Read Kalderash Romani Cornilescu Bible 2020 (Romania) Ezechiel 22 Bible Online

Ezechiel 22 - Kalderash Romani Cornilescu Bible 2020 (Romania) bible

Ezechiel 22

¹O Divano le Raiehko deamangăduma, kadea:

²„Thai tu, šeau le manušehko, kames te krisînis? Kames te krisînis e četatea e trušali le ratestar? Tho lakă anglal sa lakă prikăjimata!

³Phen: „Kadea delduma o Rai, o Dell: „Četate, kai šorăs rat ando maškar tiro, kaste avel teo des, thai savi kărăs tukă idolea kaste maristu!

⁴Kărdilean došali andoa rat kai šordean les, thai marisailean andal idolea kai kărdean tukă le. Pašardean tukă kadea le des, thai arăslean koa gor te băršengo! Anda kodea kăraua tu prasaimasti maškar le neamuri thai lajawesti maškar sa le čema.

⁵Kola dă pašal thai kola dă dural marăna pehkă prasaimos tutar, kă san ašundi sar marime thai pherdi biujimatăngo!

⁶Dikta kă ande tute, sa le voievoduri le Israelohkă thon pesti zor kaste šorăn rat.

⁷Ande tute, teo dadd thai ti dei sî bidikhline, o străino sî kăznime, o bidaddehko thai e phiwli sî meklinetelal.

⁸Tu bidines Mîŕă thana kukola le sfinçomene, maris Mîŕă Savaturi.

⁹Ande tute sî le pupuitorea, kaste šorăn rat; ande tute xan pe jertfe idolengă pel baŕlebară; ando maškar tiro kărdeon pe lajaimata.

¹⁰Ando maškar tiro, sîkavel pe o nandimos le daddehko; ando maxškar tiro, sî thodinizorasa e juwli ando čiro lakă biujimahko!

¹¹Ando maškar tiro, sakogodi del pe kal prikăjimata la romneasa lehkă pašehkăreasa, sakogodi maril pe andoa xamimos le ratehko pehka boreakărăsa, sakogodi delpolajau pehka phea, la šea pehkă daddehkărea.

¹²Ande tute, len pe pativa andoa šordimos le ratehko. Tu les dobînda thai kamăta, čiorăs la zorasa te pašes, thai Man bîstărăs Ma, phenel o Rai, o Dell.”

¹³„Anda kodea, dikta kă marau andal vast anda e doši te xarvalimasti kai sas tu, andai doši le ratesti šordino ande teo maškar.

¹⁴Dukhadeola teo illo, thai avena te vast arăsline dă zurale andel des kana kăraua buti pa tute? Me, o Rai, demduma, thai kăraua buti.

¹⁵Phaŕavaua tu maškar le neamuri, phaŕavaua tu ande mai but čema, thai xasaraua biatărdimahko o biujimos anda teo maškar.

¹⁶Avesa marime orta tutar angla le neamuri, thai jeanesa kă Me sîm o Rai.”

¹⁷O Divano le Raiehko deamangăduma kadea:

¹⁸„Šeau le manušehko, o khăr le Israelohko arăslo anda Mande sar varesar zgura; saoră sî xarkuma, arčiči, sastri, moliv, ando bou le bilaimahko; arăsline sar varesar zgura rupesti.

¹⁹Anda kodea, kadea delduma o Rai, o Dell: „Anda kă saoră arăslean sar varesar zgura, dikta kă tidaua tume ando maškar le Israelohko.

²⁰Sar tidel pe o rup, e xarkuma, o sastri, o moliv thai o arčiči, ando bou le bilaimahko thai phurdel pe iag kaste bilaol, kadea tidaua tume i Me ande arman Mîŕî, thoaua tume oče thai bilavaua tume.

²¹E, tidaua tume thai phurdaua pa tumende e iag Mîŕa xolleati thai bilaona ande late.

²²Sar bilaol o rup ando bilaitorii, kadea bilaona i tume ando maškar lehko. Thai jeanena kă Me o Rai, šordem Mîŕî xolli pa tumende.”

²³O Divano le Raiehko deamangăduma kadea:

²⁴„Šeau le manušehko, phen le Ierusalimohkă: „San khă čem biujo thai bitindeardo le brîšindestar ando des la xolleako.”

²⁵Le mai bară roden ando maškar lehko, kaste nakhaven le duxurea, sar khă leo kai xunxuil thai phaŕavel pehko limos; thon o vast pel bravalimata thai butea kuči, thai barearăn o dindimos le phiwleango ando maškar lehko.

²⁶Le raša lehkă ušteaven e Kris Mîŕî thai prikăjisarăn le butea Mîŕă le sfinçome, či kărăn či khă ameauimos maxškar so sî biujo thai so sî ujo, ambolden pehkă iakha katal Savaturi Mîŕă, thai sîm marime ando maškar lengo.

²⁷Le šerălebară lehkă sî ando mašakr lehko sar varesar ruw kai phaŕaven o limos, šorăn rat, xasarăn duxurea, dă sar kaste atărdearăn pehko xarvalimos le lovengo.

²⁸Le prooročea leghkă sîle anda lende makhlimata ipsososa, dikhlimata athaimahkă, proročii xoxamnea. On phenen: „Kadea delduma o Rai, o Dell!” Thai o Rai či dealengăduma!

²⁹O poporo andoa čem del pe koa zoralimos prasaimasa, čiorăl, mekăltelal le bibaxtales thai koles kainailes, ušteavel andel pînŕă le străinos pa orsao čeačimos!

³⁰Rodau maškar lende khă manuši kai te vazdekl khă zîdo, thai te ašel ando maškar le phaŕadimahko angla Mande andoa čem, kaste na xasarau les; ta či arakhau či iekhăs!

³¹Šoraua Mîŕî arman pa lende, xasaraua le la iagasa Mîŕa xolleako, amboldaua lengă kărimata pa lengo šero, phenel o Rai, o Dell.”