Read Kalderash Romani Cornilescu Bible 2020 (Romania) Numeri 28 Bible Online

Numeri 28 - Kalderash Romani Cornilescu Bible 2020 (Romania) bible

Numeri 28

¹O Rai dea duma le Moisahkă, thai phendea:

²„De duma le šeavengă le Israelohkă, thai phen lengă: „Te avel tume grija te anen Mangă koa čiro thodino, e pativ Mîŕî le xabenesti, o xamos le jertfengă Mîŕă phabarde iagatar, kai sî Mangă khă khandimatahko čeailo.”

³Te phenes lengă: „Dikta e jertfa phabardi iagatar kai sî te anen la le Raiehkă: ande sako des, po dui bakriše khă baršehkă bi dukhade, sar phabarimos dă sa biatărdimahko.

⁴Te anes khă bakrišo dădroboitu, thai o kolaver bakrišo reate;

⁵ta, e pativ le xabenesti, te anes o dešto rig anda khă efa lulludeati aŕăsti, kovleardi ande khă dopašin andai dopaši hinosti zetinohko anda le zetine linčeardea.

⁶Kadea sî o phabarimos dă sa biatărdimahko, kai sas andini po baŕbaro o Sinai; khă jertfa phabardi iagatar, khă khandimatahko čeailo le Raiehkă.

⁷E jertfa le pimasti te avel dopaši andai dopašin hinosti anda sako bakrišo; e jertfa le pimasti la molleati te kărăs la le Raiehkă ande khă than sfînto.

⁸O duito bakrišo te anes les reate, sar khă pativ xabenesti thai khă jertfa pimasti sar kola dădroboitu, kadea să khă jertfa phabardi iagatar, khă khandimatahkă čeailo le Raiehkă.

⁹Ando des le Savatohko, te anen dui bakriše bi kha dukhako, thai sar pativ xabenesti, dui dešimata anda e lulludi le aŕăsti, kovleardi zetinosa, andekhthan la jertfasa le pimasti.

¹⁰Kadea sî o phabarimos dă sa anda sako des le Savatohko, avri anda o phabarimos dă sa biatărdimahko thai e jertfa lati le pimasti.

¹¹Mai anglal ka tumară šon, te anen sar phabarimos dă sa le Raiehkă: dui guruwiça, khă bakrišo, thai efta bakrišoră po khă băršehkă bi dukhako;

¹²thai, sar pativ xabenesti anda sako guruwiçî, trin dešimata efakă anda e lulludi le aŕăsti, kovleardi zetinosa; sar partiv xabenesti anda le bakriše te anen dui dešimata efakă anda e lulludi le aŕăsti, kovleardi zetinosa;

¹³sar pativ xabenesti anda sako bakrišoro, te anen khă dešimos efako anda e lulludi le aŕăsti, kovleardi ando zetino. Kadea sî khă phabarimos dă sa, khă jertfa phabardi iagatar, khă khandimatahko čeailo le Raiehkă.

¹⁴Le jertfe le pimahkă te aven dopaši andai dopašin xinosti molleako anda khă guruwiçî, e trito rig anda khă xino anda khă bakro, thai dopaši andai dopašin xinosti anda khă bakrišoro. Koadoa sî o phabarimos dă sa anda o anglaimos le šonehko, ande sako šon, ande sal šon le băršehkă.

¹⁵Te anel pe le Raiehkă khă busno, sar jertfa le iertimasti, avri anda o phabarimos dă sa bi atărdimahko thai e jertfa lati le pimasti.

¹⁶Ando šon anglal, ando des o dešuštar le šonehko, avena le Patradea le Raiehkă.

¹⁷O des le dešpanjengo kadale šonehko te avel khă des baro. Čiro dă efta des te xan pogăči.

¹⁸Ando des dă anglal, te avel khă tidimos sfînto: te na kărăn či khă buti kandimasti ande leste.

¹⁹Te anen sar phabarimos dă sa le Raiehkă khă jertfa phabardi iagatar: dui guruwiça, khă bakrišo, thai efta bakrišoră bi dukhako.

²⁰Te mai thon i e pativ lendi le xabenesti andai lulludi le aŕăsti, kovleardi ando zetino, trin dešimata efakă anda khă guruwiçî, dui dešimata anda khă bakrišo,

²¹thai khă dešimos anda sako kukola efta bakrišoră.

²²Te anen khă busno anda e jertfa le iertimasti, kaste kărăl iertimos anda tumende.

²³Te anen kadala jertfe, avri anda o phabarimos dă sa dădroboitu, kai sî khă phabarimos dă sa biatărdimahko.

²⁴Te anen le ande sako des, čiro dă efta des, sar o xamos kha jertfako phabardi iagatar, khă khandimatahko čeailo le Raiehkă. Te aven andine avri le phabarimastar dă sa thai e jertfa lati le pimasti.

²⁵Ando des o eftato te avel tume kha tidimos sfînto: te na kărăn či khă buti kandimatasti ande leste.

²⁶Ando des le anglal roadengo, kana anena le Raiehkă khă pativ xabenesti, koa desbaro kana isprăvin pe le kurkă (Panvardešimea), te avel tume khă tidimos sfînto; te na kărăn či khă buti kandimatasti ande leste.

²⁷Te anen sar phabarimos dă sa, khă khandimatahko čeailo le Raiehkă: dui guruwiça, khă bakrišo, thai efta bakrišoră po khă băršehkă.

²⁸Te mai thon e pativ lendi le xabenesti anda e lulludi le aŕăsti, kovleardi zetinosa, po trin dešimata anda sako guruwiçî, dui dešimata anda o bakrišo,

²⁹thai khă dešimos anda sako bakrišoro anda kukola le efta.

³⁰Te anen khă busno, kaste kărăl iertimos anda tumende.

³¹Te anen kadala jertfe, avri anda o phabarimos dă sa biatărdimahko thai e pativ lati le xabenesti. Le bakrišoră te aven bidukhade, thai te thon i le jertfe lengă le pimahkă. Le jertfe ando des la šingako.