Read Kalderash Romani Cornilescu Bible 2020 (Romania) Numeri 19 Bible Online

Numeri 19 - Kalderash Romani Cornilescu Bible 2020 (Romania) bible

Numeri 19

¹O Rai dea duma le Moisahkă thai le Aaronohkă, thai phendea:

²„Dikta so motol e kris kai dea la o Rai, phendindoi: „De duma le šeavengă le Israelohkă te anen tukă khă gurumni lolli, bi patako, bidukhadi ando stato, thai savi te na avilino thodini ando xamo.

³Te den la le rašahkă le Eleazarohkă; o te ankalave la anda e tabăra, thai te avel dinišuri angla leste.

⁴O rašai o Eleazar te lel le naiesa anda o rat la gurumneako, thai te pitearăl eftavar angla e çăra le arakhadimasti.

⁵E gurumni te avel phabardi angla lehkă iakha, te phabarăn lati morči, o mas thai o rat, andekhthan la gošneasa.

⁶O rašai te lel kašt čedrohko, isopo thai kîrmîzo, thai te šdele ando maškar la parako kai phabarăna la gurumnea.

⁷O rašai te xalavel pehkă çoale, thai te naiarăl pehko stato ando pai; pala kodea te šol pe pale ande tabăra, thai te avel marime ji reateako.

⁸Kukoa kai phabarăla la gurumnea, te halavel pehkă çoale ando pai thai te naiarăl pehko stato ando pai; pala kodea te šol pe pale ande tabăra, thai avela marime ji reateako.

⁹Khă manuši bimarime te tidel o ušar la gurumneako, thai te thol la ande khă than bimarime avri anda e tabăra: te garavel la anda o tidimos le šeavengo le Israelohkă, kaste kărăl o pai le ujimahko. Kadoa sî khă pai iertimahko.

¹⁰Kukoa kai tidela o ušar la gurumneako, te xalavel pehkă gada, thai te avel marime ji reateako. Kadea te avel khă kris vešniko kaditi anda le šeave le Israelohkă sode i andoa străino kai bešel ande lengo maškar.

¹¹Kon azbala vokh mulles, anda vokh stato manušehko mullo, te avel marime ăkh čiro dă efta des.

¹²Te ujearăl pe le paiesa kadalesa o trito des thai o eftato des, thai avela bimarime; ta, kana či ujearăl pe o trito thai o eftato des, či avela bimarime.

¹³Kon azbala vokh mulles, le statostar khă mullehko, thai na ujearăla pe, maril e çăra le Raiesti; kodoa te avel mudardo andoa Israelo. Anda kă či piteardea pa leste o pai le ujimahko, sî marime, thoa marimos lehko sî dăsar pa leste.

¹⁴Dikta e kris kana merălla khă manuši ande vokh çăra: orkon šola pe ande çăra, avela marime efta des.

¹⁵Sa kadea, orsao vaso pîtărdo, kai či avela les kapako mišto tidino pe leste, avela marime.

¹⁶Orkon va azbala, po kîmpo, khă manušestar mudardo la sabiatar, or khă mullestar, or kokalendar manušengărăndar, or vokh mormîntohkă, avela marime efta des.

¹⁷Kana kukoa o marime, te lel pe ušar kata e jertfa le iertimasti kai sas phabardi, thai te šorăl pa late pai xaingako, ande khă vaso.

¹⁸Khă manuši bimarime te lel isopo, thai te koveleară les ando pai; te pitearăl lesa e çăra, sa le butea, le manuši kai sî oče, koles kai azbadea le kokala le manušengă, or khă manušestar mudardo, or khă mullestar, or khă mormîntostar.

¹⁹O bimarime te pitearăl le marimenes, o trito des thai o eftato des, thai te ujeară les ando des o eftato. Te xalavel pehkă çoale, thai te naiol ando pai; thai reate, avela bimarime.

²⁰Khă manuši kai avela marime, thai či ujearăla pe, avela mullimahko andoa maškar le tidimahko, kă marisardea o sfînto than le Raiehko; anda kă nas piteardo pa leste o pai le ujimahko, sî marime.

²¹Kadea te avel khă kris vešniko anda lende. Kukoa kai pitearăla avrăs le paiesa le ujimahkărăsa, te xalavel pehkă çoale, thai kukoa kai azbala o pai le ujimahko, te avel marime ji reateako.

²²Orsavi buti kai avela azbadi le marimenestar, avela marime; thai kon azbala les te avel marime ji reateako.”