Read Kalderash Romani Cornilescu Bible 2020 (Romania) Ezechiel 34 Bible Online

Ezechiel 34 - Kalderash Romani Cornilescu Bible 2020 (Romania) bible

Ezechiel 34

¹O Divano le Raiehko deamangăduma kadea:

²„Šeau le manušehko, prooročisar pal bakrearea le diiehkă le Israelohkă! Prooročisar, thai phen lengă le bakrearăngă: „Kadea delduma o Rai o Del: „Au le bakrearăndar le Israelohkă, kai nigrănkaičear orta pes! Či trăbun le bakrearea te nigrănkaičear e turma?

³Tume xan o thulimos, xureaven tume la pošomasa, šinen so sî thulo, ta či nigrănkaičear le bakrean.

⁴Či zurearăn kola la šutea, či sasterăn kola la nasfalea, či phanden kola la dukhadea; či anen parpale kola kai xasardi'li, či anen parpale la xasardea, ta stăpînin le meklimasatelal thai zuralimasa!

⁵Kadeadar on phaŕadile, anda kă nas le bakreari; arăsline limos sa le jiwinengă le kîmpohkă, thai phaŕadi'le.

⁶E turma Mîŕî xasaol pe sal baŕlebară thai pe sal pleaia le mai uče; Mîŕă bakrea sî phaŕadine pe soa mui le čemehko, thai khonikh či kandel pe lendar, čina či rodele!”

⁷„Anda kodea, bakrearilor, ašunen o Divano le Raiehko!

⁸„Pe čivava Mîŕî, phenel o Rai o Dell, anda kă Mîŕă bakrea arăsline jsafohkă thai sî limos sa le jiwinengă le kîmpohkă, anda kă nai le bakreari, anda kă le bakrearea Mîŕă nai le či khă kandimos le bakreandar Mîŕăndar, ta nigrănaspekaičear dăsar i orta len, thai či nigrănaskaičear Mîŕă bakrean”,

⁹anda kodea, bakrearina, ašunen o Divano le Raiehko!

¹⁰„Kadea delduma o Rai o Dell: „Dikta, sîma xolli pe tumende bakrerea! Laua parpale Mîŕă bakrea anda lengă vast, či mai mekaua le te nigrănkaičear Mîŕă bakrean, thai či mai nigrănapekaičear či len orta; kă skăpisaraua Mîŕă bakrean anda lengo mui, thai či mai kandena le sar xamos!”

¹¹Kă kadea delduma o Rai o Dell: „Dikta, kandaua le Ma Me orta Mîŕă bakreandar, thai rodaua le!

¹²Sar rodel khă bakreari e turma kana sî ando maškar pehkă bakreandi le phaŕadeandi, kadea rodaua Me Mîŕă bakrean, thai tidaua le anda sal thana katar sas phaŕadine ando des pherdo norea thai buŕ.

¹³Ankalavaua le maškar le popoară, tidaua le anda le bute čema, thai anaua le parpale ande lengo čem; nigraualekaičear pel baŕlebară le Israelohkă, andolunjimos le nanilašurengo, thai ande sal thana bešline le čemehkă.

¹⁴Nigraualekaičear pe khă islazo lašo, thai stîna lendi avela pel baŕlebară le mai uče le Israelohkă; oče xodinina ande khă staulo čeailimahko, thai avena le islazurea thulea pel baŕlebară le Israelohkă.

¹⁵Me orta nigrauakaičear Mîŕă bakrean, Me daua le xodinimos, phenel o Rai o Dell.”

¹⁶„Rodaua kola la xasardea, anaua parpale kola kai xasailisas, phandaua kola la dukhadea, thai zurearaua kola la šutea. Ta arakhau kolen le thulean thai pherde zor: kamau te nigraulekaičear sar trăbul.”

¹⁷„Thai tume, Mîŕă bakrea, kadea delduma o Rai o Dell: „Dikta, krisîniua maškar e bakri thai e bakri, maškar le bakriše thai le busne.

¹⁸Sî but xançî anda tumende kă xančear ando islazo o lašo, ta mai ušteaven andel pînŕă i e kolaver rig tumară čeareati? Kă pen pai ujo, ta mai biujearăn i e kolaver rig le pînŕănça?

¹⁹Thai le bakrea Mîŕă pala kodea te xančear so ušteadean tume tumară pînŕănça, thai te pen so biujeardean tume tumară pînŕănça!”

²⁰Anda kodea, kadea delduma o Rai, o Dell: „Dikta kă krisîniua maškar e bakri e thuli thai e bakri e šuti.

²¹Andakă maladean le prašavesa thai le dumesa, thai pusadean le šingănça tumarănça sa le bakrean le šutean, ji kana našadean le,

²²avaua ando kandimos Mîŕă bakreango, kaste na mai aven jafohkă, thai krisîniua maškar e barkri thai e bakri.

²³Thaoaua pa lende khă korkoŕo bakreari, kai nigrălalekaičear, thai kadea Mîŕă Robos le Davidos; O nigrălallekaičear, O avela lengo bakreari.

²⁴Me, o Rai, avaua lengo Dell, thai o Robo Muŕo o Davido avela voievodo ande lengo maškar.Me, o Rai, demduma!

²⁵Phandaua lença khă phanglimos pačeako, thai našavaua andoa čem sa le jiwine le văšune; on bešena ando ujimos ande pustia, thai dašti sovena ando maškar le văšengo.

²⁶Kăraua le len, thai le rigatar Mîŕă pleaiehko, khă buti dinidumadămišto; tradaua lengă brîšind koa čiro, thai kadoa avela khă brîšind dinodumadămištimahko!

²⁷O kašt poa kîmpo dela pesti roada, thai e phuw dela pehkă rodurea. On avena ujearde ando čem lengo thai jeanena kă Me sîm o Rai, kana phagaua le phanglimata lengă xamohkă, thai kana skăpisaraua le andoa vast kolengo kai mekănletelal.

²⁸Či mai avena jafohkă maškar le neamurea, či xanale ăl jiwine andoa čem, ta bešena ando ujimos, thai či mai biujearălale khonikh.

²⁹Thoaua lengă khă răsado sao jeala lehko barimos; či mai avena phabardine bokhatar ando čem, thai či mai phiravena o prasaimos le neamurengo.

³⁰Thai jeanena kadea kă Me, o Rai, o Dell lengo, sîm lença, khăr le Israelohko, phenel o Rai o Dell.”

³¹Tume san Mîŕă bakrea, le bakrea Mîŕă islazohkă, thai Me sîm o Dell tumaro, phenel o Rai o Dell.”