Read Kalderash Romani Cornilescu Bible 2020 (Romania) Ezechiel 41 Bible Online

Ezechiel 41 - Kalderash Romani Cornilescu Bible 2020 (Romania) bible

Ezechiel 41

¹Nigărdea ma ando Templo. Măsurisardea le tille; sas le khă bufllimos štară koçăngo pe khă rig, thai khă bufllimos šove koçngo pe kolaver — kadoa sî o bufllimos le tillengo.

²O bufllimos le udarăhko sas dă deši koçea; ta le kanaturea le udarăhkă sas buflle dă panji koçea pe khă rig, thai panji koçea ande kolaver rig. Măsurisardea i o lunjimos le Templohko: štarvardeši koçea, thai o bufllimos: biši koçea.

³Palakodea šutea pe andră. Măsurisardea le pragureaopral le udarăhkă: dui koçea, o udar šov koçea, thai o bufllimos le udarăhko, efta koçea.

⁴Pe rig dăandral le Templosti măsurisardea ando lunjimos biši koçea thai ando bufllimos biši koçea; thai phendea mangă: „Kadoa sî o Than but sfînto!”

⁵Măsurisardea o zîdo le khărăhko: thullo dă šov koçea, thai o bufllimos le odăiengo rigatar anda sal riga le khărăhkă, štar koçea.

⁶Le odăii dărigatar sas iekh pa aver, ando dindimos dă treanda, thodine ande trin katurea; on denas ande varesar nakhadimata zîdohkă kărdine anume anda le odăii kadala dă rigatar le khărăhko, kadea kă nikărdeonas pe lende, thai na po zîdo le khărăhko.

⁷Le odăii, sodença sas mai opră, kaditi sas mai barea, thai anklesas pe lende dindoileroata; kă anklesas rigatar le khărăstar pe khă skara šerpuimati. Kadeadar sas mai but than, sar bufllimos, ande rig dă opral le khărăsti, thai andoa kato dă telel anklesas ando kato opral anda kukoa andoa maškar.

⁸Dă rigatar le khărăhko dičiolas khă pardosala ankăsti avreal. Le odăii sas rigatar thai sas le varesar temelii, thai sas dă khă rowlli întrego, adikă šove koçăndi koa kolço.

⁹O zîdo dă avreal le odăiengo dărigatar sas les khă thulimos dă panji koçea.

¹⁰O than o nango maškar le odăii andal riga le khărăhkă thai le odăii dărigatar le khărăhko, sas les khă bufllimos dă biši koçea, dă rigatr le rigăndar.

¹¹O udar le odăiengo rigatar delas andekh than nango: khă udar karing avelereat, thai khă udar karing avelodes; o bufllimos le thanehko le nangăhko, sas dă panji koçea dă rigatar.

¹²E avlin angloa than o nango, andai rig katar perălokham, sas les khă bufllimos dă eftavardeši koçea, khă zîdo dă panji koçea dă thulo dă rigatar, thai sas lungo dă îniavardeši koçea.

¹³Măsurisardea i o khăr, kai sas les khă bufllimos dă khă šell koçea. O than o nango, e avlin thai lakă zîdurea, sas le sakadea khă lunjimos dă ăkh šell koçea.

¹⁴O bufllimos le mohko le khărăhko thai le thanehko le nangăhko, andai rig katar anklelokham, sas dă khă šell koçea.

¹⁵Măsurisardea o bufllimos la avlinako angloa than o nango, pe rig dă palal le khărăsti, thai lakă pridvoare anda sako rig: sas ăhk šella koçăngă.

¹⁶O Tempklo thai o khăr dă andral, e tinda dă avreal, le praguri, le jeamuri le tidine, le pridvoare angla kola trin etajea, angloa mui le pragurengo, sas garadine kaštesa dărigatar. Dă katai phuw ji kal jeamuri le garade,

¹⁷ji opral o udar, e rig dă andral le khărăsti, e rig dă avreal, soa zîdo dă rigatar la rigatar le khărăhko dă andral thai dă avreal, sa sas pala o măsurimos,

¹⁸thai kučeardo xeruwimença thai finičença. Maškar dui xeruwimea sas khă finiko. Sako xeruwimo sas les dui muia.

¹⁹Khă mui manušehko amboldino karing khă finiko ande khă rig, thai khă mui leohko amboldino karing o kolaver finiko, ande kolaver rig; kadea sas dărigatar sa le khărăhko.

²⁰Katai phuw ji opral le udarăhko, sas xeruwimea thai finičea, thai sa kadea i po zîdo le Templohko.

²¹Le ušiorea le Templohkă sas ande štar mutii. Thai anglal o Than o sfînto sas vareso kai dičiolas pe

²²sar khă altarii kaštehko, učio dă trin koçea, lungo dă dui koçea, thai bufllo dă dui koçea. Le kolçurea, e temelia, thai le zîdurea sas kaštehkă. O manuši kodoa phensdea mangă: „Kadea sî e skafidi kai sî angloa Rai!

²³O Templo thai o Than o but sfînto sa les dui udara.

²⁴Sako udar sas les dui kanaturi, kai amboldenas pe lidui pel udara, dui kanaturi anda khă udar thai dui kanaturi andoa kolaver.

²⁵Pe le udara le Templohkă sas xunade xeruwimea thai finičea, sar i pel zîduri. Angloa pridvoro dăavreal sas varesar grinzî kaštehkă nakhadea maškar lende.

²⁶Sas jeamuri tidine, i ande khă rig thai i ande kolaver rig sas finičea, thai sa kadea sas i pe le laviçî le pridvorăhko, pe le odăii dă rigatar le khărăhko thai pe le grinzi dă opral.