popoarăngo, thai tidaua tume andal čema ande save phaŕademas tume, vastesa zurallo thai vastesa tinzome, šordindoi Mîŕî arman.

³⁵Anaua tume ando pustiimos le popoarăngo, thai oče krisîniua Ma mui muieste tumença.

³⁶Sar krisînisai Lem tumară daddença ando pustiimos le čemehko le Ejiptohko, kadea krisîniua Ma i tumença, — phenel o Rai o Dell. —

³⁷Nakhavaua tume talai rowli, thai thoua tume tala o xamos le phanglimahko.

³⁸Alosaraua maškar tumende kolen le muithulen thai kolen kai nai Mangă pateaimahkă; ankalavaua le andoa čem kai sî străinea, ta na jeana pale ando čem le Israelohko. Thai jeanena kă Me sîm o Rai.”

³⁹Akana, khăr le Israelohko, kadea delduma o Rai, o Dell: „Jean thai kanden sakogodi tumară idolengă! Pala kodea, ašunena Ma biathadimahko, thai či mai marisarăna Muŕo Anau kukoa o sfînto tumară pativeança le xabenehkărănça thai tumară idolença!

⁴⁰Kă po baŕobaro Muŕo kukoa o sfînto, po baŕobaro o mai učio le Israelohko, — phenel o Rai, o Dell — oče kandela Ma soa khăr le Israelohko, sa kola kai avena ando čem; oče primisaraua le lašimasa, mangaua tumară pativa le xabenehkă, kola le anglal roade andal pativa tumară, thai sa so dena Ma.

⁴¹Primisaraua tume sar varesar miresme khandimasa čeailimahkărănça, pala so ankalavaua tume andoa maškar le popoarăngo, thai tidaua tume anda sal čema ande save san phaŕadine; thai avaua sfinçome angla le neamurea.

⁴²Thai jeanena kă Me sîm o Rai, kana anua tume parpale ando čem le Israelohko, ando čem kai solaxadem les kă daua les tumară daddengă.

⁴³Oče anena tumengă godi tumară phirimastar thai anda sal kărdimata tumară savença marisailean; thai avela tumengă greaça orta tumendar, andai doši sa le bikrisăngo kai kărdean le.

⁴⁴Thai jeanena kă Me sîm o Rai, kana phiravaua Ma tumença avindoi Ma ando dikhlimos o Anau Muŕo, thai či dăsar pala o phiraimos tumaro le nasulimahko, čina pala le kărdimata tumară le rimome, khăr le Israelohko, phenel o Rai, o Dell.”

⁴⁵O Divano le Raiehko deamnagăduma kadea:

⁴⁶„Šeau le manušehko, ambolde teo mui karing avelodes, thai deduma pal thana katar avelodes! Prooročisar pal văšea thai pal islazurea katar avelodes!

⁴⁷Phen le văšehkă katar avelodes: „Ašun o Divano le Raiehko! Kadea delduma o Rai, o Dell: „Dikta, astaraua khă iag ande tute, kai phabarăla orsao kašt zăleno thai orsao kašt šuko: khonikh našti mudarăla e para e astardi, Thai sa avela phabardo latar, dă katar avelodes ji katar avelereat.

⁴⁸Thai orsao juwindimos dikhăla kă Me, o Rai, astardem la, thai či mudarăla pe či dă sar!”

⁴⁹Me phendem: „Au! Raia, Devlla! On phenen pa mande: „O manuši kadoa kărăl ande iekh paramičea!”