Read Kalderash Romani Cornilescu Bible 2020 (Romania) Numeri 21 Bible Online

Numeri 21 - Kalderash Romani Cornilescu Bible 2020 (Romania) bible

Numeri 21

¹O thagar le Aradohko, khă Kanaanito, kai bešelas karingavelodes, ašundea kă o Israel avel po drom o Atarim. O mardilo le Israelosa, thai lea but astarde andoa mardimos.

²Atunčeara o Israelo kărdea le Raiehkă khă solaxaimos, thai phenedea: „Te desa kadale poporos ande mîŕă vast mudaraua le saorăn lengă četăçănça.”

³O Rai ašundea o mui le Israelohko, thai dea le Kanaaniçăn ande lehko vast. Le Israieliçea mudardele saorăn, len thai lengă četăçi; thai o than kodoa dine les anau Xorma (Mudardimos dă sa).

⁴Teleardea kata o baŕbaro o Xor po drom kai jeal karing e Marea e Lolli, kaste denroata o čem le Edomohko. O poporo xasardea pehko răbdimos po drom

⁵thai dea duma ande xolli Le Devllesti thai ande xolli le Moiasati: „Anda soste ankaladean ame andoa Ejipto, kaste meras ande pustia? Kă nai či manŕo, či pai, thai greçosailo amaro sufleto anda o xabe kadoa o čioŕo.”

⁶Atunčeara o Rai tradea poa poporo varesar sap iagale, kai xale o poporo, kadea kă mulle but manuši andoa Israelo.

⁷O poporo avilo koa Moise, thai phendea: „Bezexardeam, kă deam duma xolleasa karing o Rai, thai karing tute. Rudisao le Raiehkă, kaste durearăl amendar kadala sap.” O Moise rudisai'lo andoa poporo.

⁸O Rai phendea le Moisaskă: „kăr tukă khă sap iagalo, thai amblau les kha beleatar; orkon avela xalo, thai dikhăla karing leste, traila.”

⁹O Moise kărdea khă sap xarkuno, thai thodea les ande khă beli; thai orkon sas xalo khă sapestar, thai dikhă las karing o sap la xarkumako, trailas.

¹⁰Le šeave le Israelohkă telearde, thai arăsle ando Oboto.

¹¹Telearde anda o Oboto, thai arăsle ando Iie-Abarim, ande pustia angloa Moabo, karing anklelokham.

¹²Oçal telearde thai arăsle ande xar e Zered.

¹³Oçal telearde thai arăsle înteal le Arnonostar, kai thavdel anda e pustia, ankăstindoi anda le phuwea le Amoriçianengo, kă o Arnono kărăl e phuw le Moabosti, maškar o Moabo thai le Amoriçea.

¹⁴Anda kodea phenel pe ando lill le Mardimatăngo le Raiehko: „Vaxeb în Sufa, Le paia le Arnonulohkă,

¹⁵Thai le thavdimata le paiengă, Kai tinzon pe karing o Ar thai azban pe La phuweasa le Moabohkă”

¹⁶Oçal telearde ando Beero (Xaing). Ka kadea xaing o Rai phendea le Moisaskă: „Tide o poporo, thai dava le pai.”

¹⁷Atunčeara dilabaia o Israelo e dili kadea: „Huti, xaingă! Dilaban ande pativ lati!

¹⁸E xaing, kai xunadela ăl mai bară le poporohkă, Le rovllesa le nigărimahkă, le rovlleança lengă!” Anda e pustia kadea gălinetar ande Matana,

¹⁹koa Naxalielo; andoa Naxalielo, ando Bamoto;

²⁰andoa Bamot, ande xar anda o islazo le Moabohko, ando gor le baŕăbarăhko Pisga, kai rodel karing e pustia.

²¹O Israel tradea solea koa Sixono, o rano le Amoriçinengo, kaste phenen lehkă:

²²„Mekh ma te nakhau anda teo čem, či šoas ame či andel phuwea, či andel răza, thai či peasa či pai anda le xainga; nikrasa o drom o rano, ji pune nakhasa anda tiră phuwea.”

²³O Sixono či muklea le Israelos te nakhăl anda lehko čem. O Sixono tidea sa o poporo, thai ankăsto angloa Israelo, ande pustia. Avilo koa Iaxăço, thai mardea pe le Israelosa.

²⁴O Israelo mardea les le askuçimasa la sabiako thai lea lehko čem kata o Arnono ji koa Iaboko, ji kai phuw le šeavendi le Amonohkă; kă e phuw le šeavengă le Amonohkă sas zureardi.

²⁵O Israelo lea sa le četăçi kodola, thai thodea pe ande sa le četăçi le Amoriçengo, ando Xesbono thai ande sea le gava paša leste.

²⁶Kă o Xesbono sas e četatea le Sixonosti, o thagar le Amoriçinengo. O teleardeasas mardimasa le thagaresa dăanglal le Moabohko, thai leasas sa lehko čem ji koa Arnono.

²⁷Anda kodea phenen le poeçea: „Xaidan ando Xesbono! Te vazdelel pe pale thai te zureaol e četatea le Sixonosti.

²⁸Kă ankăsti khă iag andoa Xesbono, Khă iag anda e četatea le Sixonosti, Thai phabardea le Ar-Moabos, Le bešlitoren le učimatăngo le Arnonohkă.

²⁹Au tutar, Moabona! San xasardo, o poporo le Chemošehko! O kărdea pehkă šeaven našlitorea, Thai pehkă šeian dea le roabe Le Sixonohkă, o thagar le Amoriçnengo.

³⁰Ame šudeam le săjetença pa lende: Anda o Xesbrono ji ande o Dibono sa sî mudardino; Pustisardeam ji koa Nofaxo, Kai tinzol pe ji ande Medeba.”

³¹O Israelo thodea pe kadea ando čem le Amoriçnengo.

³²O Moise tradea te dikhănčioreal o Iaezero. Line le gava kai nikărăns lestar, thai našadine le Amoriçanen kai mai sas ande lende.

³³Parugline pala kodea o drom, thai ankăste po drom kai nigărăl ando Basano. O Og, o thagar le Basanohko, ankăsto lengă anglal, sa pehkă poporosa, kaste marăn pe lença ando Edreio.

³⁴O Rai phendea le Moisahkă: „Na dara lestar, kă dau les ande te vast, les thai sa lehko poporos, thai sa lehko čem; te kărăs lehkă sar kărdean le Sixonohkă, o thagar le Amoriçanengo, kai bešelas ando Xesbono.”

³⁵Thai on mardine les, les thai lehkă šeaven, ta či mukle te skăpil či barem iekh, thai thodine o vast pe lehko čem.